ಬಿಮ್ಸ್‌ನಲ್ಲಿ ಹಾಸಿಗೆ ಹಂಚಿಕೆಯಲ್ಲಿ ವಂಚನೆ: ಎಂಇಎಸ್ ಆರೋಪ

ಈ ವಿಷಯವಾಗಿ ಸಂಘಟನೆಯ ಮುಖಂಡ ಸದಾನಂದ ಬಾಮನೆ ಅವರು ಬಿಮ್ಸ್‌ ನಿರ್ದೇಶಕ ಡಾ.ವಿನಯ್ ದಾಸ್ತಿಕೊಪ್ಪ ಅವರೊಂದಿಗೆ ವಾದ ನಡೆಸಿರುವ ಆಡಿಯೊ ಹಾಗೂ ಶುಭಂ ಶೆಳಕೆ ಅವರು ಕೆಲವರೊಂದಿಗೆ ಆಸ್ಪತ್ರೆಯ ವಾರ್ಡ್‌ಗಳಿಗೆ ನುಗ್ಗಿ ಪರಿಶೀಲಿಸಿದ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಶನಿವಾರ ವೈರಲ್ ಆಗಿದೆ.

ವಾರ್ಡ್‌ ಒಂದನ್ನು ಪ್ರವೇಶಿಸುವ ಶುಭಂ, ‘50ಕ್ಕೂ ಹೆಚ್ಚು ಹಾಸಿಗೆಗಳು ಖಾಲಿ ಇವೆ. ಆದರೆ, ಕೊಡದೆ ಜನಸಾಮಾನ್ಯರಿಗೆ ತೊಂದರೆ ಕೊಡಲಾಗುತ್ತಿದೆ’ ಎಂದು ದೂರುವ ದೃಶ್ಯ ವಿಡಿಯೊದಲ್ಲಿದೆ. ಹಾಸಿಗೆಗಳ ಬಳಿ ಆಮ್ಲಜನಕ ವ್ಯವಸ್ಥೆ ಇದೆಯೇ ಎನ್ನುವುದನ್ನು ಉಪಕರಣಗಳನ್ನು ಆನ್ ಮಾಡಿ ಪರಿಶೀಲಿಸುವುದು ಕೂಡ ವಿಡಿಯೊದಲ್ಲಿದೆ. ಅದನ್ನು ಎಂಇಎಸ್‌ ಬೆಂಬಲಿಗರು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ.

ಸಂಘಟನೆಯೊಂದರ ಕಾರ್ಯಕರ್ತರು ಆಸ್ಪತ್ರೆಯ ವಾರ್ಡ್‌ಗಳನ್ನು ಪ್ರವೇಶಿಸಿ ವಿಡಿಯೊ ಮಾಡುವುದಕ್ಕೆ ಅಲ್ಲಿನ ಅಧಿಕಾರಿಗಳು ಮತ್ತು ಸಿಬ್ಬಂದಿಯು ಅವಕಾಶ ಕೊಟ್ಟಿರುವುದು ಅಚ್ಚರಿಗೆ ಕಾರಣವಾಗಿದೆ.

ಈ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ಬಿಮ್ಸ್‌ ನಿರ್ದೇಶಕ ಡಾ.ವಿನಯ್, ‘ಆಸ್ಪತ್ರೆಯಲ್ಲಿ ಆಮ್ಲಜನಕ ಸೌಲಭ್ಯವುಳ್ಳ ಹಾಸಿಗೆಗಳು ಖಾಲಿ ಇಲ್ಲ. ಈ ವಿಷಯವನ್ನು ಅವರಿಗೆ ತಿಳಿಸಿದ್ದೇನೆ. ಅವರು ಅನಧಿಕೃತವಾಗಿ ವಾರ್ಡ್‌ಗೆ ಹೋಗಿ, ಆಮ್ಲಜನಕ ಸೌಲಭ್ಯವಿಲ್ಲದ ಹಾಗೂ ವಿವಿಧ ಕಾರಣಗಳಿಂದ ಬಳಸಲಾಗದೆ ಇರುವ ಹಾಸಿಗೆಗಳ ಬಳಿ ನಿಂತು ವಿಡಿಯೊ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ. ಈ ವಿಷಯದಲ್ಲಿ ಮುಂದಿನ ಕ್ರಮಕ್ಕಾಗಿ ಜಿಲ್ಲಾಧಿಕಾರಿ ಅವರ ಗಮನಕ್ಕೆ ತರಲಾಗಿದೆ. ಹೇಗೆ ಪ್ರವೇಶ ಕೊಟ್ಟಿರಂದು ಭದ್ರತಾ ಸಿಬ್ಬಂದಿಗೆ ಎಚ್ಚರಿಕೆ ನೀಡಲಾಗಿದೆ’ ಎಂದು ತಿಳಿಸಿದರು.