ಗುಂಡ್ಲುಪೇಟೆ | ಮಳೆ ಕೊರತೆ: ವರ್ಷದ ಹಿಂದೆ ತುಂಬಿದ್ದ ಕೆರೆಗಳೆಲ್ಲ ಭಣ ಭಣ

2022ರಲ್ಲಿ ನವೆಂಬರ್‌ ಕೊನೆಯವೆಗೂ ಮಳೆಯಾಗಿ, ತಾಲ್ಲೂಕು ವ್ಯಾಪ್ತಿಯ ದೊಡ್ಡ ಕೆರೆ ಕಟ್ಟೆಗಳು ಭರ್ತಿಯಾಗಿ ಕೋಡಿ ಬಿದ್ದಿದ್ದವು. ಕಳೆದ ವರ್ಷ ಮುಂಗಾರು ಮತ್ತು ಹಿಂಗಾರು ಅವಧಿಯಲ್ಲಿ ಮಳೆ ಕೊರತೆಯಾಗಿರುವುದರಿಂದ ಕೆರೆಗಳು ಭರ್ತಿಯಾಗಿರಲಿಲ್ಲ. 

ಹೊಸ ವರ್ಷದ ಮೊದಲ ತಿಂಗಳಿನಲ್ಲಿಯೇ ಜಲಮೂಲಗಳು ಬರಿದಾಗಿರುವುದರಿಂದ ಈ ಬಾರಿ ಜಾನುವಾರುಗಳಿಗೆ ನೀರಿನ ಕೊರತೆಯಾಗುವ ಸಾಧ್ಯತೆ ಗೋಚರಿಸುತ್ತಿದೆ. 

ತಾಲ್ಲೂಕಿನ ಕೆಲವು ಗ್ರಾಮಗಳಲ್ಲಿ ರೈತರ ಕೊಳವೆಬಾವಿಗಳಲ್ಲಿ ನೀರು ಕಡಿಮೆಯಾಗಿದೆ. ಕಳೆದ ವರ್ಷ ಕೆರೆಗಳಲ್ಲಿ ನೀರು ಇದ್ದುದರಿಂದ ಅಂತರ್ಜಲ ಮಟ್ಟ ಏರಿಕೆಯಾಗಿ ನಿಷ್ಕ್ರಿಯವಾಗಿದ್ದ ಕೊಳವೆ ಬಾವಿಗಳಲ್ಲೂ ನೀರು ಬಂದಿತ್ತು. ನೀರಿನ ಕೊರತೆ ಕಾರಣಕ್ಕೆ ವ್ಯವಸಾಯ ನಿಲ್ಲಿಸಿದ್ದ ಅನೇಕ ರೈತರು ಕೃಷಿ ಮಾಡಲು ಆರಂಭಿಸಿದ್ದರು.

ಈ ವರ್ಷ ಮಳೆ ಕೊರತೆಯಿಂದ ಅನೇಕ ಬೆಳೆಗಳಲ್ಲಿ ಇಳುವರಿ ಕುಂಠಿತವಾಗಿದೆ. ಮಳೆ ನಂಬಿ ವ್ಯವಸಾಯ ಮಾಡಿದ್ದವರಿಗೆ ಸಾಲ ಹೆಗಲೇರಿದೆ. ಜೂನ್ ತಿಂಗಳಲ್ಲಿ ಮಳೆಯಾಗುತ್ತದೆ ಎಂಬ ನಿರೀಕ್ಷೆಯಲ್ಲಿ ಮಳೆ ನಂಬಿ ಅನೇಕರು ತರಕಾರಿ ಬೆಳೆಯಲು ನಿರ್ಧಾರ ಮಾಡಿ ಆಲೂಗಡ್ಡೆ, ಬೀಟ್‌ರೂಟ್‌ ಬಿತ್ತನೆ ಮಾಡಿದ್ದರು. ಮಳೆ ಕೈ ಕೊಟ್ಟಿದ್ದರಿಂದಾಗಿ ಅನೇಕರಿಗೆ ಬೆಳೆ ಕೈ ಸೇರಿರಲಿಲ್ಲ.

‘ತಾಲ್ಲೂಕಿನಲ್ಲಿ ವಾರ್ಷಿಕವಾಗಿ 79.2 ಸೆಂ.ಮೀ ವಾಡಿಕೆ ಮಳೆಯಾಗುತ್ತದೆ. 2022ರಲ್ಲಿ 100.51 ಸೆಂ.ಮೀ ಮಳೆಯಾಗಿದೆ. 2023ರಲ್ಲಿ ಕೇವಲ 57.49 ಸೆಂ.ಮೀ ಮಳೆ ಬಿದ್ದಿದೆ. ಕಳೆದ ವರ್ಷ ಮೇ ತಿಂಗಳು ಬಿಟ್ಟು ಉಳಿದ ತಿಂಗಳಲ್ಲಿ ವಾಡಿಕೆಯ ಅರ್ಧದಷ್ಟೂ ಮಳೆಯಾಗಲಿಲ್ಲ’ ಎಂದು ಕೃಷಿ ಅಧಿಕಾರಿಗಳು ಮಾಹಿತಿ ನೀಡಿದರು.