ಆನೇಕಲ್: ತೃತೀಯ ದರ್ಜೆಗಿಳಿದ ಪ್ರಥಮ ದರ್ಜೆ ಕಾಲೇಜು

ಆನೇಕಲ್: ಮಳೆ ಬಂದರೆ ಸೋರುವ ಕೊಠಡಿ, ಪಾಳು ಬಿದ್ದ ಶೌಚಾಲಯ, ನಿರ್ವಹಣೆ, ಭದ್ರತೆ ಇಲ್ಲದ ಮೈದಾನ...

–ಇದು ಆನೇಕಲ್‌ ತಾಲ್ಲೂಕಿನ ಏಕೈಕ ಪ್ರಥಮ ದರ್ಜೆ ಕಾಲೇಜು ಆಗಿರುವ ಡಾ.ಎಸ್‌.ಗೋಪಾಲರಾಜು ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ದುಸ್ಥಿತಿ.

ಕಾಲೇಜು ಪ್ರಥಮ ದರ್ಜೆ ಆದರೂ ಇಲ್ಲಿನ ಸೌಲಭ್ಯಗಳಿಂದ ತೃತೀಯ ದರ್ಜೆಗೆ ಇಳಿದಿದೆ. ಇಲ್ಲಿನ ವಿದ್ಯಾರ್ಥಿ ಕೊರತೆಗಳ ನಡುವೆ ಕಲಿಕೆಯಲ್ಲಿ ತೊಡಗಿದ್ದಾರೆ.

ಡಾ.ಎಸ್‌.ಗೋಪಾಲರಾಜು ಪ್ರಥಮ ದರ್ಜೆ ಕಾಲೇಜು 1984ರಲ್ಲಿ ಆರಂಭವಾಯಿತು. ಅನಿವಾಸಿ ಭಾರತೀಯ ಆನೇಕಲ್‌ನ ಡಾ.ಎಸ್‌.ಗೋಪಾಲರಾಜು ಅವರು ಕಟ್ಟಡವನ್ನು ನಿರ್ಮಿಸಿಕೊಟ್ಟಿದ್ದರಿಂದ ಕಾಲೇಜಿಗೆ ಅವರ ಹೆಸರು ನಾಮಕರಣ ಮಾಡಲಾಯಿತು. ಸಾವಿರಾರು ಮಂದಿ ವಿದ್ಯಾರ್ಥಿಗಳು ಇಲ್ಲಿ ಶಿಕ್ಷಣ ಪಡೆದಿದ್ದಾರೆ. ಬಿ.ಎ, ಬಿ.ಕಾಂ, ಬಿ.ಬಿ.ಎ, ಬಿ.ಸಿ.ಎ ಸೇರಿದಂತೆ ನಾಲ್ಕು ವಿಭಾಗಗಳು ಇಲ್ಲಿವೆ. 400ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಓದುತ್ತಿದ್ದಾರೆ.

ಕಾಲೇಜಿನಲ್ಲಿ ಒಟ್ಟು 12 ಕೊಠಡಿಗಳು ಬಳಕೆ ಬರುತ್ತಿವೆ. ಅದರಲ್ಲಿ ಆರು ಕೊಠಡಿಗಳು ಸುರಿಯುತ್ತಿವೆ. ಇದರಿಂದ ಮಳೆ ಬಂದರೆ ಎರಡೇ ಕೊಠಡಿಯಲ್ಲಿ ಎಲ್ಲ ವಿದ್ಯಾರ್ಥಿಗಳಿಗೆ ಪಾಠ ಮಾಡಲಾಗುತ್ತದೆ.

ಕಟ್ಟಡ ನಿರ್ಮಾಣವಾಗಿ 40 ವರ್ಷ ಕಳೆದಿದ್ದು, ಕಟ್ಟಡ ಶಿಥಿಲವಾಗಿದೆ. ಈ ಕೊಠಡಿಗಳ ದುರಸ್ತಿಯಾಗಬೇಕು. ಕಿಟಕಿಯ ಗಾಜು ಹೊಡೆದು ಹೋಗಿದ್ದು, ವಿಪರೀತ ದೂಳು ಕೊಠಡಿಗೆ ಬರುತ್ತಿದೆ. ಒಟ್ಟಾರೆ ಕಾಲೇಜು ಕಟ್ಟಡ ದುರಸ್ತಿಗೊಳಿಸಿ ಹೈಟೆಕ್‌ ಸ್ಪರ್ಶ ನೀಡಬೇಕೆಂದು ಇಲ್ಲಿನ ಉಪನ್ಯಾಸಕರು ಮತ್ತು ವಿದ್ಯಾರ್ಥಿಗಳು ಒತ್ತಾಯಿಸಿದ್ದಾರೆ.

ಕಾಲೇಜಿನ ಮೈದಾನದಲ್ಲಿ ಹೊಸದಾಗಿ ಕೊಠಡಿಗಳನ್ನು ನಿರ್ಮಿಸಲಾಗಿದೆ. ಆದರೆ ಈ ಕಟ್ಟಡಗಳಿಗೆ ತಡೆಗೋಡೆ ನಿರ್ಮಿಸಿಲ್ಲ. ಹೀಗಾಗಿ ಸಂಜೆ ಆದರೆ ಕುಡುಕರ ತಾಣವಾಗುತ್ತದೆ. ಅನೈತಿಕ ಚಟುವಟಿಕೆ ನಡೆಯುತ್ತಿವೆ. ಜತೆಗೆ ಶ್ವಾನಗಳ ಆವಾಸ ಸ್ಥಾನವು ಆಗಿದೆ. ಹೀಗಾಗಿ ಕಾಲೇಜಿನ ಸುತ್ತ ತಡೆಗೋಡೆ ನಿರ್ಮಿಸಬೇಕು. ಸೂಕ್ತ ಭದ್ರತಾ ವ್ಯವಸ್ಥೆ ಮಾಡಬೇಕು ಎನ್ನುವುದು ವಿದ್ಯಾರ್ಥಿಗಳ ಮನವಿ.

ಕೊಠಡಿಗಳಲ್ಲಿ ಕಲಿಕೆಗೆ ತಕ್ಕಂತೆ ಸುಸಜ್ಜಿತ ಪೀಠೋಪಕರಣ ವ್ಯವಸ್ಥೆ ಇಲ್ಲ. ಹಳೆಯ ಕಾಲದ ಬ್ಲ್ಯಾಕ್‌ ಬೋರ್ಡ್‌ಗಳಿದ್ದು, ಅದರಲ್ಲಿ ಉಪನ್ಯಾಸಕರು ಬರೆದು ಪಾಠ ಮಾಡಲು ಆಗುತ್ತಿಲ್ಲ. ಆಧುನಿಕತೆಗೆ ತಕ್ಕಂತೆ ಗ್ರೀನ್ ಬೋರ್ಡ್‌ ಅಥವಾ ವೈಟ್‌ ಬೋರ್ಡ್‌ ವ್ಯವಸ್ಥೆ ಆಗಬೇಕು. ಸ್ಮಾರ್ಟ್‌ ತರಗತಿ ನಡೆಸಲು ಅಗತ್ಯ ಸೌಲಭ್ಯ ಒದಗಿಸಬೇಕೆಂದು ಉಪನ್ಯಾಸಕರ ಮನವಿ.

ಕಾಲೇಜಿಗೆ ಕಾಯಂ ಗ್ರೂಪ್‌ ಡಿ ನೌಕರರಿಲ್ಲ. ಹೀಗಾಗಿ ಸ್ವಚ್ಛತೆಯ ನಿರ್ವಹಣೆ ಸವಾಲಾಗಿದೆ. ಕಾಲೇಜಿನ ಮುಂಭಾಗದಲ್ಲಿ ಸುತ್ತಮುತ್ತಲ ಪ್ರದೇಶದ ವಾಹನ ನಿಲ್ಲಿಸಲಾಗುತ್ತದೆ. ಕಾಲೇಜಿಗೆ ತಡೆಗೋಡೆ ನಿರ್ಮಿಸಿ ಕಾಲೇಜಿನ ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ಹೊರತುಪಡಿಸಿ ಹೊರಗಿನವರು ಬರದಂತೆ ತಡೆ ಮಾಡಬೇಕು. ಇದಕ್ಕಾಗಿ ಕಾಲೇಜಿನ ಮುಂಭಾಗದಲ್ಲಿಯೇ ಭದ್ರತೆ ವ್ಯವಸ್ಥೆ ಮಾಡಬೇಕು.

ಇತ್ತ ಕಾಲೇಜು ಶಿಕ್ಷಣ ಇಲಾಖೆ ಗಮನಹರಿಸಿ ಸೌಕರ್ಯ ಕಲ್ಪಿಸಿ, ಕಲಿಕೆಗೆ ಪೂರಕ ವಾತಾವರಣ ನಿರ್ಮಿಸಬೇಕೆಂದು ಕಾಲೇಜು ಆಡಳಿತ ವರ್ಗದ ಮತ್ತು ವಿದ್ಯಾರ್ಥಿಗಳು ಒತ್ತಾಯಿಸಿದ್ದಾರೆ.