ಹುಬ್ಬಳ್ಳಿ: ವಾಸ್ತು ತಜ್ಞ ಚಂದ್ರಶೇಖರ ಗುರೂಜಿ ಅವರು ಕೊಲೆಯಾದ ನಗರದ ಉಣಕಲ್ ಬಳಿಯ ದಿ ಪ್ರೆಸಿಡೆಂಟ್ ಹೋಟೆಲ್‌ನಲ್ಲಿ ಶುಕ್ರವಾರ ಸುದರ್ಶನ ಹೋಮ ಮತ್ತು ಹವನ ಮಾಡಲಾಯಿತು.
ಗುರೂಜಿ ಕೊಲೆ ಬಳಿಕ ಹೋಟೆಲ್‌ನಲ್ಲಿ ಭಯದ ವಾತಾವರಣ ನಿರ್ಮಾಣಗೊಂಡಿತ್ತು. ಸಿಬ್ಬಂದಿಯೂ ಆತಂಕದಿಂದಲೇ ಕೆಲಸ ಮಾಡುತ್ತಿದ್ದರು. ಭಯ ನಿವಾರಿಸುವುದಕ್ಕಾಗಿ ಆಡಳಿತ ಮಂಡಳಿಯು, ಸ್ಥಳದಲ್ಲೇ ಹೋಮ ಮತ್ತು ಹವನ ಮಾಡಿಸಿತು.
ಇಬ್ಬರು ಪುರೋಹಿತರು ಮಂತ್ರಘೋಷಗಳೊಂದಿಗೆ ಧಾರ್ಮಿಕ ಕಾರ್ಯಕ್ರಮಗಳನ್ನು ಮುಗಿಸಿದರು. ಹೋಟೆಲ್‌ನಲ್ಲಿ ಮುಂದೆ ಇಂತಹ ಅಹಿತಕರ ನಡೆಯಬಾರದು ಎಂದು ಸಿಬ್ಬಂದಿ ದೇವರನ್ನು ಪ್ರಾರ್ಥಿಸಿದರು.
