ಬುಧವಾರ, ಸೆಪ್ಟೆಂಬರ್ 30, 2020
20 °C

ಪ್ರಶ್ನೋತ್ತರ| ಪಿಂಚಣಿ ಹಣದ ಮೇಲಿನ ಬಡ್ಡಿಗೆ ತೆರಿಗೆ ವಿನಾಯಿತಿ ಪಡೆಯೋದು ಹೇಗೆ?

ಯು.ಪಿ. ಪುರಾಣಿಕ್ Updated:

ಅಕ್ಷರ ಗಾತ್ರ : | |

ಜಿ.ಸಿ. ಸಿದ್ದಪ್ಪರೆಡ್ಡಿ, ಜವನಗೊಂಡನಹಳ್ಳಿ

ಪ್ರಶ್ನೆ: ನಾನು ಜುಲೈ 2020ಕ್ಕೆ ನಿವೃತ್ತಿಯಾಗಿ, ಬಂದ ₹ 50 ಲಕ್ಷವನ್ನು ಬ್ಯಾಂಕ್‌ನಲ್ಲಿ ಠೇವಣಿ ಇರಿಸಿದ್ದೇನೆ. ನನ್ನ ಆದಾಯ ತೆರಿಗೆ, ಠೇವಣಿಗೆ ಬರುವ ಬಡ್ಡಿಗೆ ಆದಾಯ ತೆರಿಗೆ ವಿನಾಯಿತಿ ಪಡೆಯುವ ಬಗ್ಗೆ ತಿಳಿಸಿ.


ಪುರಾಣಿಕ್‌ 

ಉತ್ತರ: ನೀವು ಪಿಂಚಣಿದಾರರಿರಬಹುದು ಎಂದು ಭಾವಿಸುವೆ. ನೀವು ವಾರ್ಷಿಕವಾಗಿ ಪಡೆಯುವ ಪಿಂಚಣಿ ಹಾಗೂ ಬ್ಯಾಂಕ್‌ ಠೇವಣಿ ಮೇಲಿನ ಬಡ್ಡಿ ಸೇರಿಸಿದಾಗ ನಿಮ್ಮ ಒಟ್ಟು ಆದಾಯ ₹ 5 ಲಕ್ಷ ದಾಟಿದಲ್ಲಿ ನೀವು ₹ 3 ಲಕ್ಷದಿಂದಲೇ ಆದಾಯ ತೆರಿಗೆ ಕೊಡಬೇಕಾಗುತ್ತದೆ. ನಿಮಗಿರುವ ವಿನಾಯಿತಿಗಳು:

1) ಸೆಕ್ಷನ್‌ 16–1ಎ ಆಧಾರದ ಮೇಲೆ ಸ್ಟ್ಯಾಂಡರ್ಡ್‌ ಡಿಡಕ್ಷನ್‌ ₹ 50 ಸಾವಿರ.

2) ಸೆಕ್ಷನ್‌ 80ಟಿಟಿಬಿ ಆಧಾರದ ಮೇಲೆ ಬ್ಯಾಂಕ್‌ ಠೇವಣಿಯಲ್ಲಿ ಗರಿಷ್ಠ ₹ 50 ಸಾವಿರ

3) ಸೆಕ್ಷನ್‌ 80ಸಿ ಆಧಾರದ ಮೇಲೆ 5 ವರ್ಷಗಳ ಬ್ಯಾಂಕ್‌ ಠೇವಣಿ ಅಥವಾ ಅಂಚೆ ಕಚೇರಿ ಹಿರಿಯ ನಾಗರಿಕರ ಠೇವಣಿಯಲ್ಲಿ ವಾರ್ಷಿಕ ಗರಿಷ್ಠ ₹ 1.50 ಲಕ್ಷ.

ಈ ಮೂರು ಅವಕಾಶಗಳನ್ನು ಉಪಯೋಗಿಸಿ ನಿಮ್ಮ ವಾರ್ಷಿಕ ಪಿಂಚಣಿ ಹಾಗೂ ಬಡ್ಡಿ ಆದಾಯದಿಂದ ಕಳೆದಾಗ ಬರುವ ಮೊತ್ತ ₹ 5 ಲಕ್ಷಗಳ ಒಳಗಿದ್ದಲ್ಲಿ ನೀವು ಆದಾಯ ತೆರಿಗೆ ವ್ಯಾಪ್ತಿಗೆ ಬರುವುದಿಲ್ಲ. ನಿವೃತ್ತಿಯಿಂದ ಪಡೆದ ಮೊತ್ತಕ್ಕೆ ಆದಾಯ ತೆರಿಗೆ ಇಲ್ಲವಾದರೂ ಸೆಕ್ಷನ್‌ 10(10ಎಎ) ಆಧಾರದ ಮೇಲೆ ರಜಾ ಸಂಬಳ ನಗದೀಕರಿಸಿದಾಗ ಅದರಲ್ಲಿ ಗರಿಷ್ಠ ₹ 3 ಲಕ್ಷಗಳವರೆಗೆ ಮಾತ್ರ ತೆರಿಗೆ ವಿನಾಯಿತಿ ಇದೆ. ಉಳಿದ ಮೊತ್ತಕ್ಕೆ ತೆರಿಗೆ ಇದೆ. ನೀವು 30–11–2020ರ ಒಳಗಾಗಿ ಐ.ಟಿ ರಿಟರ್ನ್ಸ್‌ ಸಲ್ಲಿಸಿ.

ಸುನೀಲ್‌ ಕುಮಾರ್‌ ಎಚ್‌.ಎಂ. ತೋರಣಗಲ್ಲು

ಪ್ರಶ್ನೆ: ನಾನು ಜೆಎಸ್‌ಡಬ್ಲ್ಯು ಸ್ಟೀಲ್‌ ಲಿಮಿಟೆಡ್‌, ತೋರಣಗಲ್ಲು ಇಲ್ಲಿ ಕೆಲಸ ಮಾಡುತ್ತಿದ್ದೇನೆ. ತಿಂಗಳ ಸಂಬಳ ₹ 40 ಸಾವಿರ. ವೈಯಕ್ತಿಕ ಸಾಲಕ್ಕೆ ₹ 14 ಸಾವಿರ ಇಎಂಐ ಕಟ್ಟುತ್ತಿದ್ದೇನೆ. ನನಗೆ ಮೂರು ವರ್ಷ ವಯಸ್ಸಿನ ಮಗಳಿದ್ದಾಳೆ. ನನ್ನ ಎಲ್‌ಐಸಿ ₹ 3 ಸಾವಿರ, ಎಸ್‌ಎಸ್‌ಎ ₹ 2 ಸಾವಿರ, ಎಪಿವೈ ₹ 900 ಇನ್ನೊಂದು ಎಪಿವೈ ₹ 400, ಎನ್‌ಎಸ್‌ಇ ₹ 5 ಸಾವಿರ, ಪಿಪಿಎಫ್‌ ₹ 1 ಸಾವಿರ. ನನ್ನೊಡನೆ 30X40 ಅಳತೆಯ ಮೂರು ನಿವೇಶನಗಳಿವೆ. ನನ್ನ ಅಭಿಲಾಷೆ ಎಂದರೆ ಮನೆ ಕಟ್ಟಬೇಕು. ನಿವೃತ್ತಿಯ ನಂತರ ಕನಿಷ್ಠ ₹ 30 ಸಾವಿರ ಆದಾಯ ಪಿಂಚಣಿ ರೂಪದಲ್ಲಿ ಪಡೆಯಬೇಕು.

ಉತ್ತರ: ನಿಮ್ಮ ಎಲ್ಲಾ ಉಳಿತಾಯಗಳು ಚೆನ್ನಾಗಿವೆ. ನಿವೇಶನ ಕೊಳ್ಳಲು ವೈಯಕ್ತಿಕ ಸಾಲ ಪಡೆದಂತೆ ಕಾಣುತ್ತಿದೆ. ಇಲ್ಲಿ ಬಡ್ಡಿ ಹೆಚ್ಚಿರಬಹುದು. ಈ ಸಾಲವನ್ನು ಆದಷ್ಟು ಬೇಗ ತೀರಿಸಿ. ಗೃಹ ಸಾಲ ಬೇಕಾದಲ್ಲಿ ಗರಿಷ್ಠ ₹ 20 ಲಕ್ಷ ದೊರೆಯುತ್ತದೆ. ಇಎಂಐ ₹ 20 ಸಾವಿರ ಬರುತ್ತದೆ. ನಿವೇಶನ ಇರುವುದರಿಂದ ಆದಷ್ಟೂ ಬೇಗ ಮನೆ ಕಟ್ಟಿಸಿ. ಮಗಳ ಸಲುವಾಗಿ ಸುಕನ್ಯಾ ಸಮೃದ್ಧಿ ಯೋಜನೆಯಲ್ಲಿ ಸಾಧ್ಯವಾದಷ್ಟು ಹಣ ಉಳಿತಾಯ ಮಾಡಿ. ನೀವು ಬಯಸುವ ಸ್ವಯಂ ಪಿಂಚಣಿ ₹ 30 ಸಾವಿರ ತಿಂಗಳಿಗೆ ಪಡೆಯಲು ₹ 5 ಸಾವಿರ ಪ್ರತಿ ತಿಂಗಳೂ 25 ವರ್ಷ ಸತತವಾಗಿ ಉಳಿತಾಯ ಮಾಡಬೇಕಾಗುತ್ತದೆ. ನಿಮಗೆ ಶುಭ ಹಾರೈಸುತ್ತೇನೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು