Dharwad Krishi Mela | ಔಷಧೀಯ ಸಸ್ಯ ಪ್ರದರ್ಶನ; ಮಾಹಿತಿಗೆ ‘ಕ್ಯುಆರ್‌ ಕೋಡ್‌‘

ಸೈದಾಪುರ ಫಾರ್ಮ್‍ನಲ್ಲಿ 150 ಕ್ಕೂ ಹೆಚ್ಚು ವಿವಿಧ ಪ್ರಭೇದದ ಸಸ್ಯಗಳಿವೆ. ಈ ಪೈಕಿ ಸುಮಾರು 60 ಔಷಧೀಯ ಸಸ್ಯಗಳು ಮಾರಾಟಕ್ಕೆ ಲಭ್ಯ ಇವೆ. ಸಸಿಗೆ ₹ 30 ರಿಂದ ₹ 80 ದರ ನಿಗದಿಪಡಿಸಲಾಗಿದೆ.

ಲವಂಗ ತುಳಸಿ, ಲೋಳೆಸರ, ಕಕ್ಕೆ, ಗುಲಗಂಜಿ, ನಿಂಬೆ ಹುಲ್ಲು, ಲಾವಂಚ, ಗುಗ್ಗಳ, ಬಸವೆ, ರೋಸಮೇರಿ, ಭೃಂಗರಾಜ, ಶಾತವರಿ, ಕಚೀರ, ಸಪೇದ ಮುಸ್ಲಿ, ಶಂಕಪುಷ್ಟಿ, ನೆಲಬೇವು... ಸಹಿತ ಅನೇಕ ಸಸ್ಯಗಳು ಪ್ರದರ್ಶನದಲ್ಲಿ ಇವೆ. ಮಾಹಿತಿ ನೀಡಲು ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಇದ್ದಾರೆ.

ಮಧುಮೇಹ ನಿಯಂತ್ರಣ, ಜ್ವರ ನಿವಾರಕ, ಅತಿಸಾರ ನಿಯಂತ್ರಣ, ಸೊಳ್ಳೆ ನಿರೋಧಕ, ಮೂತ್ರಕೋಶದ ಕಲ್ಲು, ಹೊಟ್ಟೆ ನೋವು, ರಕ್ತದ ಒತ್ತಡ ನಿಯಂತ್ರಣ, ಪೌಷ್ಟಿಕಾಂಶ ವೃದ್ಧಿ, ನಿದ್ರಾಹೀನತೆ ನಿಯಂತ್ರಣ, ಜಂತುನಾಶಕ ಮೊದಲಾದವುಗಳಿಗೆ ಸಂಬಂಧಿಸಿದ ಔಷಧೀಯ ಗಿಡಗಳಿವೆ.

‘ಮೇಳದಲ್ಲಿ 60 ಔಷಧೀಯ ಸಸ್ಯಗಳನ್ನು ಪ್ರದರ್ಶಿಸಲಾಗಿದೆ. ಲೋಳೆಸರ, ಇನ್ಸುಲಿನ್ ಗಿಡ, ನೆಲಬೇವು, ತುಳಸಿ, ಚಕ್ರಮಣಿಗೆ ಹೆಚ್ಚು ಬೇಡಿಕೆ ಇದೆ’ ಎಂದು ಕೃಷಿ ವಿಶ್ವವಿದ್ಯಾಲಯದ ವಿಜ್ಞಾನಿ ಸರಸ್ವತಿ ಸಂಪಗಾವಿ ತಿಳಿಸಿದರು.

‘ತುಳಸಿ ಎಲೆ, ಬೀಜ ಬೇರುಗಳು ಅಸ್ತಮಾ, ಚರ್ಮರೋಗ, ನೆಗಡಿ, ಕಿವಿನೋವು ಗುಣಪಡಿಸುತ್ತವೆ. ಭೃಂಗರಾಜ ಎಲೆ ಕೇಶವರ್ಧನೆಗೆ ಸಹಕಾರಿಯಾಗಿದೆ. ಈ ಸಸ್ಯಗಳನ್ನು ಕಡಿಮೆ ನೀರಿನಲ್ಲಿ ಬೆಳೆಯಬಹುದು. ವೈದ್ಯರ ಸಲಹೆ ಪಡೆದು ಈ ಔಷಧೀಯ ಸಸ್ಯಗಳನ್ನು ಬಳಸಬಹುದು’ ಎಂದು ವಿದ್ಯಾರ್ಥಿಗಳು ತಿಳಿಸಿದರು.

ಮಧುಮೇಹ ನಿರ್ವಹಣೆ, ಮೂತ್ರ ಕೋಶದ ಕಲ್ಲು ಸಮಸ್ಯೆಗೆ ಪರಿಹಾರ, ಬಾಯಿಹುಣ್ಣು ನಿವಾರಣೆ, ತೆಲೆನೋವು ನಿವಾರಣೆ ಮೊದಲಾದವುಗಳಿಗೆ ಔಷಧೀಯ ಸಸ್ಯಗಳ ಮಾಹಿತಿಯನ್ನು ಪ್ರದರ್ಶಿಸಲಾಗಿದೆ.