ಗೌರಿಬಿದನೂರು: ತಾಲ್ಲೂಕಿನ ಮೇಲಿನ ಕುರುಬರಹಳ್ಳಿಯಲ್ಲಿ ಕೌಟುಂಬಿಕ ಕಲಹದಿಂದ ಮಂಗಳವಾರ ರಾತ್ರಿ ತಮ್ಮ ಅಣ್ಣನನ್ನು ಮಚ್ಚಿನಿಂದ ಕೊಚ್ಚಿ ಬರ್ಬರವಾಗಿ ಕೊಲೆ ಮಾಡಿರುವ ಘಟನೆ ನಡೆದಿದೆ.
ರಮೇಶ್ (36) ಕೊಲೆಯಾದ ವ್ಯಕ್ತಿ, ಮನೆ ಪಾಯದ ವಿಚಾರದಲ್ಲಿ ಸೋದರರಿಬ್ಬರಿಗೂ ಮಂಗಳವಾರ ಗಲಾಟೆಯಾಗಿದ್ದು, ರಾತ್ರಿ ಇಬ್ಬರೂ ಮನೆಯಲ್ಲೆ ಮಲಗಿದ್ದಾರೆ. ಈ ಸಮಯವನ್ನು ಹೊಂಚು ಹಾಕಿ ತಮ್ಮ ಸುರೇಶ ಮಾರಕಾಸ್ತ್ರದಿಂದ ಅಣ್ಣ ರಮೇಶನ ಕತ್ತನ್ನು ಕೊಯ್ದು ಯಾರಿಗೂ ಅನುಮಾನ ಬರದಂತೆ ಮನೆಯಲ್ಲೆ ಮಲಗಿದ್ದಾನೆ.
ಬುಧವಾರ ಬೆಳಿಗ್ಗೆ ಅಣ್ಣ ಶವವಾಗಿದ್ದನು. ಸಂಬಂಧಿಕರು ಕೂಡಲೇ ಗ್ರಾಮಾಂತರ ಠಾಣೆಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕಾಗಮಿಸಿದ ಪೊಲೀಸರು ತಮ್ಮ ಸುರೇಶ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಅಣ್ಣ ರಮೇಶ್‌ನನ್ನು ಹತ್ಯೆ ಮಾಡಿರುವುದಾಗಿ ತಪ್ಪನ್ನು ಒಪ್ಪಿಕೊಂಡಿದ್ದಾನೆ.
ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದಿದ್ದು, ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣವನ್ನು ದಾಖಲಿಸಿಕೊಳ್ಳಲಾಗಿದೆ.
