ಬಯೋಕಾನ್‌ಗೆ 5ನೇ ಸ್ಥಾನ

ಬೆಂಗಳೂರಿನಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಬಯೋಕಾನ್ ಕಂಪನಿಯು ಫಾರ್ಮಾ ಮತ್ತು ಬಿ.ಟಿ. ವಲಯದ ಕಂಪನಿಗಳ ಪಟ್ಟಿಯಲ್ಲಿ ಐದನೆಯ ಸ್ಥಾನವನ್ನು ಪಡೆದಿದೆ. 2018ರಲ್ಲಿ ಕಂಪನಿಯು ಏಳನೆಯ ಸ್ಥಾನದಲ್ಲಿ, 2019ರಲ್ಲಿ ಆರನೆಯ ಸ್ಥಾನದಲ್ಲಿ ಇತ್ತು.

ವಿಶ್ವದ ಬೇರೆ ಬೇರೆ ದೇಶಗಳ ಒಟ್ಟು 7,600 ಪ್ರತಿನಿಧಿಗಳಿಂದ ಪ್ರತಿಕ್ರಿಯೆಗಳನ್ನು ಪಡೆದುಕೊಂಡಿರುವ ‘ಅತ್ಯುತ್ತಮ ಉದ್ಯೋಗದಾತರ ಸಮೀಕ್ಷೆ’ ಪ್ರಕಾರ, ‘ಉದ್ಯಮದಲ್ಲಿ ಹೊಸತನವನ್ನು ಕಂಡುಕೊಳ್ಳುವ ನಾಯಕತ್ವದ ಗುಣ’, ‘ಸಾಮಾಜಿಕ ಹೊಣೆಗಾರಿಕೆ’ ಮತ್ತು ‘ನಿಷ್ಠಾವಂತ ನೌಕರರನ್ನು ಹೊಂದಿರುವಿಕೆ’ಯನ್ನು ಪರಿಗಣಿಸಿ ತನಗೆ ಈ ಸ್ಥಾನ ಸಿಕ್ಕಿದೆ ಎಂದು ಬಯೋಕಾನ್ ಹೇಳಿದೆ.

ಮಾರ್ಚ್‌ನಿಂದ ಮೇ ತಿಂಗಳ ನಡುವೆ ಸಮೀಕ್ಷೆ ನಡೆದಿದೆ. ‘ನಮ್ಮ ನೌಕರರು ವೃತ್ತಿಯ ವಿಚಾರದಲ್ಲಿ ತೋರಿರುವ ಪ್ರೀತಿಯನ್ನು ಈ ಸಮೀಕ್ಷೆ ಗುರುತಿಸಿದೆ’ ಎಂದು ಬಯೋಕಾನ್‌ನ ಕಾರ್ಯನಿರ್ವಾಹಕ ಅಧ್ಯಕ್ಷೆ ಕಿರಣ್ ಮಜುಂದಾರ್ ಶಾ ಹೇಳಿದ್ದಾರೆ.