ಅಮೆರಿಕದಲ್ಲಿ ‘ಆಂತರಿಕ ಭಯೋತ್ಪಾದನೆ’ ಹೆಚ್ಚುತ್ತಿದೆ: ಎಫ್‌ಬಿಐ ಎಚ್ಚರಿಕೆ
ವಾಷಿಂಗ್ಟನ್‌: ಅಮೆರಿಕದ ಕ್ಯಾಪಿಟಲ್‌ ಹಿಲ್‌ನಲ್ಲಿ ನಡೆದ ಗಲಭೆಯನ್ನು ‘ಆಂತರಿಕ ಭಯೋತ್ಪಾದನೆ’ ಎಂದುಎಫ್‌ಬಿಐ ನಿರ್ದೇಶಕ ಕ್ರಿಸ್ಟೋಫರ್ ವ್ರೇ ಅವರು ಹೇಳಿದ್ದಾರೆ. ಅಮೆರಿಕದಲ್ಲಿ ಆಂತರಿಕ ಹಿಂಸಾಚಾರಗಳು ಹೆಚ್ಚಾಗಿವೆ. ಈ ರೀತಿಯ ಪ್ರಕರಣಗಳ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಆದರೂ, ಇಷ್ಟೊಂದು ಪ್ರಕರಣಗಳ ತನಿಖೆ ಸ್ವಲ್ವ ಕಷ್ಟ’ ಎಂದು ಅವರು ತಿಳಿಸಿದರು.
ಕ್ಯಾಪಿಟಲ್‌ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆಕ್ರಿಸ್ಟೋಫರ್ ವ್ರೇ ಅವರುಮಂಗಳವಾರ ಸೆನೆಟ್ ನ್ಯಾಯಾಂಗ ಸಮಿತಿ ಮುಂದೆವಿಚಾರಣೆಗೆ ಹಾಜರಾದರು. ಈ ವೇಳೆ ಮಾತನಾಡಿದ ಅವರು,‘ಜನವರಿ 6ರಂದು ಗಲಭೆ ನಡೆಯುವ ಸಾಧ್ಯತೆಯಿದೆ ಎಂಬುದರ ಬಗ್ಗೆ ನಾವು ಎಚ್ಚರಿಕೆ ನೀಡಿರುವುದು ನಿಜ. ಆದರೆ ರಿಪಬ್ಲಿಕನ್‌ ನಾಯಕರು ಹೇಳುವಂತೆ ಟ್ರಂಪ್‌ ವಿರೋಧಿ ಬಣ ಈ ಹಿಂಸಾಚಾರ ನಡೆಸಿದೆ ಎಂಬ ವಿಷಯ ಸುಳ್ಳು’ ಎಂದು ಹೇಳಿದ್ದಾರೆ.
‘ಜನವರಿ 6 ರಂದು ನಡೆದ ಹಿಂಸಾಚಾರ ಹೊಸದೇನಲ್ಲ. ಅಮೆರಿಕದಲ್ಲಿ ಕಳೆದ ಹಲವು ವರ್ಷಗಳಿಂದ ಆಂತರಿಕ ಹಿಂಸಾಚಾರಗಳು ನಡೆಯುತ್ತಿವೆ. ಈ ಸಮಸ್ಯೆ ಇಷ್ಟು ಬೇಗ ನಿವಾರಣೆಯಾಗುವುದಿಲ್ಲ. ಆಂತರಿಕ ಹಿಂಸಾಚಾರದ ಬಗ್ಗೆ ಎಫ್‌ಬಿಐ ಹಲವು ವರ್ಷಗಳಿಂದ ಎಚ್ಚರಿಕೆ ನೀಡುತ್ತಾ ಬಂದಿದೆ’ ಎಂದು ಅವರು ತಿಳಿಸಿದರು.
‘ಸೆಪ್ಟೆಂಬರ್‌ 11, 2001ರ ದಾಳಿಯು ಅಂತರರಾಷ್ಟ್ರೀಯ ಭಯೋತ್ಪಾದನೆ ಬಗ್ಗೆ ಎಚ್ಚರಿಕೆ ನೀಡಿತು. ಅದೇ ರೀತಿ ಕ್ಯಾಪಿಟಲ್‌ ಹಿಲ್ ಮೇಲಿನ ದಾಳಿಯು ಆಂತರಿಕ ಹಿಂಸಾಚಾರದ ಬಗ್ಗೆ ಎಚ್ಚರಿಕೆ ನೀಡಿದೆ.ಕಳೆದ ವರ್ಷ ಆಂತರಿಕ ಹಿಂಸಾಚಾರದ 1,400 ಪ್ರಕರಣಗಳು ವರದಿಯಾಗಿದ್ದವು. ಈ ವರ್ಷ 2,000 ಪ್ರಕರಣಗಳು ವರದಿಯಾಗಿವೆ’ ಎಂದು ಅವರು ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.