ಮೂಲಸೌಕರ್ಯ ಕೊರತೆ: ಆತಂಕದಲ್ಲೇ ರಂಗನಾಥನ ದರ್ಶನ ಪಡೆದ ಭಕ್ತರು

ಈ ದೇವಾಲಯಕ್ಕೆ ಅಸಂಖ್ಯಾತ ಭಕ್ತರಿದ್ದಾರೆ. ವೈಕುಂಠ ಏಕಾದಶಿ, ಶ್ರಾವಣ ಮಾಸದಲ್ಲಿ ನಡೆಯುವ ವಿಶೇಷ ಪೂಜೆ ಮತ್ತು ಮಾರ್ಚ್‌ನಲ್ಲಿ ನಡೆಯುವ ಜಾತ್ರೆಯಲ್ಲಿ ಅತಿ ಹೆಚ್ಚು ಭಕ್ತರು ದೇವಾಲಯಕ್ಕೆ ಬರುತ್ತಾರೆ. ಮುಜರಾಯಿ ಇಲಾಖೆಗೆ ಸೇರಿರುವ ಈ ದೇವಾಲಯದಲ್ಲಿ ವಿಶೇಷ ಅಲಂಕಾರ, ಪೂಜೆ, ಸೇವೆಗಳು ಜರುಗುತ್ತವೆ. ಪ್ರತಿ ಶನಿವಾರ ಭಕ್ತರಿಗೆ ಮಧ್ಯಾಹ್ನ ಅನ್ನದಾಸೋಹ ನಡೆಯುತ್ತದೆ.

ಮಗನ ತಿಂದ ಮಹಾರಾಜನೆಂಬ ಚೋಳ ಅರಸನ ಆಳ್ವಿಕೆ ಕಾಲದಲ್ಲಿ ದೇವಾಲಯವನ್ನು ನಿರ್ಮಾಣ ಮಾಡಲಾಗಿದೆ. ಬೆಟ್ಟದ ಗುಹೆಯೊಳಗೆ ಲಿಂಗದ ರೂಪದಲ್ಲಿ ಮೂಡಿರುವ ದೇವರಿಗೆ ಗ್ರಾಮದ ವೈಷ್ಣವ ವಂಶಸ್ಥರು ಪೂಜೆ ಸಲ್ಲಿಸುತ್ತಾರೆ. ವರ್ಷಕ್ಕೊಮ್ಮೆ ಮೂರು ದಿನ ನಡೆಯುವ ಜಾತ್ರೆಯಲ್ಲಿ ಸುಮಾರು 50 ಸಾವಿರಕ್ಕೂ ಹೆಚ್ಚು ಭಕ್ತರು ಭೇಟಿ ನೀಡುತ್ತಾರೆ.

ಮಲೆನಾಡು ಅಭಿವೃದ್ಧಿ ನಿಗಮದ ವತಿಯಿಂದ ಜಿಲ್ಲಾ ಪಂಚಾಯಿತಿ ಮಾಜಿ ಸದಸ್ಯೆ ಸುಜಾತಾ ಗಣೇಶ್ ಹೊನ್ನವಳ್ಳಿ ಸಹಕಾರದಲ್ಲಿ ದೇವಸ್ಥಾನದವರೆಗೆ ವಾಹನಗಳು ಚಲಿಸುವಂತೆ ಸಿಮೆಂಟ್ ರಸ್ತೆ ನಿರ್ಮಾಣ ಮಾಡಿದ ನಂತರ ಭಕ್ತರ ಸಂಖ್ಯೆ ಅಧಿಕವಾಯಿತು.

ಆಲೂರಿನಿಂದ ಮಗ್ಗೆ ಮಾರ್ಗದಲ್ಲಿ ಚನ್ನಾಪುರದಿಂದ 3 ಕಿ.ಮೀ. ದೂರದಲ್ಲಿರುವ ದೇವಸ್ಥಾನದವರೆಗೆ ಗುಡ್ಡಬೆಟ್ಟ, ಕಾಫಿ ತೋಟದ ನಡುವೆ ಸಾಗಿ ಹೋಗಬೇಕು. ಕಾಡಾನೆಗಳ ಉಪಟಳ ಇದೆ. ಅಲ್ಲದೇ ಕೆಲ ಭಾಗದಲ್ಲಿ ರಸ್ತೆ ಹಾಳಾಗಿದ್ದು, ಭಕ್ತರು ಭಯದಲ್ಲಿಯೇ ದೇವಸ್ಥಾನಕ್ಕೆ ಹೋಗಿ ಬರಬೇಕಾಗಿದೆ.

ಮಳೆ ಬಂದಾಗ ದೇವಸ್ಥಾನದ ಮೇಲ್ಭಾಗದ ಚಾವಣಿ ಕಲ್ಲಿನಲ್ಲಿ ನೀರು ಸೋರುತ್ತಿದೆ. ಭಕ್ತರು ಸುಗಮವಾಗಿ ಸಂಚರಿಸಲು ರಸ್ತೆ ದುರಸ್ತಿಯಾಗಬೇಕು. ದೇವಾಲಯ ಮುಜರಾಯಿ ಇಲಾಖೆಗೆ ಸೇರಿರುವುದರಿಂದ ಸರ್ಕಾರ ಕೂಡಲೇ ಮೂಲಸೌಕರ್ಯ ಒದಗಿಸಲು ಮುಂದಾಗಬೇಕು ಎನ್ನುವುದು ಭಕ್ತರ ಆಶಯ.