ಹುಕ್ಕೇರಿ | ಶೇ 67.54 ಮತದಾನ; ಫಲಿತಾಂಶಕ್ಕೆ ಕಾತರ

ದೇಶದಲ್ಲೇ ಅತ್ಯಂತ ವಿಶಿಷ್ಟವಾದ ಹುಕ್ಕೇರಿ ಗ್ರಾಮೀಣ ವಿದ್ಯುತ್ ಸಹಕಾರ ಸಂಘದಲ್ಲಿ ಈ ಬಾರಿ ರಾಜಕೀಯ ಜಿದ್ದಾಜಿದ್ದಿ ಹೆಚ್ಚಾಗಿದೆ. ಹಲವು ವರ್ಷಗಳಿಂದ ರಮೇಶ ಕತ್ತಿ ಹಾಗೂ ಅವರ ಕುಟುಂಬದ ನೇತೃತ್ವದಲ್ಲೇ ನಡೆಯುತ್ತಿದ್ದ ಈ ಸಂಘಕ್ಕೆ ಇದೇ ಮೊದಲ ಬಾರಿಗೆ ಜಾರಕಿಹೊಳಿ ಹಾಗೂ ಜೊಲ್ಲೆ ಕುಟುಂಬದವರು ಪ್ರವೇಶ ಕೊಟ್ಟಿದ್ದಾರೆ. ಬಿಡಿಸಿಸಿ ಬ್ಯಾಂಕಿನಲ್ಲಿ ಭುಗಿಲೆದ್ದ ಈ ಮೇಲಾಟ ಸಹಾಕರ ಸಂಘಕ್ಕೂ ವ್ಯಾಪಿಸಿದೆ. ಕಳೆದೊಂದು ತಿಂಗಳಿಂದ ಸಚಿವ ಸತೀಶ ಜಾರಕಿಹೊಳಿ ಶಾಸಕ ಬಾಲಚಂದ್ರ ಜಾರಕಿಹೊಳಿ ಮಾಜಿ ಸಂಸದ ಅಣ್ಣಾಸಾಹೇಬ ಜೊಲ್ಲೆ ಹುಕ್ಕೇರಿ ತಾಲ್ಲೂಕಿನಲ್ಲೇ ಠಿಕಾಣೆ ಹೂಡಿದ್ದಾರೆ. ತಾವ್ಯಾರಿಗೂ ಕಮ್ಮಿ ಇಲ್ಲ ಎಂಬಂತೆ ಸೆಡ್ಡು ಹೊಡೆದ ಮಾಜಿ ಸಂಸದ ಡಿಸಿಸಿ ಬ್ಯಾಂಕ್ ಮಾಜಿ ಅಧ್ಯಕ್ಷರೂ ಆದ ರಮೇಶ ಕತ್ತಿ ಶಾಸಕ ನಿಖಿಲ್‌ ಕತ್ತಿ ಸೇರಿದಂತೆ ಇಡೀ ಕತ್ತಿ ಪರಿವಾರವೂ ಇದಕ್ಕೆ ಸನ್ನದ್ಧವಾಗಿದೆ. ಅಷ್ಟರಮಟ್ಟಿಗೆ ಬಿಡಿಸಿಸಿ ಚುನಾವಣೆ ಹಾಗೂ ವಿದ್ಯುತ್ ಸಂಘದ ಚುನಾವಣೆಗಳೂ ರಾಜ್ಯದ ಗಮನ ಸೆಳೆದಿವೆ.