ಗುರುವಾರ , ಜನವರಿ 28, 2021
15 °C
ಬೆಳೆಗಾರರ ಮೊಗದಲ್ಲಿ ಮಂದಹಾಸ ಮೂಡಿಸಿದ ಬೆಲೆ

ರಾಶಿ ಅಡಿಕೆ: ₹40 ಸಾವಿರಕ್ಕೆ ಸ್ಥಿರ!

ಗಣಪತಿ ಹೆಗಡೆ Updated:

ಅಕ್ಷರ ಗಾತ್ರ : | |

Prajavani

ಶಿರಸಿ: ಫಸಲು ಕಳೆದ ವರ್ಷಕ್ಕಿಂತ ಕಡಿಮೆಯಾದ ಚಿಂತೆಯಲ್ಲಿದ್ದ ಕೃಷಿಕರಿಗೆ ರಾಶಿ ಅಡಿಕೆ (ಕೆಂಪಡಿಕೆ) ದರ ವಾರದಿಂದ ಪ್ರತಿ ಕ್ವಿಂಟಾಲ್‍ಗೆ ₹40 ಸಾವಿರದ ಆಸುಪಾಸು ಸ್ಥಿರವಾಗಿರುವುದು ಸಮಾಧಾನ ತಂದಿದೆ.

ಜಿಲ್ಲೆಯಲ್ಲಿ ಅಡಿಕೆ ಕೊಯ್ಲು ಅರ್ಧದಷ್ಟು ಮುಗಿದಿದೆ. ಕಳೆದ ಒಂದು ತಿಂಗಳಿನಿಂದ ಮಾರುಕಟ್ಟೆಗೆ ಹೊಸ ಕೆಂಪಡಿಕೆ ಆವಕವಾಗುತ್ತಿದೆ. ಇದರ ಬೆನ್ನಲ್ಲೇ ದರವೂ ಏರಿಕೆಯಾಗುತ್ತಿದೆ.

ಮಳೆಗಾಲದಲ್ಲಿ ಕೊಳೆರೋಗ, ಹಿಡಿಮುಂಡಿಗೆ ರೋಗಬಾಧೆಯಿಂದ ರೈತರು ಹೈರಾಣಾಗಿದ್ದರು. ಈಗ, ಇರುವ ಬೆಳೆಗೆ ಉತ್ತಮ ಬೆಲೆ ಸಿಗಬಹುದು ಎಂದು ನಿಟ್ಟುಸಿರು ಬಿಟ್ಟಿದ್ದಾರೆ. ಚಾಲಿ ಅಡಿಕೆ ಮಾಡುವ ಆಸಕ್ತಿಯಲ್ಲಿದ್ದ ರೈತರು ಕೂಡ ರಾಶಿ ಅಡಿಕೆಯನ್ನೇ ಮಾಡಿ ಮಾರುಕಟ್ಟೆಗೆ ತರುತ್ತಿದ್ದಾರೆ.

ರಾಶಿ ಅಡಿಕೆಗೆ ಕಳೆದ ತಿಂಗಳು ಸರಾಸರಿ ₹ 35 ಸಾವಿರದಿಂದ ರಿಂದ ₹ 38 ಸಾವಿರ ದರವಿತ್ತು. ಹೊಸ ಅಡಿಕೆ ಆವಕವಾದ ದಿನ ₹ 39 ಸಾವಿರದವರೆಗೆ ತಲುಪಿತ್ತು. ಮಾರನೆ ದಿನ ಮತ್ತೆ ಬೆಲೆ ಇಳಿಕೆಯಾಗಿತ್ತು. ಆದರೆ, ಈಗ ಒಂದು ವಾರದಿಂದ ಸರಾಸರಿ ₹40 ಸಾವಿರದ ಆಸುಪಾಸಿನಲ್ಲಿ ಅಡಿಕೆ ವಹಿವಾಟು ನಡೆಯುತ್ತಿದೆ. 

‘ಬೆಳೆ ಪ್ರಮಾಣ ಕಡಿಮೆ ಇದೆ. ಕೂಲಿಕಾರ್ಮಿಕರ ಕೊರತೆಯಿಂದ ಕೆಂಪಡಿಕೆ ಮಾಡುವವರ ಸಂಖ್ಯೆ ಕಡಿಮೆಯಾಗಿದೆ. ಕೊರೊನಾ ಕಾರಣದಿಂದ ಅಡಿಕೆ ದಾಸ್ತಾನು ಹೆಚ್ಚು ಇರಲಿಲ್ಲ. ಇವೆಲ್ಲ ಕಾರಣಕ್ಕೆ ಈಗ ಹೆಚ್ಚು ದರ ಬಂದಿರಬಹುದು’ ಎನ್ನುತ್ತಾರೆ ಶಿರಸಿಯ ಟಿಎಸ್ಎಸ್ ಸಂಸ್ಥೆಯ ಪ್ರಧಾನ ವ್ಯವಸ್ಥಾಪಕ ರವೀಶ ಹೆಗಡೆ.

ಪ್ರತಿ ಬಾರಿ ಬೆಳೆಕೊಯ್ಲು ಆರಂಭದಲ್ಲಿ ಹೆಚ್ಚು ದರ ಸಿಗುತ್ತದೆ. ಆದರೆ, ಸಿದ್ಧ ಅಡಿಕೆ ಮಾರುಕಟ್ಟೆಗೆ ಹೆಚ್ಚು ಬರುತ್ತಿದ್ದಂತೆ ಬೆಲೆ ಇಳಿಕೆಯಾಗುತ್ತಿತ್ತು. ಈಗಿದ್ದ ದರ ಮುಂದುವರೆದರೆ ಕೃಷಿಕರಿಗೆ ಅನುಕೂಲವಾಗಬಹುದು ಎಂದು ಕೃಷಿಕ ರಾಘವೇಂದ್ರ ಹೆಗಡೆ ಹೇಳಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು