ದಾವಣಗೆರೆ| ಅಂಗವಿಕಲರಿಗೆ ಹತ್ತಾರು ಸೌಲಭ್ಯ: ಫಲಾನುಭವಿಗಳೇ ವಿರಳ

ದಾವಣಗೆರೆಯಿಂದ ಚಿತ್ರದುರ್ಗಕ್ಕೆ ತೆರಳುವ ಮಾರ್ಗದಲ್ಲಿರುವ ಸಂಯುಕ್ತ ಪ್ರಾದೇಶಿಕ ಕೇಂದ್ರಕ್ಕೆ ತೆರಳುವವರಿಗೆ ಸಾರಿಗೆ ಸಂಪರ್ಕದ ಸಮಸ್ಯೆ ಎದುರಾಗಿದೆ. ನಗರ ಸಾರಿಗೆಯ ಬಸ್‌ ದಾವಣಗೆರೆಯಿಂದ ಸಿಆರ್‌ಸಿ ಕೇಂದ್ರಕ್ಕೆ ಬೆಳಿಗ್ಗೆ 9.30ಕ್ಕೆ ಮಧ್ಯಾಹ್ನ 1.30ಕ್ಕೆ ಹಾಗೂ ಸಂಜೆ 5 ಗಂಟೆಗೆ ನಿತ್ಯವೂ ಸಂಚರಿಸುತ್ತಿದೆ. ಅಂಗವಿಕಲರು ಈ ಸಮಯಕ್ಕೆ ಮಾತ್ರವೇ ಸಂಚರಿಸಬೇಕಾದ ಅನಿವಾರ್ಯತೆ ಇದೆ. ಬೇರೆ ಸಮಯದಲ್ಲಿ ದಾವಣಗೆರೆಯಿಂದ ಬಾಡ ಕ್ರಾಸ್‌ವರೆಗೆ ನಗರ ಸಾರಿಗೆ ಬಸ್‌ಗಳಲ್ಲಿ ಸಂಚರಿಸಿದರೂ ಅಲ್ಲಿಂದ ಮತ್ತೆ ನಡೆದು ಸಾಗಬೇಕು. ಇಲ್ಲವೇ ಆಟೊಗಳಿಗೆ ದುಬಾರಿ ಹಣ ಪಾವತಿಸಬೇಕಾದ ಅನಿವಾರ್ಯತೆ ಇದೆ.  ನಿತ್ಯವೂ ತರಬೇತಿ ಹಾಗೂ ಚಿಕಿತ್ಸೆಗೆ ತೆರಳುವ ಅಂಗವಿಕಲರನ್ನು ಕರೆದೊಯ್ಯಲು ಹಾಗೂ ಬಿಟ್ಟು ಬರಲು ಕೇಂದ್ರದಿಂದ ಒಂದು ವಾಹನ ಕಲ್ಪಿಸಿದ್ದರೂ ಅದು ಸಾಲುತ್ತಿಲ್ಲ. ಹೆಚ್ಚಿನ ವಾಹನಗಳ ಅವಶ್ಯಕತೆ ಇದೆ. ದಾವಣಗೆರೆಯಿಂದ ಸಿಆರ್‌ಸಿ ಕೇಂದ್ರಕ್ಕೆ ನಗರ ಸಾರಿಗೆಯಿಂದ ಹೆಚ್ಚಿನ ಬಸ್‌ಗಳನ್ನು ಓಡಿಸಲು ಮುಂದಾಗಬೇಕು ಎನ್ನುತ್ತಾರೆ ಅಂಗವಿಕಲರು ಹಾಗೂ ಅವರ ಪೋಷಕರು. 

 ದಿವ್ಯಾಂಗರ ಕೌಶಲಾಭಿವೃದ್ಧಿ ಪುನರ್ವಸತಿ ಮತ್ತು ಸಬಲೀಕರಣದ ಸಂಯುಕ್ತ ಪ್ರಾದೇಶಿಕ ಕೇಂದ್ರದ ಸಮೀಪವೇ ಅಂಗವಿಕಲರಿಗಾಗಿ ವಸತಿ ನಿಲಯ ತಲೆ ಎತ್ತಲಿದೆ. ಚಿಕಿತ್ಸೆ ಹಾಗೂ ತರಬೇತಿಗೆಂದು ವಿವಿಧೆಡೆಯಿಂದ ಬರುವ ಅಂಗವಿಕಲರಿಗೆ ಈ ವಸತಿ ನಿಲಯದಿಂದ ಹೆಚ್ಚಿನ ಅನುಕೂಲ ಆಗಲಿದೆ.  ಅಂದಾಜು ₹16 ಕೋಟಿ ವೆಚ್ಚದಲ್ಲಿ 100 ಬೆಡ್‌ಗಳ ವಸತಿ ನಿಲಯ ನಿರ್ಮಾಣವಾಗಲಿದೆ. ಕೇಂದ್ರ ಸರ್ಕಾರ ಹಾಸ್ಟೆಲ್ ಮಂಜೂರು ಮಾಡಿದ್ದು ಒಂದೆರಡು ತಿಂಗಳಲ್ಲಿಯೇ ಕಟ್ಟಡ ನಿರ್ಮಾಣ ಕಾರ್ಯ ಆರಂಭವಾಗಲಿದೆ.  ‘ವಿಜಯನಗರ ಜಿಲ್ಲೆಯ ಹೂವಿನಹಡಗಲಿಯಿಂದ ಇಲ್ಲಿಗೆ ವಾರ ಅಥವಾ 10 ದಿನಕ್ಕೊಮ್ಮೆ ಮಗನನ್ನು ಚಿಕಿತ್ಸೆಗೆಂದು ಕರೆತರುತ್ತೇನೆ. ಪ್ರಯಾಣವು ತ್ರಾಸದಾಯಕವಾಗಿದೆ. ಇಲ್ಲಿಯೇ ವಸತಿ ನಿಲಯ ನಿರ್ಮಿಸುವುದರಿಂದ ಹೆಚ್ಚಿನ ಅನುಕೂಲ ಆಗಲಿದೆ’ ಎಂದು ಮಗನನ್ನು ಚಿಕಿತ್ಸೆಗೆಂದು ಕರೆ ತಂದಿದ್ದ ಸೌಮ್ಯಾ ಎಚ್‌. ಹೇಳಿದರು.