ಹಾವೇರಿ | ಪಡಿತರ ವಿತರಣೆ ಆರಂಭ: ಜೋಳ ಖಾಲಿ; ಫೆಬ್ರುವರಿಯಿಂದ ಅಕ್ಕಿ ವಿತರಣೆ

‘ಹಾವೇರಿ ಜಿಲ್ಲೆಯಲ್ಲಿ ಪಡಿತರ ಚೀಟಿದಾರರಿಗೆ ವಿತರಿಸಲು ತಿಂಗಳಿದೆ 30 ಸಾವಿರ ಕ್ವಿಂಟಲ್ ಜೋಳ ಹಾಗೂ 42 ಸಾವಿರ ಕ್ವಿಂಟಲ್ ಅಕ್ಕಿ ಬೇಕು. ಜನವರಿಗೆ ತಿಂಗಳಿಗೆ ಮಾತ್ರ ಅಗತ್ಯವಿರುವಷ್ಟು ಜೋಳವಿದೆ. ಫೆಬ್ರುವರಿಯಲ್ಲಿ ಜೋಳ ಇರುವುದಿಲ್ಲ. ಅದರ ಬದಲು ಅಕ್ಕಿ ವಿತರಣೆ ಮಾಡಲಾಗುವುದು’ ಎಂದು ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಉಪನಿರ್ದೇಶಕ ರಮೇಶ ತಿಳಿಸಿದರು. ಜೋಳ ದಾಸ್ತಾನು ಖಾಲಿ ಆಗಿರುವ ಬಗ್ಗೆ ಪ್ರತಿಕ್ರಿಯಿಸಿದ ಅವರು ‘ಧಾರವಾಡ ಜಿಲ್ಲೆಯಲ್ಲಿ ಈಗಾಗಲೇ ಜೋಳ ವಿತರಣೆ ಬಂದ್ ಮಾಡಲಾಗಿದೆ. ಫೆಬ್ರುವರಿಯಿಂದ ಹಾವೇರಿ ಜಿಲ್ಲೆಯಲ್ಲಿಯೂ ಜೋಳ ವಿತರಣೆ ಬಂದ್ ಮಾಡಲಾಗುವುದು’ ಎಂದರು. ‘ಜೋಳದ ದಾಸ್ತಾನು ಅಂತಿಮ ಹಂತದಲ್ಲಿತ್ತು. ಈ ಸಂದರ್ಭದಲ್ಲಿ ಜೋಳ ಹಾಳಾಗಿತ್ತು. ಇದರಿಂದ ಜಿಲ್ಲೆಯಲ್ಲಿ ಸ್ವಲ್ಪ ಸಮಸ್ಯೆಯಾಯಿತು. ಮುಂದಿನ ತಿಂಗಳಿನಿಂದ ಅಕ್ಕಿ ವಿತರಣೆ ಮಾಡಲು ಹೆಚ್ಚಿನ ದಾಸ್ತಾನು ಲಭ್ಯವಿದೆ’ ಎಂದೂ ಹೇಳಿದರು.

‘ವಿಜಯಪುರ ಧಾರವಾಡ ಹಾವೇರಿ ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ ದೊರೆಯುವ ಗುಣಮಟ್ಟದ ಜೋಳವನ್ನು ಖರೀದಿ ಮಾಡಿ ಪಡಿತರ ಚೀಟಿದಾರರಿಗೆ ವಿತರಿಸಬೇಕು’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಶಿವಾನಂದ ಪಾಟೀಲ ಅವರು ಅಧಿಕಾರಿಗಳಿಗೆ ಖಡಕ್ ಸೂಚನೆ ನೀಡಿದ್ದಾರೆ. ಜಿಲ್ಲಾ ಪಂಚಾಯಿತಿ ಸಭಾಭವನದಲ್ಲಿ ಇತ್ತೀಚೆಗೆ ಜರುಗಿದ್ದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಮಾತನಾಡಿದ್ದ ಅವರು ಜನರಿಗೆ ಕಳಪೆ ಜೋಳ ಪೂರೈಸಿದ್ದಕ್ಕಾಗಿ ಅಧಿಕಾರಿಗಳಿಗೆ ಬಿಸಿ ಮುಟ್ಟಿಸಿದ್ದರು. ‘ಬಳ್ಳಾರಿಯ ಗೋದಾಮಿನಲ್ಲಿದ್ದ ಜೋಳವೇ ಹಾಳಾಗಿತ್ತು. ಸಿಬ್ಬಂದಿಯಿಂದ ಸ್ವಚ್ಛಗೊಳಿಸಿ ಜಿಲ್ಲೆಗೆ ಪೂರೈಸಲಾಗಿತ್ತು’ ಎಂದು ಅಧಿಕಾರಿಗಳು ಹೇಳಿದ್ದರು. ಅದಕ್ಕೆ ಪ್ರತಿಕ್ರಿಯಿಸಿದ ಸಚಿವ ‘ಬಳ್ಳಾರಿಯಲ್ಲಿ ಮಾತ್ರ ಜೋಳ ಖರೀದಿ ಮಾಡುತ್ತೀರಾ ? ವಿಜಯಪುರ ಧಾರವಾಡ ಹಾವೇರಿಯಲ್ಲೂ ಗುಣಮಟ್ಟದ ಜೋಳ ಸಿಗುತ್ತದೆ. ಅಲ್ಲಿಯೂ ರೈತರಿಗೆ ಬೆಂಬಲ ಬೆಲೆ ನೀಡಿ ಖರೀದಿ ಮಾಡಿ. ಅದೇ ಜೋಳವನ್ನು ಜನರಿಗೆ ವಿತರಿಸಿ’ ಎಂದು ಸೂಚನೆ ನೀಡಿದ್ದರು.