ಬೆಳಗಾವಿ | ವರುಣನ ಅಬ್ಬರ: ಆರಂಭದಲ್ಲೇ ಅವಾಂತರ

ಮಳೆಗಾಲದಲ್ಲಿ ಸ್ಥಳೀಯ ದೂರುಗಳಿಗೆ ಸ್ಪಂದಿಸಲು ಮಹಾನಗರ ಪಾಲಿಕೆ ಕಚೇರಿಯಲ್ಲಿ ಸಹಾಯವಾಣಿ ಕೇಂದ್ರ ತೆರೆಯಲಾಗಿದೆ. ಮಳೆಗೆ ಸಂಬಂಧಿಸಿ ಏನೇ ದೂರುಗಳಿದ್ದರೂ 0831–2405337 ಈ ಸಂಖ್ಯೆಗೆ ಕರೆ ಮಾಡಬಹುದು. ‘ಮಳೆ ಸುರಿದಾಗ ಪ್ರತಿದಿನ ಸರಾಸರಿ 10 ಕರೆ ಬರುತ್ತಿವೆ. ಚರಂಡಿಗಳು ಬ್ಲಾಕ್‌ ಆಗಿ ರಸ್ತೆ ಮೇಲೆ ಕೊಳಚೆ ನೀರು ಹರಿಯುವ ಬಗ್ಗೆಯೇ ಜನ ಹೆಚ್ಚಾಗಿ ದೂರುತ್ತಿದ್ದಾರೆ. ದೂರು ಬಂದ ಸ್ಥಳಕ್ಕೆ ಕೂಡಲೇ ಸಿಬ್ಬಂದಿ ಕಳುಹಿಸಿ ಸಮಸ್ಯೆ ಇತ್ಯರ್ಥಪಡಿಸಲಾಗುತ್ತಿದೆ’ ಎಂದು ಸಹಾಯವಾಣಿ ಕೇಂದ್ರದ ಸಿಬ್ಬಂದಿ ಹೇಳಿದರು.

ಬೆಳಗಾವಿಯ ವಡಗಾವಿಯ ಆನಂದ ನಗರದ ಮನೆಗಳಿಗೆ ಶನಿವಾರ ರಾತ್ರಿ ನೀರು ನುಗ್ಗಿದ್ದರಿಂದ ಜನರು ಪ್ರಯಾಸ ಪಡಬೇಕಾಯಿತು. ‘ಆನಂದ ನಗರದ ನಾಲೆ ಅತಿಕ್ರಮಣವಾಗಿದೆ. ನೀರು ಹರಿಯಬೇಕಿದ್ದ ಜಾಗದಲ್ಲಿ ತಗಡಿನ ಶೆಡ್‌ ತಲೆ ಎತ್ತಿದ್ದು, ಮಳೆನೀರು ನ‌ಮ್ಮ ಮನೆಗಳಿಗೆ ನುಗ್ಗುತ್ತಿದೆ. ಯಾರೋ ಮಾಡಿದ ತಪ್ಪಿನಿಂದ ನಾವು ಶಿಕ್ಷೆ ಅನುಭವಿಸುವಂತಾಗಿದೆ. ಪಾಲಿಕೆ ಅಧಿಕಾರಿಗಳು ಕೂಡಲೇ ಅತಿಕ್ರಮಣ ತೆರವಿಗೆ ಮುಂದಾಗಬೇಕು’ ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.