ಬರಗೂರು ರಾಮಚಂದ್ರಪ್ಪ ಬರೆದ ಕವಿತೆ: ಏನಾಗುತ್ತಿದೆ ಇಲ್ಲಿ?

ಏನಾಗುತ್ತಿದೆ ಇಲ್ಲಿ ಈ ನಾಡಿನಲ್ಲಿ

. ಚಂದ್ರ ತಾರೆಗಳ ತೋರಿಸಿದ ಬೀಡಿನಲ್ಲಿ

. ಚಂದ್ರ ತಾರೆಗಳು ತಂಗಳಾಗಿ ಉದುರುತ್ತಿವೆ ಉಸಿರು ಕಟ್ಟಿದ ನಿಟ್ಟುಸಿರ ನೆಲದ ಮೇಲೆ ಬೆಳದಿಂಗಳ ಭ್ರಮಿಸಿದ ಭಾವಗಳು ಮಲಗಿವೆ ಸೌದೆಯೊಟ್ಟಿದ ಚಿಂತೆ ಚಿತೆಯ ಮೇಲೆ

. ತೆನೆಯೊಡೆದ ಕನಸುಗಳ ಕರುಳ ಕತ್ತರಿಸಿ ಖಜಾನೆಗಳ ತುಂಬ ತುಂಬಿಸಲಾಗುತ್ತಿದೆ ಕೂಳೆ ಹೊಲದಲ್ಲಿ ಕೂಲಿ ಮಾಡಲು ಬಿಟ್ಟು ನೀರಿಲ್ಲದ ನಾಲೆ ತೋಡಲಾಗುತ್ತಿದೆ

. ಬಡಬಗ್ಗರ ಮಣ್ಣಿನ ಹಣತೆಗೆ ಎಣ್ಣೆಕೊಡದೆ ಬಣ್ಣದ ಭಾಷಣ ಭೋರ್ಗರೆಯುತ್ತಿದೆ ಭಯ ಬಿದ್ದ ಭೂಮಿಯ ಬೆವರು ಹರಿದು ತಳಪಾಯವೇ ತಲ್ಲಣಿಸಿ ನಡುಗುತ್ತಿದೆ

. ಅರಳುತ್ತಿರುವ ಹೂಗಳು ನರಳುತ್ತ ಬೀಳುತ್ತಿವೆ ಕನಸು ಕದ್ದ ಕಳ್ಳ ಕುರ್ಚಿಯ ಕೆಳಗೆ ಆಮ್ಲಜನಕವಿಲ್ಲದ ನರಕದಾರ್ಥಿಕತೆಗೆ ಜೀವಗಳ ಬಲಿ ಕೋಟಿ ಕೊಳಗದ ಒಳಗೆ

. ಚಂದ್ರ ಬೆತ್ತಲೆಯಾಗಿ ಸೂರ್ಯ ಕತ್ತಲೆಯಾಗಿ ಮುಗಿಲು ಅಲ್ಲೋಲ ಕಲ್ಲೋಲವಾಗಿ ನೆಲದ ಮಡಿಲಲ್ಲಿ ಕಡಲು ಕೆಂಡವಾಗಿ ಉರಿದು ಹೋಗುವ ಮುನ್ನ ಎಚ್ಚರಾಗಿ!

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.