3 ರಾಷ್ಟ್ರಗಳ ಪ್ರಧಾನಿ ಮೋದಿ ಪ್ರವಾಸ ಫಲದಾಯಕ: ವಿದೇಶಾಂಗ ಸಚಿವಾಲಯ

ಈ ಮೂಲಕ ಪ್ರಧಾನಿ ಮೋದಿ ಅವರ ಯುರೋಪ್‌ನ ಮೂರು ರಾಷ್ಟ್ರಗಳ ಪ್ರವಾಸ ಪೂರ್ಣಗೊಂಡಿದೆ. ದ್ವಿಪಕ್ಷೀಯ ಸರಣಿ ಸಭೆಗಳಲ್ಲಿ ವ್ಯಾಪಾರ, ಇಂಧನ ಹಾಗೂ ಹಸಿರು ತಂತ್ರಜ್ಞಾನಗಳಿಗೆ ಸಂಬಂಧಿಸಿದಂತೆ ಒಪ್ಪಂದಗಳಿಗೆ ಪುಷ್ಠಿ ಸಿಕ್ಕಿದೆ.

ಈ ಕುರಿತು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಅರಿಂದಮ್‌ ಬಾಗ್ಚಿ ಟ್ವೀಟಿಸಿದ್ದು, 'ಪ್ರಧಾನಿ ನರೇಂದ್ರ ಮೋದಿ ಅವರ 3 ದಿನಗಳ, 3 ರಾಷ್ಟ್ರಗಳ ಪ್ರವಾಸವು ಅತ್ಯಂತ ಫಲದಾಯಕವಾಗಿದೆ. ಹೂಡಿಕೆ ಮತ್ತು ವ್ಯಾಪಾರ ಒಪ್ಪಂದಗಳು, ಶುದ್ಧ ಇಂಧನಗಳಿಗೆ ಸಂಬಂಧಿಸಿದ ಹೊಸ ಪಾಲುದಾರಿಕೆಗಳು, ಕೌಶಲ್ಯ ಅಭಿವೃದ್ಧಿ ಮತ್ತು ನಾವಿನ್ಯತೆಯ ಸಹಭಾಗಿತ್ವ ಹಾಗೂ ಯುರೋಪ್‌ನ ಪಾಲುದಾರರೊಂದಿಗೆ ಸಹಕಾರ ಬಲಗೊಂಡಿದೆ' ಎಂದಿದ್ದಾರೆ.

ಓದಿ...ಕ್ರೀಡಾಂಗಣದಲ್ಲಿ ಆರ್‌ಸಿಬಿ ಅಭಿಮಾನಿಗೆ ಪ್ರೇಮ ನಿವೇದನೆ ಮಾಡಿದ ಯುವತಿ: ವಿಡಿಯೊ

ಫ್ರಾನ್ಸ್‌ ಭೇಟಿಯ ಬಗ್ಗೆ ಟ್ವೀಟಿಸಿರುವ ಪ್ರಧಾನಿ ಮೋದಿ, 'ನನ್ನ ಫ್ರಾನ್ಸ್‌ ಭೇಟಿಯು ಕಡಿಮೆ ಅವಧಿಯದ್ದಾಗಿತ್ತು. ಆದರೆ, ಅತ್ಯಂತ ಫಲಪ್ರದವಾಗಿದೆ. ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರಾನ್ ಮತ್ತು ನನಗೆ ಹಲವು ವಿಚಾರಗಳ ಬಗ್ಗೆ ಚರ್ಚಿಸಲು ಅವಕಾಶ ಸಿಕ್ಕಿತು. ಆತಿಥ್ಯಕ್ಕೆ ಅವರು ಮತ್ತು ಫ್ರೆಂಚ್‌ ಸರ್ಕಾರಕ್ಕೆ ಧನ್ಯವಾದಗಳನ್ನು ತಿಳಿಸುತ್ತೇನೆ' ಎಂದು ಪ್ರಕಟಿಸಿದ್ದಾರೆ.

ಇದನ್ನೂ ಓದಿ–ಒಳಗೊಳ್ಳುವಿಕೆ, ಸಾಂಸ್ಕೃತಿಕ ವೈವಿಧ್ಯ ಭಾರತೀಯ ಸಮುದಾಯದ ಶಕ್ತಿ: ಪ್ರಧಾನಿ ಮೋದಿ

ವಾರದ ಹಿಂದೆಯಷ್ಟೇ ಎಮ್ಯಾನುಯೆಲ್ ಮ್ಯಾಕ್ರಾನ್ ಅವರು ಫ್ರಾನ್ಸ್‌ ಅಧ್ಯಕ್ಷ ಸ್ಥಾನಕ್ಕೆ ಮರು ಆಯ್ಕೆಯಾಗಿದ್ದಾರೆ. ಉಭಯ ನಾಯಕರು ದ್ವಿಪಕ್ಷೀಯ, ಪರಸ್ಪರ ಹಿತಾಸಕ್ತಿಗಳ ಜೊತೆಗೆ ಪ್ರಾದೇಶಿಕ ಮತ್ತು ಜಾಗತಿಕ ಬೆಳವಣಿಗೆಯ ವಿಷಯಗಳ ಕುರಿತು ಚರ್ಚೆ ನಡೆಸಿದರು. ಎರಡೂ ರಾಷ್ಟ್ರಗಳ ನಿಯೋಗದ ಮಟ್ಟದ ಮಾತುಕತೆಗೂ ಮುನ್ನ ಮ್ಯಾಕ್ರಾನ್‌ ಮತ್ತು ಮೋದಿ ಪರಸ್ಪರ ಚರ್ಚಿಸಿದರು.

ಉಕ್ರೇನ್‌ ಮೇಲೆ ರಷ್ಯಾ ಆಕ್ರಮಣ ಮುಂದುವರಿಸಿರುವ ಸಮಯದಲ್ಲಿ ಪ್ರಧಾನಿ ಮೋದಿ ಅವರ ಯುರೋಪ್‌ ಭೇಟಿ ಮಹತ್ವ ಪಡೆದಿದೆ. ರಷ್ಯಾ ವಿರುದ್ಧ ಯುರೋಪ್‌ನ ರಾಷ್ಟ್ರಗಳು ಒಗ್ಗೂಡಿವೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಮೇ 16ರಂದು ನೇಪಾಳಕ್ಕೆ ಸಂಕ್ಷಿಪ್ತ ಭೇಟಿ ನೀಡಲಿದ್ದಾರೆ.

ಇದನ್ನೂ ಓದಿ–ಉಕ್ರೇನ್‌ನಲ್ಲಿ ಕದನವಿರಾಮ ಘೋಷಿಸಿ: ಪ್ರಧಾನಿ ಮೋದಿ ಕರೆ

ನೇಪಾಳ ಪ್ರಧಾನಿ ಶೇರ್‌ ಬಹದ್ದೂರ್‌ ದೇವುಬಾ ಅವರ ಆಹ್ವಾನದ ಮೇರೆಗೆ ಮೋದಿ ಅವರು ಪಶ್ಚಿಮ ನೇಪಾಳದ ಲುಂಬಿನಿಗೆ ಭೇಟಿ ನೀಡಿ, ಬುದ್ಧಪೂರ್ಣಿಮೆಯಲ್ಲಿ ಪಾಲ್ಗೊಳ್ಳುವರು ಎಂದು ಪ್ರಧಾನಿ ಕಚೇರಿ ಪ್ರಕಟಣೆ ತಿಳಿಸಿದೆ.