ಅಮೆರಿಕ–ಜಪಾನ್‌ ಮೈತ್ರಿ ವಿರುದ್ಧ ಚೀನಾ ವಾಗ್ದಾಳಿ

ಬಿಜೀಂಗ್‌: ಅಮೆರಿಕ–ಜಪಾನ್‌ ಮೈತ್ರಿ ವಿರುದ್ಧ ವಾಗ್ದಾಳಿ ನಡೆಸಿರುವ ಚೀನಾ, ‘ಇದು ವಿಭಜನೆಗೆ ಕುಮ್ಮಕ್ಕು ಪ್ರಯತ್ನವಾಗಿದೆ’ ಎಂದು ಹೇಳಿದೆ.

‘ಪ್ರಜಾಪ್ರಭುತ್ವ ಮತ್ತು ಮಾನವ ಹಕ್ಕುಗಳ ಮೌಲ್ಯ ಹಾಗೂ ಇಂಡೊ–ಫೆಸಿಫಿಕ್ ಪ್ರದೇಶದಲ್ಲಿ ಚೀನಾದ ಚಟುವಟಿಕೆ ಕುರಿತಾಗಿ ಅಮೆರಿಕ–ಜಪಾನ್‌ ಜಂಟಿ ಹೇಳಿಕೆ ನೀಡಿದೆ. ಈ ರಾಷ್ಟ್ರಗಳು ಸಾಮಾನ್ಯ ಅಭಿವೃದ್ಧಿ ಮತ್ತು ದ್ವಿಪಕ್ಷೀಯ ಸಂಬಂಧಕ್ಕಿಂತ ಅದೆಷ್ಟೋ ಮುಂದೆ ಹೋಗಿವೆ’ ಎಂದು ಚೀನಾ ಹೇಳಿದೆ.

ಇದನ್ನೂ ಓದಿ: ಸಮೃದ್ಧ, ಮುಕ್ತ ಇಂಡೊ–ಫೆಸಿಫಿಕ್‌ ಪ್ರದೇಶ ನಿರ್ಮಾಣ: ಅಮೆರಿಕ–ಜಪಾನ್‌

‘ಮುಕ್ತ ಪ್ರದೇಶ ನಿರ್ಮಾಣದ ಹೆಸರಿನಲ್ಲಿ ಇತರ ದೇಶಗಳನ್ನು ವಿಭಜಿಸಲು ಮತ್ತು ತಡೆ ಗೋಡೆಯನ್ನು ಕಟ್ಟಲು ಮೈತ್ರಿಯನ್ನು ಮಾಡಿಕೊಳ್ಳಲಾಗುತ್ತಿದೆ. ಇದು ನಿಜಕ್ಕೂ ಹಾಸ್ಯಾಸ್ಪದ’ ಎಂದು ಅಮೆರಿಕದಲ್ಲಿರುವ ಚೀನಾದ ರಾಯಭಾರಿ ತಿರುಗೇಟು ನೀಡಿದ್ದಾರೆ.

ಅಮೆರಿಕದ ಶ್ವೇತಭವನದಲ್ಲಿ ಅಧ್ಯಕ್ಷ ಜೋ ಬೈಡನ್‌ ಮತ್ತು ಜಪಾನ್‌ ಪ್ರಧಾನಿ ಯೋಶಿಹಿದೆ ಸುಗಾ ಅವರು ಶುಕ್ರವಾರ ಸಭೆ ನಡೆಸಿದರು. ಈ ವೇಳೆ ಉಭಯ ನಾಯಕರು,ಇಂಡೊ–ಫೆಸಿಫಿಕ್‌ನಲ್ಲಿ ಶಾಂತಿ ಸ್ಥಾಪನೆ ಮತ್ತು ಹಾಂಗ್‌ಕಾಂಗ್‌, ತೈವಾನ್‌ನಲ್ಲಾಗುತ್ತಿರುವ ಮಾನವ ಹಕ್ಕುಗಳ ಉಲ್ಲಂಘನೆ ಬಗ್ಗೆ ಚರ್ಚಿಸಿದ್ದರು.