ಅತಿಯಾದ ಮಳೆ | ಕೊಳೆತ ಬೆಳೆ: ಹಾವೇರಿ ಜಿಲ್ಲೆಯಾದ್ಯಂತ ಬಹುಪಾಲು ರೈತರ ಕಣ್ಣೀರು

ಸರ್ಕಾರದಿಂದ ಎಷ್ಟೇ ಯೋಜನೆಗಳು ಜಾರಿಯಲ್ಲಿದ್ದರೂ ಬಹುತೇಕ ರೈತರು ಸಾಲ ಮಾಡಿಯೇ ಕೃಷಿ ಮಾಡುತ್ತಿದ್ದಾರೆ. ಬಿತ್ತನೆ ಬೀಜ ಗೊಬ್ಬರ ಖರೀದಿಯಿಂದ ಹಿಡಿದು ಪ್ರತಿಯೊಂದಕ್ಕೆ ಮತ್ತೊಬ್ಬರ ಬಳಿ ಸಾಲ ತರುತ್ತಿದ್ದಾರೆ. ಈಗ ಬೆಳೆ ಹಾನಿ ಸಂಭವಿಸಿದ್ದರಿಂದ ರೈತರಿಗೆ ಸಾಲಗಾರರ ಕಾಟವೂ ಶುರುವಾಗಿದೆ. ಜಿಲ್ಲೆಯಾದ್ಯಂತ 1ರಿಂದ 3 ಎಕರೆ ಜಮೀನು ಹೊಂದಿರುವ ರೈತರು ಅತ್ಯಧಿಕ ಸಂಖ್ಯೆಯಲ್ಲಿದ್ದಾರೆ. ಕೃಷಿಗಾಗಿ ಪರಿಚಯಸ್ಥ ವ್ಯಾಪಾರಿಗಳು ಹಾಗೂ ಬ್ಯಾಂಕ್‌ಗಳಲ್ಲಿ ಸಾಲ ಮಾಡಿಕೊಂಡಿದ್ದಾರೆ. ಬೆಳೆಯ ಫಸಲು ಕೈಸೇರಿದ ಬಳಿಕ ಸಾಲ ಮರು ಪಾವತಿ ಮಾಡುವ ಭರವಸೆ ಸಹ ನೀಡಿದ್ದಾರೆ. ಈಗ ಬೆಳೆ ಸಂಪೂರ್ಣ ನಾಶವಾದರೆ ರೈತರ ಸ್ಥಿತಿ ಚಿಂತಾಜನಕವಾಗಲಿದೆ. ‘₹ 30 ಸಾವಿರ ಕೈ ಸಾಲ ಮಾಡಿ 2 ಎಕರೆ ಜಮೀನಿನಲ್ಲಿ ಮೆಕ್ಕೆಜೋಳ ಬಿತ್ತನೆ ಮಾಡಿದ್ದೇನೆ. ಬೆಳೆಯ ಬೆಳವಣಿಗೆ ಕುಂಠಿತವಾಗಿದ್ದು ತೆನೆ ಸಹ ಕಟ್ಟಿಲ್ಲ. ಕಟಾವು ಸಂದರ್ಭದಲ್ಲಿ ಕಡಿಮೆ ಇಳುವರಿ ಬರುವ ಲಕ್ಷಣಗಳು ಗೋಚರಿಸುತ್ತಿವೆ. ನಿಗದಿಗಿಂತ ಕಡಿಮೆ ಫಸಲು ಬಂದರೆ ಸಾಲ ತೀರಿಸುವುದು ಹೇಗೆ ? ನನ್ನ ಕುಟುಂಬ ನಡೆಸುವುದು ಹೇಗೆ’ ಎಂದು ಶಿಗ್ಗಾವಿ ರೈತ ಸೋಮಪ್ಪ ಕರ್ಕಿಹಳ್ಳಿ ಪ್ರಶ್ನಿಸಿದರು.