ಶುಕ್ರವಾರ, ಫೆಬ್ರವರಿ 26, 2021
29 °C

‘ಸೈಕೊ’ ಶಂಕರ್‌ ಸುಳಿವು ನೀಡಿದ್ದ ವ್ಯಕ್ತಿಗೆ ಬಹುಮಾನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

‘ಸೈಕೊ’ ಶಂಕರ್‌ ಸುಳಿವು ನೀಡಿದ್ದ ವ್ಯಕ್ತಿಗೆ ಬಹುಮಾನ

ಬೆಂಗಳೂರು: ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹ­ದಿಂದ ತಪ್ಪಿಸಿಕೊಂಡಿದ್ದ ‘ಸೈಕೊ’ ಶಂಕರ್‌ ಪತ್ತೆಗೆ ಸುಳಿವು ನೀಡಿದ್ದ ಬನಶಂಕರಿ ನಿವಾಸಿ ಅಬ್ದುಲ್‌ ಮುದಾಸಿರ್‌ ಪಾಷಾ ಅವರಿಗೆ ಪೊಲೀಸ್‌ ಇಲಾಖೆ­ಯಿಂದ ₨ 5 ಲಕ್ಷ ಬಹುಮಾನ ವಿತರಿಸಲಾಯಿತು. ನಗರ ಉತ್ತರ ವಿಭಾಗದ ಪೊಲೀ­ಸರು ಮಲ್ಲೇಶ್ವರ ಆಟದ ಮೈದಾನದಲ್ಲಿ ಗುರುವಾರ ಆಯೋಜಿಸಿದ್ದ ಕಳವು ಮಾಲುಗಳನ್ನು ಹಿಂದಿರುಗಿಸುವ ಪರೇ­ಡ್‌­ನಲ್ಲಿ ಸರ್ಕಾರದ ಮುಖ್ಯ ಕಾರ್ಯ­ದರ್ಶಿ ಕೌಶಿಕ್‌ ಮುಖರ್ಜಿ ಅವರು ಬಹುಮಾನದ ಚೆಕ್‌ ವಿತರಿಸಿದರು.



2013ರ ಸೆ.1ರಂದು ‘ಸೈಕೊ’ ಶಂಕರ್‌ ಜೈಲಿನಿಂದ ಪರಾರಿಯಾಗಿದ್ದ. ಆರೋಪಿ ಪತ್ತೆಗೆ ಮಾಹಿತಿ ನೀಡುವ­ವರಿಗೆ ₨ 5 ಲಕ್ಷ ಬಹುಮಾನ ನೀಡುವು­ದಾಗಿ ಸರ್ಕಾರ ಘೋಷಿಸಿತ್ತು. ಮುದಾ­ಸಿರ್‌ ಪಾಷಾ ನೀಡಿದ ಸುಳಿವಿನ ಆಧಾ­ರದ ಮೇಲೆ ಪೊಲೀಸರು ಆತನನ್ನು ಸೆ.6 ರಂದು ಕೂಡ್ಲುಗೇಟ್ ಬಳಿ ಬಂಧಿಸಿದ್ದರು.



ಬಹುಮಾನ ಸ್ವೀಕರಿಸಿ ಮಾತನಾಡಿದ ಮುದಾಸಿರ್‌ ಪಾಷಾ, ‘2012ರಲ್ಲಿ ವರದಕ್ಷಿಣೆ ಕಿರುಕುಳ ಪ್ರಕರಣ­ದಲ್ಲಿ ಜೈಲು ಸೇರಿದ್ದೆ. ಅದೇ ವರ್ಷ ಜಾಮೀನಿನ ಮೇಲೆ ಬಿಡುಗಡೆಯಾ­ಗಿದ್ದೆ. ಜೈಲಿನಲ್ಲಿದ್ದಾಗ ಸೈಕೊ ಶಂಕರ್‌ ಪಕ್ಕದ ಬ್ಯಾರಕ್‌ನಲ್ಲೇ ನಾನು ಇದ್ದೆ. ಆಗ ಆತನ ಪರಿಚಯವಾಗಿತ್ತು. ಆ ಸಂದರ್ಭದಲ್ಲಿ ಆತ ನನ್ನ ಮೊಬೈಲ್‌ ಸಂಖ್ಯೆ ಪಡೆದಿದ್ದ’ ಎಂದು ಹೇಳಿದರು.



‘ಜೈಲಿನಿಂದ ಪರಾರಿಯಾದ ಐದು ದಿನಗಳ ನಂತರ ಆತ ನನ್ನ ಮೊಬೈಲ್‌ಗೆ ಕರೆ ಮಾಡಿದ್ದ. ತಾನು ಕೂಡ್ಲುಗೇಟ್‌ ಬಳಿಯ ಗುಡಿಸಲಿನಲ್ಲಿದ್ದು ಊಟ ಹಾಗೂ ಬೈಕ್‌ ತೆಗೆದುಕೊಂಡು ಬರು­ವಂತೆ ಆತ ತಿಳಿಸಿದ್ದ. ಈ ವಿಷಯವನ್ನು ಕೂಡಲೆ ಪೊಲೀಸರಿಗೆ ತಿಳಿಸಿದೆ’ ಎಂದರು. ಮುದಾಸಿರ್‌ ಪಾಷಾ ಕಟ್ಟಡ ನಿರ್ಮಾಣ ಮೇಲ್ವಿ­ಚಾರಕರಾಗಿ ಕೆಲಸ ಮಾಡುತ್ತಿದ್ದಾರೆ.



ಸಾರ್ವಜನಿಕರ ಸಹಕಾರ ಅಗತ್ಯ: ಕಾರ್ಯ­ಕ್ರಮದಲ್ಲಿ ಮಾತನಾಡಿದ ರಾಜ್ಯ ಸರ್ಕಾರದ ಮುಖ್ಯ ಕಾರ್ಯ­ದರ್ಶಿ ಕೌಶಿಕ್‌ ಮುಖರ್ಜಿ, ‘ಅಪರಾಧ ಪ್ರಕರಣ­ಗಳನ್ನು ತಗ್ಗಿಸಲು ಪೊಲೀಸರು ಸಾರ್ವಜನಿಕರೊಂದಿಗೆ ಸಹಕರಿಸಬೇ­ಕಾದ್ದು ಅಗತ್ಯ. ನಗರದಲ್ಲಿ ಅಪರಾಧ ಪ್ರಕರಣಗಳನ್ನು ತಗ್ಗಿಸಲು ಪೊಲೀಸರು ಸಾಕಷ್ಟು ಶ್ರಮ ಪಡುತ್ತಿದ್ದಾರೆ’ ಎಂದರು.



ನಗರ ಪೊಲೀಸ್‌ ಕಮಿಷನರ್‌ ರಾಘವೇಂದ್ರ ಔರಾದ­ಕರ್‌ ಮಾತನಾಡಿ, ‘ಉತ್ತರ ವಿಭಾಗದ ಪೊಲೀಸರು ಎರಡು ತಿಂಗಳಲ್ಲಿ 178 ಪ್ರಕರಣಗಳನ್ನು ಭೇದಿಸಿ, 107 ಮಂದಿ ಆರೋಪಿಗಳನ್ನು ಬಂಧಿಸಿ ₨ 4.2 ಕೋಟಿ ಮೌಲ್ಯದ ವಸ್ತುಗಳನ್ನು ವಶಪಡಿಸಿ­ಕೊಂಡಿದ್ದಾರೆ’ ಎಂದು ತಿಳಿಸಿದರು. ಆರೋಪಿಗಳಿಂದ ವಶಪಡಿಸಿಕೊಂಡ ವಸ್ತುಗಳನ್ನು ಅವುಗಳ ಮಾಲೀಕರಿಗೆ ಹಿಂದಿರುಗಿಸಲಾಯಿತು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.