ಬಸವರಾಜ ಹೊರಟ್ಟಿ ಆರ್ಎಸ್‌ಎಸ್‌ ಏಜೆಂಟ್!

ಧಾರವಾಡ: ಶುಕ್ರವಾರ ನಡೆದ ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿ­ಕೆಯ ಮೇಯರ್ ಚುನಾ­­ವಣೆ­ಯಲ್ಲಿ ಜೆಡಿಎಸ್‌ ಪಕ್ಷವು ಬಿಜೆಪಿ ಅಭ್ಯರ್ಥಿ­ಯನ್ನು ಬೆಂಬಲಿಸಿದ ಕ್ರಮ­ವನ್ನು ತೀವ್ರವಾಗಿ ಟೀಕಿಸಿ­ರುವ ಜೆಡಿಎಸ್‌ ಮುಖಂಡ ಇಸ್ಮಾಯಿಲ್‌ ತಮಾಟ­ಗಾರ, ಪಕ್ಷದ ಸಂಸದೀಯ ಮಂಡಳಿಯ ಅಧ್ಯಕ್ಷ, ವಿಧಾನ ಪರಿ­ಷತ್‌ ಸದಸ್ಯ ಬಸವರಾಜ ಹೊರಟ್ಟಿ ಅವ­ರನ್ನು ‘ಆರ್‌ಎಸ್‌ಎಸ್‌ ಏಜೆಂಟ್‌’ ಎಂದು ಶನಿವಾರ ಜರೆದಿದ್ದಾರೆ.



‘ಬಿಜೆಪಿಗೆ ಬೆಂಬಲ ನೀಡಿದ್ದರಿಂದ ಲೋಕ­ಸಭಾ ಚುನಾ­ವಣೆಯಲ್ಲಿ ನಮ್ಮ ಅಭ್ಯ­ರ್ಥಿಗೆ ಹಿನ್ನಡೆ­ಯಾಗ­ಲಿದೆ. ಆದರೂ, ಪಕ್ಷದ ಹಿತಾಸಕ್ತಿಯನ್ನು ಬಲಿ­ಕೊಟ್ಟ ಹೊರಟ್ಟಿ, ತಮ್ಮ ಪುತ್ರ ವಸಂತ ಅವರನ್ನು ಪದವೀಧರ ಕ್ಷೇತ್ರದ ಚುನಾ­ವಣೆಯಲ್ಲಿ ಗೆಲ್ಲಿಸುವ ಏಕೈಕ ಉದ್ದೇಶ­ದಿಂದ ಏಕಪಕ್ಷೀಯವಾಗಿ ಬಿಜೆಪಿಯನ್ನು ಬೆಂಬಲಿಸಿ­ದ್ದಾರೆ. ಈ ನಿರ್ಧಾರ ಕೈಗೊಳ್ಳುವ ಮುನ್ನ ನಮ್ಮನ್ನು ಸೌಜ­­ನ್ಯಕ್ಕೂ ಸಂಪರ್ಕಿಸಿಲ್ಲ’ ಎಂದು ಟೀಕಿಸಿದರು.



‘ಶಿವು ಹಿರೇಮಠ ಅವರನ್ನು ಮೇಯರ್‌ ಮಾಡು­ವುದಾದರೆ ಜೆಡಿಎಸ್‌ ಬೆಂಬಲಿಸುತ್ತದೆ ಎಂದು ವಾರದ ಹಿಂದೆಯೇ ಹೊರಟ್ಟಿ ಬಿಜೆಪಿ ಮುಖಂಡ­ರಿಗೆ ಆಶ್ವಾ­ಸನೆ ನೀಡಿದ್ದರು. ಆ ಮೂಲಕ ನನ್ನ ಎದುರಾಳಿಗೆ ಬೆಂಬಲ ನೀಡಿದ್ದಾರೆ. ಇದರಿಂದ ಮುಂದಿನ ಚುನಾ­ವಣೆ­ಯಲ್ಲಿ ಸ್ಪರ್ಧಿಸ­ಲಿರುವ ನಮ್ಮ ಗತಿ ಏನು’ ಎಂದು ಪ್ರಶ್ನಿಸಿದರು.



‘ಪಾಲಿಕೆಯಲ್ಲಿ ಬಿಜೆಪಿಯನ್ನು ಬೆಂಬ­ಲಿಸುವ ಬಗ್ಗೆ ಪಕ್ಷದ ಮುಖಂಡ­ರಾದ ಪಿ.ಸಿ.ಗದ್ದಿಗೌಡರ, ಅಮೃತ ದೇಸಾಯಿ, ತಬ್ರೇಜ್‌ ಸಂಶಿ ಹಾಗೂ ನನ್ನ ಸಲಹೆಯನ್ನು ಹೊರಟ್ಟಿ ಕೇಳಿಲ್ಲ. ಈ ಬಗ್ಗೆ ಪ್ರಶ್ನಿಸಲು ಅವರ ಮನೆಗೆ ಹೋದರೆ ನನ್ನ ಮೇಲೆ ಹಲ್ಲೆ ನಡೆಸಲು ಯತ್ನಿಸಿ­ದ್ದಲ್ಲದೇ, ಅವಾಚ್ಯ ಶಬ್ದಗಳಿಂದ ನಿಂದಿಸಿದರು’ ಎಂದರು.



‘ಸಾಬೀತುಮಾಡಿದರೆ ರಾಜೀನಾಮೆ’

ಇಸ್ಮಾಯಿಲ್‌ ತಮಾಟಗಾರ ಅವರ ಎಲ್ಲ ಆರೋಪಗಳನ್ನು ಅಲ್ಲಗಳೆದಿರುವ ಬಸವರಾಜ ಹೊರಟ್ಟಿ, ‘ಇಸ್ಮಾ­ಯಿಲ್ ಮೇಲೆ ಹಲ್ಲೆ ಮಾಡಲು ಮುಂದಾಗಿದ್ದೆ ಎಂಬುದನ್ನು ಅವರು ಕುರಾನ್‌ ಮುಟ್ಟಿ ಪ್ರಮಾಣ ಮಾಡಲಿ. ತಕ್ಷಣವೇ ನಾನು ಪರಿಷತ್‌ ಸದಸ್ಯತ್ವ ಹಾಗೂ ಪಕ್ಷಕ್ಕೆ ರಾಜೀನಾಮೆ ನೀಡುತ್ತೇನೆ’ ಎಂದು ಸವಾಲೆಸೆದರು.



ಇಸ್ಮಾಯಿಲ್‌ ಮಾಡಿದ ಆರೋಪಗಳ ಬಗ್ಗೆ ದೂರವಾಣಿ ಮೂಲಕ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯೆ ನೀಡಿದ ಹೊರಟ್ಟಿ, ‘ನನಗೆ ಮುಸ್ಲಿಂ ಧರ್ಮದ ಬಗ್ಗೆ ಅಪಾರ ಗೌರವವಿದೆ. ಆದ್ದರಿಂದಲೇ ಆ ಧರ್ಮದ ಪವಿತ್ರ ಗ್ರಂಥ­­ವಾದ ಕುರಾನ್‌ ಮುಟ್ಟಿ ಅವರು ಪ್ರಮಾಣ ಮಾಡಲಿ. ನಾನು ಅದಕ್ಕೆ ಬೆಲೆ ಕೊಟ್ಟು ರಾಜೀನಾಮೆ ಕೊಡು­ತ್ತೇನೆ. ಅವರು ಬೇಕಿದ್ದರೆ ನಿಮ್ಮ (ಮಾಧ್ಯಮದವರ) ಮುಂದೆಯೇ ಪ್ರಮಾಣ ಮಾಡಲಿ’ ಎಂದರು.



‘ಶಿವು ಹಿರೇಮಠ ಅವರನ್ನು ಬೆಂಬಲಿಸುವ ಬಗ್ಗೆ ನಾನು ಯಾವುದೇ ಒತ್ತಡವನ್ನು ಪಕ್ಷದ ಪಾಲಿಕೆ ಸದ­ಸ್ಯರ ಮೇಲೆ ಹಾಕಿಲ್ಲ. ಬೇಕಿದ್ದರೆ ಎಲ್ಲ ಸದಸ್ಯರನ್ನು ಕರೆದುಕೊಂಡು ಧಾರವಾಡಕ್ಕೆ ಬರುತ್ತೇನೆ. ಅವರನ್ನೇ ಕೇಳಿ’ ಎಂದು ಹೇಳಿದರು. ‘ನನ್ನ ಮಗನನ್ನು ಗೆಲ್ಲಿಸುವ ತಾಕತ್ತು ನನಗಿದೆ. ಅದಕ್ಕೆ ಪಕ್ಷವನ್ನು ನಾನು ದುರು­ಪ­ಯೋಗ ಮಾಡಿಕೊಳ್ಳುವುದಿಲ್ಲ. ಕಾಂಗ್ರೆಸ್‌ ಶಾಸಕ ಸಂತೋಷ್‌ ಲಾಡ್‌ ಅವರೊಂದಿಗೆ ಯಾವಾಗಲೂ ಕಾಣಿಸಿ­ಕೊಳ್ಳುವ ಇಸ್ಮಾಯಿಲ್‌ ಜೆಡಿಎಸ್‌ ಪಕ್ಷವನ್ನು ಸಂಘಟಿಸಿದ್ದಾರೆಯೇ ಎಂಬ ಬಗ್ಗೆ ಆತ್ಮವಿಮರ್ಶೆ ಮಾಡಿಕೊಳ್ಳಲಿ’ ಎಂದು ಹೊರಟ್ಟಿ ಹೇಳಿದರು.