ಬಳ್ಳಾರಿ: ಹಳೇ ವಿಮಾನ ನಿಲ್ದಾಣ ಪೈಲಟ್ ತರಬೇತಿ ಶಾಲೆಯಾಗಲಿ

ಸ್ವಾತಂತ್ರ್ಯ ಹೋರಾಟಗಾರ ಮತ್ತು ಮದ್ರಾಸ್ ಪ್ರೆಸಿಡೆನ್ಸಿಯ ‘ನ್ಯಾಯವಾದಿ ಕೇಸರಿ’ ಎಂಬ ಕೀರ್ತಿಗೆ ಪಾತ್ರರಾಗಿದ್ದ, ಬಳ್ಳಾರಿಯವರಾದ ಕೋಲಾಚಲಂ ವೆಂಕಟರಾವ್‌ ಅವರ ಮೊಮ್ಮಗ, ಲೇಖಕ ವೆಂಕಟ್‌ ನಾಗ್‌ ಕೋಲಾಚಲಂ ಅವರು ಬಳ್ಳಾರಿಯ ಹಳೇ ವಿಮಾನ ನಿಲ್ದಾಣವನ್ನು ಪೈಲಟ್‌ ತರಬೇತಿ ಶಾಲೆಯಾಗಿಸಬೇಕು ಎಂಬ ಅಭಿಪ್ರಾಯವನ್ನು ಸಾಮಾಜಿಕ ಮಾಧ್ಯಮ ‘ಎಕ್ಸ್‌’ನಲ್ಲಿ ಇತ್ತೀಚೆಗೆ ಹಂಚಿಕೊಂಡಿದ್ದರು. ಇದಕ್ಕೆ ಹಲವರು ಸಹಮತ ವ್ಯಕ್ತಪಡಿಸಿದ್ದಾರೆ.  

ವೆಂಕಟ್‌ ನಾಗ್‌ ಅವರ ಟ್ವೀಟ್‌ಗೆ ಸಹಮತ ವ್ಯಕ್ತಪಡಿಸಿರುವ ‘ನಮ್ಮ ಬಳ್ಳಾರಿ’ ಎಂಬ ‘ಎಕ್ಸ್‌’ ಖಾತೆ, ‘ವೈಮಾನಿಕ ತರಬೇತಿ  ಶಾಲೆ ಅಥವಾ ಸಂಸ್ಥೆಯನ್ನು ಸ್ಥಾಪಿಸಲು ಬಳ್ಳಾರಿ ಹಳೆ ವಿಮಾನ ನಿಲ್ದಾಣವನ್ನು ಬಳಸಬಹುದು. ಇದು ಉದ್ಯೋಗ, ಆದಾಯ ಸೃಷ್ಟಿಸಲಿದೆ. ಇದರ ಬಗ್ಗೆ ನಿಮ್ಮ ಅಭಿಪ್ರಾಯವೇನು? ವೆಂಕಟ್‌ ನಾಗ್‌ ಕೋಲಾಚಲಂ ನೀಡಿದ ಈ ಕಲ್ಪನೆಯನ್ನು ನಾವು ಬೆಂಬಲಿಸಬಹುದೇ’ ಎಂದು ಪ್ರಶ್ನೆ ಹಾಕಿ, ಅಭಿಪ್ರಾಯ ಸಂಗ್ರಹಕ್ಕೆ ಎಕ್ಸ್‌ನಲ್ಲಿ ‘ಪೋಲಿಂಗ್‌’ ಮಾಡಿತ್ತು.   

ಈ ಪ್ರಶ್ನೆಗೆ ಶೇ 87 ಮಂದಿ ಸಹಮತ ವ್ಯಕ್ತಪಡಿಸಿದ್ದಾರೆ. ಇಂಥದ್ದೊಂದು ತರಬೇತಿ ಸಂಸ್ಥೆ ಬಳ್ಳಾರಿಗೆ ಬರಬೇಕು ಎಂದು ಬಹುತೇಕರು ಅಭಿಪ್ರಾಯಪಟ್ಟಿದ್ದಾರೆ. 

‘ಬಳ್ಳಾರಿಗೆ ಪೈಲಟ್‌ ತರಬೇತಿ ಶಾಲೆ ಬೇಕು. ಈಗಿರುವ ಹಳೆಯ ವಿಮಾನ ನಿಲ್ದಾಣವನ್ನು ಅದಕ್ಕೆ ಬಳಸಿಕೊಳ್ಳಲು ಸಾಧ್ಯವೇ ಎಂಬುದನ್ನು ನಿರ್ಧರಿಸಲು ಕಾರ್ಯಸಾಧ್ಯತಾ ಅಧ್ಯಯನ ನಡೆಸುವಂತೆ ನಾನು ವಿಮಾನಯಾನ ಸಚಿವಾಲಯವನ್ನು ವಿನಂತಿಸುತ್ತೇನೆ’ ಎಂದು ಬರೆದಿದ್ದರು. 

ಅಧ್ಯಯನ ನಡೆಯಬೇಕು: ಬಳ್ಳಾರಿಯ ಹಳೆಯ ವಿಮಾನ ನಿಲ್ದಾಣವು 3,629 ಮೀಟರ್‌ನ ರನ್‌ವೇ ಹೊಂದಿದೆ. ವಾಣಿಜ್ಯ ವಿಮಾನಗಳು ಇಳಿಯಲು ಇದಕ್ಕಿಂತಲೂ ಹೆಚ್ಚು ಉದ್ದನೆಯ ರನ್‌ವೇಗಳು ಬೇಕು. ಆದರೆ, ಭೂಮಿ ಲಭ್ಯವಿಲ್ಲದ ಕಾರಣ ರನ್‌ವೇ ವಿಸ್ತರಣೆಗೆ ಇಲ್ಲಿ ಅವಕಾಶವಿಲ್ಲ. ಆದರೆ, ತರಬೇತಿ ವಿಮಾನಗಳನ್ನು ಹಳೆಯ ವಿಮಾನ ನಿಲ್ದಾಣದ ರನ್‌ವೇನಲ್ಲಿ ಇಳಿಸಬಹುದು. ಹೀಗಾಗಿ, ತರಬೇತಿ ಸಂಸ್ಥೆ ಸ್ಥಾಪಿಸುವ ಪ್ರಸ್ತಾವ ಹೆಚ್ಚು ಕಾರ್ಯಸಾಧ್ಯವಾಗಿದೆ. ಆದರೆ, ಇದಕ್ಕೆ ಅಧ್ಯಯನ ನಡೆಯಬೇಕು ಎಂದು ತಜ್ಞರು ಹೇಳಿದ್ದಾರೆ.