ಬುಧವಾರ, ಡಿಸೆಂಬರ್ 2, 2020
25 °C

ಟಾಟಾ ಆಲ್ಟ್ರೋಜ್‌ನ ಹೊಸ ಆವೃತ್ತಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಟಾಟಾ ಮೋಟರ್ಸ್‌ ಕಂಪನಿಯು ತನ್ನ ಪ್ರೀಮಿಯಂ ಹ್ಯಾಚ್‌ಬ್ಯಾಕ್‌ ಆಲ್ಟ್ರೋಜ್‌ನ ಹೊಸ ಆವೃತ್ತಿ ‘ಆಲ್ಟ್ರೋಜ್‌ ಎಕ್ಸ್‌ಎಂ ಪ್ಲಸ್‌’ ಬಿಡುಗಡೆ ಮಾಡಿದೆ. ದೆಹಲಿಯಲ್ಲಿ ಇದರ ಎಕ್ಸ್‌ ಷೋರೂಂ ಬೆಲೆ ₹ 6.6 ಲಕ್ಷ ಇದೆ.

ಪೆಟ್ರೋಲ್‌ ಎಂಜಿನ್‌ನ ಆಲ್ಟ್ರೋಜ್‌ ಎಕ್ಸ್‌ಎಂ ಪ್ಲಸ್‌ 17.78 ಸಿಎಂ ಇರುವ ಟಚ್‌ಸ್ಕ್ರೀನ್‌ ಹೊಂದಿದ್ದು, ಆ್ಯಪಲ್‌ ಕಾರ್‌ಪ್ಲೇ ಮತ್ತು ಆಂಡ್ರಾಯ್ಡ್ ಆಟೊ ಕನೆಕ್ಟಿವಿಟಿಯಂತಹ ಹಲವು ಸೌಲಭ್ಯಗಳನ್ನು ಒಳಗೊಂಡಿದೆ. ವಾಯ್ಸ್‌ ಅಲರ್ಟ್ಸ್‌, ವಾಯ್ಸ್ ಕಮಾಂಡ್‌ ರೆಕಗ್ನಿಷನ್‌, ರಿಮೋಟ್‌ ಫೋಲ್ಡೆಬಲ್‌ ಕೀ ವೈಶಿಷ್ಟ್ಯಗಳನ್ನು ಹೊಂದಿದೆ. ಹೈ ಸ್ಟ್ರೀಟ್‌ ಗೋಲ್ಡ್‌, ಡೌನ್‌ಟೌನ್‌ ರೆಡ್‌, ಅವೆನ್ಯೂ ವೈಟ್‌ ಹಾಗೂ ಮಿಡ್‌ಟೌನ್‌ ಗ್ರೇ ಬಣ್ಣಗಳಲ್ಲಿ ಲಭ್ಯವಿದೆ ಎಂದು ಕಂಪನಿಯು ಪ್ರಕಟಣೆಯಲ್ಲಿ ತಿಳಿಸಿದೆ.

‘ಆಲ್ಟೋಝ್‌ನ ಮೂಲಕ ಫ್ರೀಮಿಯಂ ಹ್ಯಾಚ್‌ಬ್ಯಾಕ್‌ ವಿಭಾಗದಲ್ಲಿ ಸುರಕ್ಷತೆಗೆ ಹೊಸ ಮಾನದಂಡ ಸೃಷ್ಟಿಸಿದ್ದೇವೆ. ಎಕ್ಸ್‌ಎಂ ಪ್ಲಸ್‌ ಆವೃತ್ತಿಯನ್ನು ಪರಿಚಯಿಸುವ ಮೂಲಕ ಆಕರ್ಷಕ ದರದಲ್ಲಿ ಹಲವು ಪ್ರೀಮಿಯಂ ವೈಶಿಷ್ಟ್ಯಗಳನ್ನು ಅನುಭವಿಸುವ ಅವಕಾಶವನ್ನು ಗ್ರಾಹಕರಿಗೆ ನೀಡಿದ್ದೇವೆ’ ಎಂದು ಟಾಟಾ ಮೋಟರ್ಸ್‌ನ ಪ್ರಯಾಣಿಕ ವಾಹನ ವಿಭಾಗದ ಮುಖ್ಯಸ್ಥ ವಿವೇಕ್‌ ಶ್ರೀವಾಸ್ತವ ಹೇಳಿದ್ದಾರೆ.

2020ರ ಜನವರಿಯಲ್ಲಿ ಆಲ್ಟ್ರೋಝ್‌ ಬಿಡುಗಡೆ ಮಾಡುವ ಮೂಲಕ ಪ್ರೀಮಿಯಂ ಹ್ಯಾಚ್‌ಬ್ಯಾಕ್‌ ವಿಭಾಗಕ್ಕೆ ಕಂಪನಿ ಕಾಲಿಟ್ಟಿತು. ಇದರ ಆಕರ್ಷಕ ವಿನ್ಯಾಸ, ಚಾಲನಾ ಅನುಭವ ಮತ್ತು ಸುರಕ್ಷತಾ ದೃಷ್ಟಿಯಿಂದಾಗಿ ಗ್ರಾಹಕರು ಮತ್ತು ಉದ್ಯಮದ ಮೆಚ್ಚುಗೆಗೆ ಪಾತ್ರವಾಗಿದೆ. ಸುರಕ್ಷತೆಗೆ ಸಂಬಂಧಿಸಿದಂತೆ 5 ಸ್ಟಾರ್‌ ಜಿಎನ್‌ಸಿಎಪಿ ಪಡೆದುಕೊಂಡಿದೆ ಎಂದು ಅವರು ತಿಳಿಸಿದ್ದಾರೆ.

ಎಸ್‌ಯುವಿಗೆ ಆದ್ಯತೆ
ದೇಶಿ ವಾಹನ ಮಾರುಕಟ್ಟೆಯಲ್ಲಿ ಎಸ್‌ಯುವಿ ವಿಭಾಗದಲ್ಲಿ ತನ್ನ ವಹಿವಾಟನ್ನು ಬಲಪಡಿಸಿಕೊಳ್ಳಲು ಟಾಟಾ ಮೋಟರ್ಸ್‌ ಮುಂದಾಗಿದೆ.

‘ಭಾರತದಲ್ಲಷ್ಟೇ ಅಲ್ಲದೆ ಜಾಗತಿವಾಗಿಯೂ ಎಸ್‌ಯುವಿ ವಿಭಾಗದತ್ತ ಗಮನ ಹೆಚ್ಚಾಗುತ್ತಿದೆ. 2015ರಲ್ಲಿ ದೇಶಿ ಮಾರುಕಟ್ಟೆಯಲ್ಲಿ ಎಸ್‌ಯುವಿ ಪಾಲು ಶೇ 15ರಷ್ಟಿತ್ತು. ಈ ವರ್ಷ ಶೇ 30ರ ಆಸುಪಾಸಿನಲ್ಲಿದೆ. ಹೀಗಾಗಿ ಎಸ್‌ಯವಿ ವಿಭಾಗದಲ್ಲಿ ಹೆಚ್ಚಿನ ವಾಹನಗಳನ್ನು ಹೊಂದಿದ್ದರೆ ಮಾರುಕಟ್ಟೆ ಪಾಲು ಸಹ ಹೆಚ್ಚಾಗಲಿದೆ’ ಎಂದು ಟಾಟಾ ಮೋಟರ್ಸ್‌ನ ಪ್ರಯಾಣಿಕ ವಾಹನ ವಿಭಾಗದ ಅಧ್ಯಕ್ಷ ಶೈಲೇಶ್‌ ಚಂದ್ರ ಹೇಳಿದ್ದಾರೆ.

‘ನೆಕ್ಸಾನ್‌ ಮತ್ತು ಹ್ಯಾರಿಯರ್‌ ಮಾರಾಟ ಉತ್ತಮವಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಹ್ಯಾರಿಯರ್‌ ಮಾರಾಟದಲ್ಲಿ ಗಮನಾರ್ಹ ಏರಿಕೆ ಕಂಡಿದೆ. ಹಿಂದಿನ ತಿಂಗಳು ನೆಕ್ಸಾನ್‌ ಮಾರಾಟ ಗರಿಷ್ಠ ಮಟ್ಟದಲ್ಲಿತ್ತು. ಈ ಬೆಳವಣಿಗೆಯು ಮುಂದುವರಿಯುವ ವಿಶ್ವಾಸವಿದೆ’ ಎಂದೂ ಅವರು ತಿಳಿಸಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.