ರಾತ್ರಿ 1ರ ತನಕ ಹೋಟೆಲ್, ಬಾರ್‌

ಬೆಂಗಳೂರು: ಮಾಹಿತಿ ತಂತ್ರಜ್ಞಾನ ಸಂಸ್ಥೆಗಳು ಹಾಗೂ ಇತರ ಸಂಘ ಸಂಸ್ಥೆಗಳ ಒತ್ತಡಕ್ಕೆ ಮಣಿದಿರುವ ರಾಜ್ಯ ಸರ್ಕಾರ ಬೆಂಗಳೂರು ನಗರದಲ್ಲಿ ಮಧ್ಯರಾತ್ರಿ 1 ಗಂಟೆ­ವರೆಗೆ ಹೋಟೆಲ್‌, ಬಾರ್‌ ಮತ್ತು ರೆಸ್ಟೋರೆಂಟ್‌ ತೆರೆದಿ­ಡಲು  ಅನುಮತಿ ನೀಡಿದೆ.



ತಿಂಡಿ– ತಿನಿಸು ಸರಬರಾಜು ಮಾಡುವ ಹೋಟೆಲ್‌ಗಳು ವಾರದ ಎಲ್ಲ ದಿನ ತೆರೆಯಬಹುದು. ಆದರೆ ಬಾರ್‌, ರೆಸ್ಟೋರೆಂಟ್‌ ಮತ್ತು ಪಬ್‌ಗಳಿಗೆ ಶುಕ್ರವಾರ, ಶನಿವಾರ ಮಾತ್ರ ರಾತ್ರಿ 1 ಗಂಟೆವರೆಗೆ ತೆರೆಯಲು ಅನುಮತಿ ನೀಡಲಾಗಿದೆ ಎಂದು ಗೃಹ ಸಚಿವ ಕೆ.ಜೆ.ಜಾರ್ಜ್‌ ಶನಿವಾರ ಪತ್ರಿಕಾ ಗೋಷ್ಠಿಯಲ್ಲಿ ತಿಳಿಸಿದರು.



ಈ ವ್ಯವಸ್ಥೆ ಜಾರಿಗೆ ಅಬಕಾರಿ ಇಲಾಖೆ ಒಪ್ಪಿಗೆ ಸೂಚಿಸಿದ್ದು, ನಗರ ಪೊಲೀಸರು ಇನ್ನಷ್ಟೇ ಅಧಿಕೃತ ಆದೇಶ ಹೊರಡಿಸಬೇಕಾಗಿದೆ. ಇದೇ 8ರಿಂದ ಜಾರಿಗೆ ಬರುವ ನಿರೀಕ್ಷೆ ಇದೆ.



‘ಪ್ರಾಯೋಗಿಕವಾಗಿ ಮೂರು ತಿಂಗಳ ಕಾಲ ಈ ವ್ಯವಸ್ಥೆ ಜಾರಿಯಲ್ಲಿರುತ್ತದೆ. ಜನರಿಂದ ಬರುವ ಪ್ರತಿಕ್ರಿಯೆ, ಇದರ ಸಾಧಕ – ಬಾಧಕಗಳನ್ನು ನೋಡಿಕೊಂಡು ಮುಂದಿನ ತೀರ್ಮಾನ ತೆಗೆದುಕೊಳ್ಳಲಾಗುವುದು’ ಎಂದರು.



ದೇಶದ ಇತರ ಮಹಾನಗರಗಳಲ್ಲಿ ಮಧ್ಯರಾತ್ರಿವರೆಗೂ ಹೋಟೆಲ್‌ಗಳು, ಬಾರ್‌, ರೆಸ್ಟೋರೆಂಟ್‌ಗಳು ತೆರೆದಿರು­ತ್ತವೆ. ಬೆಂಗಳೂರು ನಗರದಲ್ಲಿಯೂ ಅಂತಹ ಅವಕಾಶ ಕಲ್ಪಿಸಬೇಕು ಎಂದು ಸಂಘ ಸಂಸ್ಥೆಗಳು, ಮಾಹಿತಿ ತಂತ್ರ­ಜ್ಞಾನ ಕಂಪೆನಿಗಳು ಸರ್ಕಾರವನ್ನು ಒತ್ತಾಯಿಸಿದ್ದವು.

ಬೆಂಗಳೂರು ನಗರದ ಯಶಸ್ಸು ನೋಡಿಕೊಂಡು ಇತರ ಪ್ರಮುಖ ನಗರಗಳಲ್ಲೂ ಬಾರ್‌, ಪಬ್‌, ಹೋಟೆಲ್‌ ಅವಧಿ ವಿಸ್ತರಣೆ ಬಗ್ಗೆ

ತೀರ್ಮಾನಿಸ­ಲಾಗುವುದು

–ಕೆ.ಜೆ. ಜಾರ್ಜ್‌, ಗೃಹ ಸಚಿವ