ನಿಂಗಪ್ಪ ಮುದೇನೂರು ಅವರ ಕವಿತೆ: ಅರಿವಿನ ಹಾಡ ಬಿತ್ತಲು

 ನೀನು ಹುಟ್ಟುವಾಗ ಹುಟ್ಟಿದ
 ಶಾಂತಿ ಪ್ರೀತಿಯೂ
 ಜೀವಂತ ಶಿಲುಬೆಗೇರುವಾಗಲೇ
 ಮಣ್ಣುಪಾಲಾಯಿತು
 ನಮ್ಮ ಕನಸು ನಿಮ್ಮ ಕನಸು
 ನಮ್ಮೆಲ್ಲರ ಕನಸು
 ಕೊಂದವರ ಕನಸು
 ಮಣ್ಣುಗೂಡಿದವು
 ಅಂದು

 ಬುದ್ಧ ಬಸವ ಗಾಂಧಿ ಅಂಬೇಡ್ಕರ್
 ಸಾಕ್ರೆಟಿಸ್
 ಎಲ್ಲರೂ ಜಗದ ಕುಲುಮೆಯಲ್ಲಿ ಕುದ್ದೇ
 ಬೆಳಕಾದರು
 ಹಸಿರಾದರು ಮತ್ತೆ ಬೇಯಿಸಿದ ಮನಕೇ

 ದನಗಳ ಕೊಟ್ಟಿಗೆಯಲ್ಲೋ
 ಕುರಿದೊಡ್ಡಿಯಲ್ಲೋ ಹುಟ್ಟಿದ ಮಗುವೊಂದು
 ಪ್ರವಾದಿಯಾಗುವುದು, ಸಂತನಾಗುವುದು ಕಡುಕಷ್ಟ
 ಲೋಕದಲ್ಲಿ

 ಕಷ್ಟಗಳನ್ನುಂಡೇ ಎದೆಯೊಡ್ಡಿ ಬೆಳೆಯಬೇಕು ಮರ
 ತಂಪಾಗಬೇಕು
 ಹೂ ಹಣ್ಣು ಬೀಜವಾಗಿ
 ಫಲದ ಗೂಡಾಗಬೇಕು ಮನಕೆ

 ಅವರೆಲ್ಲಾ ಏನಾದರು?
 ವಿಷವನ್ನು ಅಮೃತದಂತೆ, ರಕ್ತವನ್ನು ಹಾಲಿನಂತೆ
 ಹರಿಯಬಿಟ್ಟು ಆ ಹೊಳೆಯಲ್ಲಿಯೇ ಕರಗಿ ನಿಂತರು!
 ‘ನನ್ನ ಶಿಲುಬೆಗೇರಿಸಿದವರ ಕ್ಷಮಿಸು ದೇವರೇ’ಎಂದ ಯೇಸುವೂ ಈಗ ದೇವರಾಗಿ
 ಬಂದು ಜಗದ ಪಾಪಗಳ
 ತೊಳೆಯುತ್ತಿರುವನಂತೆ
 ಎಲ್ಲೆಲ್ಲೂ ಶಾಂತಿ ಪ್ರೀತಿಯ ಹಂಚುತ್ತಿರುವನಂತೆ

 ನಮಗೆ ಯೇಸುವಿನಂತಹ
 ಬುದ್ಧ ಬಸವ ಗಾಂಧಿ ಅಂಬೇಡ್ಕರ್
 ಸಾಕ್ರೆಟಿಸ್‌ರಂತಹ ಮಕ್ಕಳು ಬೇಕು
 ಶಾಂತಿ ಪ್ರೀತಿಯ ಹಂಚಲು
 ಜಾತಿ ಮತ ಧರ್ಮಗಳ ಮೀರಿದ
 ಸಮಸಮಾಜದ ಒಕ್ಕಲಾಗಲು

 ಧೂಳು ಕೊಡವಿ
 ಹೊಸಹೊಸದೆನ್ನುವ
 ದೇಶ ಕೋಶಗಳ ಸುತ್ತಲು
 ಅರಿವಿನ ಹಾಡ ಬಿತ್ತಲು.