Bengaluru Lit Fest | ಮುಸ್ಲಿಮರಲ್ಲೂ ಜಾತಿಗಳಿವೆ: ಲೇಖಕ ಮುಜಾಫರ್ ಅಸಾದಿ
ಬೆಂಗಳೂರು: ‘ಮುಸ್ಲಿಮರಲ್ಲೂ ಜಾತಿ ಶ್ರೇಣಿಕೃತ ವ್ಯವಸ್ಥೆ ಇದೆ. ಇದನ್ನು ಅವಗಣನೆ ಮಾಡಲು ಸಾಧ್ಯವಿಲ್ಲ’ ಎಂದು ಲೇಖಕ ಮುಜಾಫರ್ ಅಸ್ಸಾದಿ ಅಭಿಪ್ರಾಯಪಟ್ಟರು.
ನಗರದಲ್ಲಿ ಭಾನುವಾರ ನಡೆದ ಬೆಂಗಳೂರು ಸಾಹಿತ್ಯೋತ್ಸವದಲ್ಲಿ ‘ಅಲ್ಪಸಂಖ್ಯಾತರು ಮತ್ತು ಜಾತಿ ವ್ಯವಸ್ಥೆ’ ವಿಚಾರ ಗೋಷ್ಠಿಯಲ್ಲಿ ಪತ್ರಕರ್ತ ವಿಕಾರ್ ಅಹಮದ್ ಸಯೀದ್ ಅವರು ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸಿದ ಅವರು, ಭಾರತದ ಮುಸ್ಲಿಮರಲ್ಲಿ ಮೇಲ್ಜಾತಿ, ಕೆಳಜಾತಿ ಮತ್ತು ಹಿಂದುಳಿದ ಜಾತಿ ಎಂಬ ಮೂರು ವರ್ಗೀಕರಣವಿದೆ. ಕರ್ನಾಟಕಕ್ಕೆ ಸಂಬಂಧಿಸಿದ ವಸಾಹತುಶಾಹಿ ದಾಖಲೆಗಳು (ಬಾಂಬೆ ಮತ್ತು ಮದ್ರಾಸ್ ಪ್ರೆಸಿಡೆನ್ಸಿ, ಕೂರ್ಗ್ ಮುಖ್ಯ ಕಮಿಷನರೇಟ್) ಮುಸ್ಲಿಮರಲ್ಲಿನ ಜಾತಿಗಳನ್ನು ದಾಖಲಿಸಿವೆ ಎಂದರು.
ವಸಾಹತುಶಾಹಿಯ ಪೂರ್ವದಲ್ಲಿ ಜಾತಿಗೆ ಸಂಬಂಧಿಸಿದ ಯಾವುದೇ ದಾಖಲಾತಿ ಇರಲಿಲ್ಲ. ಆದರೆ, ಬ್ರಿಟಿಷರು ಭಾರತಕ್ಕೆ ಬಂದ ಮೇಲೆ ನಡೆಸಿದ ಜನಗಣತಿಯಲ್ಲಿ ಮುಸ್ಲಿಮರ ಜಾತಿ ವ್ಯವಸ್ಥೆಯ ಬಗ್ಗೆ ದಾಖಲಿಸಲಾಗಿದೆ. ಹಿಂದೂಗಳ ಮೇಲೆ ಹಿಡಿತವನ್ನು ಸಾಧಿಸುವ ಗುರಿ ಹೊಂದಿದ್ದ ಬ್ರಿಟಿಷರು ಮುಸ್ಲಿಮರ ಮೇಲೂ ಹಿಡಿತ ಸಾಧಿಸಬಯಸಿದ್ದರು. ಅದರ ಭಾಗವಾಗಿಯೇ ಈ ಸಮುದಾಯದಲ್ಲಿ ಜಾತಿ ಶ್ರೇಣೀಕರಣವನ್ನು ದಾಖಲಿಸಿದ್ದರು ಎಂದು ಹೇಳಿದರು.
ಇಂದಿನ ಮೀಸಲಾತಿ ಸಂದರ್ಭದಲ್ಲಿ ಮುಸ್ಲಿಮರು ತಮ್ಮೊಳಗಿನ ಜಾತಿಗಳನ್ನು ಅವಗಣನೆ ಮಾಡಬಾರದು. ಹಾಗೆ ಮಾಡಿದರೆ ಈ ಸಮುದಾಯವು ಧಾರ್ಮಿಕ ಗುಂಪಾಗಿ ಗುರುತಾಗುತ್ತದೆ. ಧರ್ಮ ಬೇರೆಯಾಗಿದ್ದರೂ ಮುಸ್ಲಿಮರಲ್ಲಿನ ಜಾತಿಗಳು ಭಾರತೀಯತೆಯಿಂದಲೇ ರೂಪುಗೊಂಡಿವೆ ಎಂಬುದನ್ನು ನಿರಾಕರಿಸಲಾಗದು. ಮುಸ್ಲಿಮರು ಜಾತಿಯ ಹಕ್ಕನ್ನು ಪಡೆಯಬೇಕು ಎಂದು ಅಭಿಪ್ರಾಯಪಟ್ಟರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.