ಜನವಾಡ: ಡಿಜಿಟಲ್ ಗ್ರಂಥಾಲಯಕ್ಕಿಲ್ಲ ಅಂತರ್ಜಾಲ

ಕೇಂದ್ರದಲ್ಲಿ ಅಳವಡಿಸಿದ ನಾಲ್ಕು ಕಂಪ್ಯೂಟರ್‌ಗಳಲ್ಲಿ ಒಂದಕ್ಕೂ ಇಂಟರ್ನೆಟ್ ಸಂಪರ್ಕ ಕೊಡಲಾಗಿಲ್ಲ. ಶಿಕ್ಷಣಕ್ಕೆ ಸಂಬಂಧಿಸಿದ ಆ್ಯಪ್ ಬಳಸಲು ಮಕ್ಕಳಿಗೆ ಕೊಡಲಾಗಿದ್ದ ಎರಡು ಮೊಬೈಲ್‍ಗಳಲ್ಲಿ ಒಂದು ಕಳವು ಆಗಿದೆ. ಏಳು ತಿಂಗಳಿಂದ ಗ್ರಂಥಾಲಯಕ್ಕೆ ದಿನಪತ್ರಿಕೆಗಳೂ ಬರುತ್ತಿಲ್ಲ. ಹೀಗಾಗಿ ಡಿಜಿಟಲ್ ಲೈಬ್ರರಿ ಬಳಕೆಗಾಗಿ ಕೇಂದ್ರಕ್ಕೆ ಕೂಡಲೇ ಇಂಟರ್‌ನೆಟ್‌ ಸಂಪರ್ಕ ಕಲ್ಪಿಸಬೇಕು ಎಂದು ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಘಾಳೆಪ್ಪ ಚಟ್ನಳ್ಳಿ ಒತ್ತಾಯಿಸಿದ್ದಾರೆ.

8 ಸಾವಿರ ಪುಸ್ತಕ: ಕೇಂದ್ರದಲ್ಲಿ ನಾಲ್ಕು ಕಂಪ್ಯೂಟರ್, ಒಂದು ಟಿವಿ, ಮೊಬೈಲ್, ಎಂಟು ಸಾವಿರ ಪುಸ್ತಕಗಳು ಇವೆ ಎಂದು ತಿಳಿಸುತ್ತಾರೆ ಗ್ರಂಥಪಾಲಕ ತುಳಜಪ್ಪ ಮಾಲೇಕಾರ್. ‘ಇಂಟರ್‌ನೆಟ್‌ ಸಂಪರ್ಕಕ್ಕೆ ಸಂಬಂಧಿಸಿದಂತೆ ಪಂಚಾಯಿತಿಯವರ ಗಮನ ಸೆಳೆಯಲಾಗಿದೆ. ಎರಡು ಮೊಬೈಲ್‍ಗಳ ಪೈಕಿ ಒಂದು ಮೊಬೈಲ್ ಕಳುವಾದ ಬಗ್ಗೆ ಠಾಣೆಗೆ ದೂರು ಕೊಡಲಾಗಿದೆ’ ಎಂದು ತಿಳಿಸಿದರು.

‘ನಾಲ್ಕು ವರ್ಷದಿಂದ ಸ್ವತಃ ದಿನಪತ್ರಿಕೆಗಳ ಬಿಲ್ ಪಾವತಿಸುತ್ತಾ ಬಂದಿರುವೆ. ಅಲ್ಪಸಂಬಳ ಇರುವ ಕಾರಣ ಕೈಯಿಂದ ದಿನಪತ್ರಿಕೆ ಹಣ ಕೊಡಲು ಆಗುತ್ತಿಲ್ಲ. ಹೀಗಾಗಿ 2023ರ ಜೂನ್‍ನಿಂದ ಗ್ರಂಥಾಲಯಕ್ಕೆ ದಿನಪತ್ರಿಕೆ ಬರುತ್ತಿಲ್ಲ’ ಎಂದು ತಿಳಿಸಿದರು.

ಸುಸಜ್ಜಿತ ಕಟ್ಟಡ: ಚಟ್ನಳ್ಳಿ ಡಿಜಿಟಲ್ ಲೈಬ್ರರಿ ಕಟ್ಟಡ ತಾಲ್ಲೂಕಿನ ಗ್ರಂಥಾಲಯಗಳ ಸುಸಜ್ಜಿತ ಕಟ್ಟಡಗಳಲ್ಲಿ ಒಂದಾಗಿದೆ. ಕಟ್ಟಡಕ್ಕೆ ಸೀಲಿಂಗ್ ಮಾಡಲಾಗಿದೆ. ವಿದ್ಯುತ್ ದೀಪ, ಫ್ಯಾನ್ ಅಳವಡಿಸಲಾಗಿದೆ. ಕೆಳಗಡೆ ಮ್ಯಾಟ್ ಹಾಸಲಾಗಿದೆ. ಗೋಡೆಗಳ ಮೇಲೆ ಬಿಡಿಸಿದ ಸ್ವಾಮಿ ವಿವೇಕಾನಂದ, ಮಹಾತ್ಮ ಗಾಂಧೀಜಿ, ಡಾ.ಬಿ.ಆರ್.ಅಂಬೇಡ್ಕರ್, ಎ.ಪಿ.ಜೆ. ಅಬ್ದುಲ್ ಕಲಾಂ ಚಿತ್ರಗಳು ಗಮನ ಸೆಳೆಯುತ್ತಿವೆ. ಕೇಂದ್ರದಲ್ಲಿ ಓದುಗರಿಗಾಗಿ ರೌಂಡ್ ಟೇಬಲ್ ಹಾಗೂ 28 ಕುರ್ಚಿಗಳು ಇವೆ.