ಕೊರೊನಾ ವೈರಸ್ ಲಾಕ್‌ಡೌನ್: ಭಾರತದಲ್ಲಿ 600 ಉದ್ಯೋಗಿಗಳ ವಜಾ ಮಾಡಲಿದೆ ಉಬರ್

ನವದೆಹಲಿ: ಭಾರತದಲ್ಲಿ 600 ಉದ್ಯೋಗಿಗಳನ್ನು ವಜಾ ಮಾಡಲು ಉಬರ್ ಮುಂದಾಗಿದೆ. ಇದು ಕಂಪನಿಯ ಭಾರತದಲ್ಲಿರುವ ಒಟ್ಟು ಉದ್ಯೋಗಿಗಳ ನಾಲ್ಕನೇ ಒಂದರಷ್ಟಾಗಿರಲಿದೆ. ಇದರಲ್ಲಿ ಚಾಲನೆ, ಉದ್ಯಮ ಅಭಿವೃದ್ಧಿ, ಕಾನೂನು, ಹಣಕಾಸು, ನೀತಿ ನಿರೂಪಣೆ ಹಾಗೂ ಮಾರ್ಕೆಟಿಂಗ್ ವಿಭಾಗದವರು ಇರಲಿದ್ದಾರೆ ಎನ್ನಲಾಗಿದೆ.

‘ಕೊರೊನಾ ವೈರಸ್‌ ಅನಿರೀಕ್ಷಿತ ಹೊಡೆತದಿಂದಾಗಿ ಉಬರ್‌ಗೆ ಉದ್ಯೋಗ ಕಡಿತ ಮಾಡುವುದು ಬಿಟ್ಟು ಬೇರೆ ದಾರಿಯಿಲ್ಲ. 600 ಕಾಯಂ ಉದ್ಯೋಗಿಗಳನ್ನು ಕಡಿತ ಮಾಡಲು ನಿರ್ಧರಿಸಲಾಗಿದೆ. ಈ ತಿಂಗಳ ಆರಂಭದಲ್ಲಿ ಘೋಷಿಸಿರುವ ಜಾಗತಿಕ ಉದ್ಯೋಗ ಕಡಿತದಲ್ಲಿ ಇದೂ ಸೇರಿರಲಿದೆ’ ಎಂದು ಉಬರ್ ಇಂಡಿಯಾ ಮತ್ತು ದಕ್ಷಿಣ ಏಷ್ಯಾ ವಿಭಾಗದ ಅಧ್ಯಕ್ಷ ಪ್ರದೀಪ್ ಪರಮೇಶ್ವರನ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.‌

‘ಉಬರ್ ತೊರೆಯುತ್ತಿರುವ ಸಹೋದ್ಯೋಗಿಗಳಿಗೆ ಮತ್ತು ಕಂಪನಿಯಲ್ಲಿರುವ ನಮಗೆಲ್ಲ ಇಂದು ಅತೀವ ದುಃಖದ ದಿನವಾಗಿದೆ. ನಾವೀಗ ಈ ನಿರ್ಧಾರ ಕೈಗೊಂಡಿರುವುದರಿಂದ ಭವಿಷ್ಯವನ್ನು ಆಶಾದಾಯಕವಾಗಿ ನೋಡಬಹುದಾಗಿದೆ’ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಕೊರೊನಾ ಲಾಕ್‌ಡೌನ್‌ ವೇಳೆ ಭಾರತದಲ್ಲಿ 12.2 ಕೋಟಿ ಉದ್ಯೋಗ ನಷ್ಟ: ಸಿಎಂಐಇ

‘ಹೊರಹೋಗುತ್ತಿರುವ ಉದ್ಯೋಗಿಗಳ ಕ್ಷಮೆ ಕೋರುತ್ತೇನೆ. ಉಬರ್‌ಗಾಗಿ ಕೊಡುಗೆ ನೀಡಿದ್ದಕ್ಕೆ ಹೃದಯಾಂತರಾಳದ ಕೃತಜ್ಞತೆ ಸಲ್ಲಿಸುತ್ತಿದ್ದೇನೆ’ ಎಂದು ಅವರು ಹೇಳಿದ್ದಾರೆ.

ಪ್ರತಿಯೊಬ್ಬರಿಗೂ ಕನಿಷ್ಠ 10 ವಾರಗಳ ವೇತನ ಪಾವತಿಸಲಾಗುವುದು. ಮುಂದಿನ 6 ತಿಂಗಳುಗಳಿಗೆ ವೈದ್ಯಕೀಯ ವಿಮೆ, ಹೊರಗುತ್ತಿಗೆ ಬೆಂಬಲ ನೀಡಲಾಗುವುದು. ಅವರ ಬಳಿ ಇರುವ ಲ್ಯಾಪ್‌ಟಾಪ್‌ಗಳನ್ನು ಅವರಲ್ಲೇ ಇಟ್ಟುಕೊಳ್ಳಲು ಅವಕಾಶ ನೀಡಲಾಗುವುದು. ಉಬರ್ ಟ್ಯಾಲೆಂಟ್ ಡೈರೆಕ್ಟರ್‌ಗೆ ಸೇರಲು ಅವಕಾಶ ನೀಡಲಾಗುವುದು ಎಂದೂ ಅವರು ಹೇಳಿದ್ದಾರೆ.