ಮಂಗಳೂರು: ‘ಸ್ಮಾರ್ಟ್‌ ಸಿಟಿ’ಗೆ ಸುಡುಬೆಂಕಿಯಾದ ‘ಮಿಶ್ರ ಕಸ’

ಜನರು ಪ್ರಸ್ತುತ ಒಣ ಕಸದೊಂದಿಗೆ ಸ್ಯಾನಿಟರಿ ವೇಸ್ಟ್‌ ಅನ್ನು ಸೇರಿಸಿ ಕೊಡುತ್ತಿದ್ದಾರೆ. ಸ್ಯಾನಿಟರಿ ಕಸದ ವೈಜ್ಞಾನಿಕ ವಿಲೇವಾರಿಗೆ ಯೋಚಿಸಲಾಗಿದೆ. ಈ ಸಂಬಂಧ ಎಂಟೊ ಪ್ರೊಟೀನ್ ಕಂಪನಿ ಆಸಕ್ತಿ ತೋರಿದ್ದು ಈ ಬಗ್ಗೆ ವೈಜ್ಞಾನಿಕ ಅಧ್ಯಯನ ನಡೆಸಿ ವರದಿ ಸಲ್ಲಿಸಲು ತಿಳಿಸಲಾಗಿದೆ. ವರದಿ ಆಧರಿಸಿ ಈ ಕುರಿತು ಮುಂದಿನ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ಪಾಲಿಕೆ ಆಯುಕ್ತ ರವಿಚಂದ್ರ ನಾಯಕ್ ‘ಪ್ರಜಾವಾಣಿ’ಗೆ ತಿಳಿಸಿದರು. ಸ್ಯಾನಿಟರಿ ವೇಸ್ಟ್‌ ಅನ್ನು ಪ್ರತ್ಯೇಕಿಸಿ ನೀಡುವಂತೆ ಜನರಲ್ಲಿ ಅರಿವು ಮೂಡಿಸುವ ಜೊತೆಗೆ ಅಪಾರ್ಟ್‌ಮೆಂಟ್ ಅಸೋಸಿಯೇಷನ್‌ ಮುಖ್ಯಸ್ಥರನ್ನು ಭೇಟಿ ಮಾಡಿ ತಿಳಿಸಲಾಗುವುದು ಎಂದು ಹೇಳಿದರು.

- ‘ನಮ್ಮ ಊರು- ನಮ್ಮ ಹೆಮ್ಮೆ’ ಘೋಷವಾಕ್ಯದ ಅಡಿಯಲ್ಲಿ ಜಪ್ಪುವಿನ ಅಂಬಾಮಹೇಶ್ವರಿ ಸೇವಾ ಟ್ರಸ್ಟ್ ಮೂರು ವಾರ್ಡ್‌ಗಳಲ್ಲಿ ಮಾದರಿ ಕಾರ್ಯ ನಡೆಸುತ್ತಿದೆ.  ಮಂಗಳಾದೇವಿ ಬೋಳಾರ ಹೊಯ್ಗೆಬಜಾರ್ ಈ ಮೂರು ವಾರ್ಡ್‌ಗಳಲ್ಲಿ 2022ರಿಂದ ಸ್ವಚ್ಛತೆ ಜಾಗೃತಿ ಅಭಿಯಾನ ನಡೆಸುತ್ತಿರುವ ಟ್ರಸ್ಟ್‌ ಇದಕ್ಕಾಗಿ ಸಿಬ್ಬಂದಿ ನೇಮಿಸಿಕೊಂಡು ನಿರಂತರ ನಿಗಾ ವಹಿಸುತ್ತಿದೆ. ‘ಹಸಿ ಕಸ– ಒಣ ಕಸ ಪ್ರತ್ಯೇಕಿಸಿ ಕೊಡುವುದು ದಾರಿ ಬದಿಯಲ್ಲಿ ಕಸ ಇಡದಂತೆ ಜಾಗೃತಿ ಮೂಡಿಸುವ ಉದ್ದೇಶದಿಂದ ಸುಮಾರು 5800ರಷ್ಟು ಮನೆಗಳನ್ನು ಸಂಪರ್ಕಿಸಿ ಅರಿವು ಮೂಡಿಸಲಾಗಿದೆ. ನೇಮಕ ಮಾಡಿಕೊಂಡಿರುವ ಸಿಬ್ಬಂದಿಗೆ ಟ್ರಸ್ಟ್ ಮೂಲಕವೇ ಗೌರವಧನ ಪಾವತಿಸಲಾಗುತ್ತದೆ. ನಮ್ಮ ಸಿಬ್ಬಂದಿ ಪ್ರತಿನಿತ್ಯ ಮನೆಗಳಿಗೆ ಭೇಟಿ ನೀಡಿ ಜನರಿಗೆ ತಿಳಿ ಹೇಳುತ್ತಾರೆ’ ಎನ್ನುತ್ತಾರೆ ಟ್ರಸ್ಟ್ ಕಾರ್ಯದರ್ಶಿ ಉಮಾನಾಥ್ ಕೋಟೆಕಾರ್. ‘ಈ ಮೊದಲು ಸುಮಾರು 500 ಮನೆಗಳಿಂದ ಮಿಶ್ರ ಕಸ ಬರುತ್ತದೆ ಎಂಬ ದೂರು ಇತ್ತು. ನಮ್ಮ ಸಿಬ್ಬಂದಿ ಜನರಲ್ಲಿ ಅರಿವು ಮೂಡಿಸಿದ ಮೇಲೆ ಅಲ್ಲಿನ ನಿವಾಸಿಗಳು ಕಸವನ್ನು ಪ್ರತ್ಯೇಕಿಸಿ ವಾಹನಕ್ಕೆ ತಂದು ಕೊಡಲು ಪ್ರಾರಂಭಿಸಿದ್ದಾರೆ. ನಿರಂತರ ನಿಗಾ ವಹಿಸಿದರೆ ಇವೆಲ್ಲ ಕಷ್ಟದ ಸಂಗತಿಗಳಲ್ಲ. ಪ್ರಸ್ತುತ ಶೇ 90ರಷ್ಟು ಮನೆಗಳವರು ಕಸವನ್ನು ಪ್ರತ್ಯೇಕಿಸಿ ಕೊಡುತ್ತಾರೆ. ಮಹಾನಗರ ಪಾಲಿಕೆ ನಮ್ಮೊಂದಿಗೆ ಕೈ ಜೋಡಿಸಿದರೆ ಶೇ 100ರ ಸಾಧನೆ ಸಾಧ್ಯವಾಗಿಸಬಹುದು. ಪಾಲಿಕೆಯಿಂದ ನಾವು ಇನ್ನಷ್ಟು ಸಹಕಾರ ನಿರೀಕ್ಷಿಸಿದ್ದೇವೆ’ ಎಂದು ಅವರು ತಿಳಿಸಿದರು. ತಿಂಗಳಲ್ಲಿ ಒಂದು ದಿನ ಗುಜ್ಜರ ಕೆರೆ ಸುತ್ತಲಿನ ಪ್ರದೇಶದಲ್ಲಿ ಶ್ರಮದಾನ ನಡೆಸಿ ಸ್ವಚ್ಛ ಮಾಡುವುದು ಕೂಡ ಟ್ರಸ್ಟ್‌ನ ಚಟುವಟಿಕೆಯ ಭಾಗವಾಗಿದೆ.