ದುಬೈ: ಯೆಮನ್‌ನ ಹೂತಿ ಭಯೋತ್ಪಾದಕರ ಗುಂಪು ತನ್ನತ್ತ ಹಾರಿಸಿದ ಖಂಡಾಂತರ ಕ್ಷಿಪಣಿಯೊಂದನ್ನು ಅರಬ್‌ ಸಂಯುಕ್ತ ಸಂಸ್ಥಾನದ (ಯುಎಇ) ರಕ್ಷಣಾ ಪಡೆಗಳು ತಡೆದು ಹೊಡೆದುರುಳಿಸಿವೆ ಎಂದು ರಕ್ಷಣಾ ಸಚಿವಾಲಯಸೋಮವಾರ ತಿಳಿಸಿದೆ.
ಇಸ್ರೇಲ್‌ನ ಅಧ್ಯಕ್ಷ ಐಸಾಕ್‌ ಹೆರ್ಜಾಗ್ ಅವರ ಐತಿಹಾಸಿಕ ಭೇಟಿಯ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.
ಕ್ಷಿಪಣಿ ದಾಳಿಯಿಂದ ಯಾವುದೇ ಸಾವು ನೋವು ಸಂಭವಿಸಿಲ್ಲ. ಕ್ಷಿಪಣಿಯ ತುಣುಕುಗಳು ವಸತಿ ಪ್ರದೇಶದ ಹೊರಗೆ ಬಿದ್ದಿವೆ.ಕ್ಷಿಪಣಿ ನಾಶಪಡಿಸುವಲ್ಲಿ ಯುಎಇ ರಕ್ಷಣಾ ಪಡೆಗಳು ಮತ್ತು ಒಕ್ಕೂಟದ ಕಮಾಂಡ್‌ಗಳು ಯಶಸ್ವಿಯಾಗಿವೆ ಎಂದು ಸಚಿವಾಲಯವು ಹೇಳಿಕೆಯೊಂದರಲ್ಲಿ ತಿಳಿಸಿದೆ.
ಯೆಮನ್‌ನ ಅಲ್‌ ಜಾಫ್‌ನಲ್ಲಿ ಕ್ಷಿಪಣಿಯನ್ನು ರಾತ್ರಿ 12.50ಕ್ಕೆ (ಸ್ಥಳೀಯ ಕಾಲಮಾನ) ನಾಶಪಡಿಸಲಾಯಿತು ಎಂದು ರಕ್ಷಣಾ ಸಚಿವಾಲಯ ಟ್ವೀಟ್‌ ಮಾಡಿದ್ದು ನಾಶಪಡಿಸುತ್ತಿರುವ ವಿಡಿಯೊವನ್ನು ಸಹ ಹಂಚಿಕೊಂಡಿದೆ.
