ಶನಿವಾರ, ಸೆಪ್ಟೆಂಬರ್ 26, 2020
26 °C
ಚಿಂಚೋಳಿ: ಪ್ರವಾಸಿಗರನ್ನು ಕೈಮಾಡಿ ಕರೆಯುತ್ತಿರುವ ಸಸ್ಯಕಾಶಿ

ವನಸಿರಿ ಕಣ್ತುಂಬಿಕೊಳ್ಳಲು ಸಕಾಲ

ಜಗನ್ನಾಥ ಡಿ.ಶೇರಿಕಾರ Updated:

ಅಕ್ಷರ ಗಾತ್ರ : | |

Prajavani

ಚಿಂಚೋಳಿ: ಬಿಸಿಲುನಾಡಿನ ಜೀವ ವೈವಿಧ್ಯ ತಾಣವಾಗಿರುವ ಚಿಂಚೋಳಿ ವನ್ಯಜೀವಿಧಾಮ ಹಚ್ಚ ಹಸಿರಿನಿಂದ ಮೈದುಂಬಿಕೊಂಡು ಪ್ರವಾಸಿಗರನ್ನು ಕೈಮಾಡಿ ಕರೆಯುತ್ತಿದೆ.

ಚಿಕ್ಕಲಿಂಗದಳ್ಳಿ ಕೆರೆ, ಶಾದಿಪುರ ನವಿಲು ಗುಡ್ಡ, ಶೇರಿಭಿಕನಳ್ಳಿ ಲಾಲ್ ತಾಲಾಬ್, ಆನೆ ಪಳಗಿಸುವ ಶಾಲೆಯಾಗಿರುವ ಹಾಥಿ ಪಕಡಿ, ಎತ್ತಿಪೋತೆ ಜಲಪಾತ, ಗೊಟ್ಟಂಗೊಟ್ಟ ಪ್ರಕೃತಿಯ ರಮಣೀಯತೆ, ಸೋಮಲಿಂಗದಳ್ಳಿಯ ಮಹಿಶಮ್ಮನ ಬೆಟ್ಟ, ಮಂಡಿ ಬಸವಣ್ಣ ಕ್ಯಾಂಪ್, ಚಂದ್ರಂಪಳ್ಳಿ ಜಲಾಶಯ ಈ ಕಾಡಿನಲ್ಲಿ ಬರುವ ಪ್ರೇಕ್ಷಣೀಯ ತಾಣಗಳಾಗಿವೆ.

ಸುಮಾರು 13,488 ಹೆಕ್ಟೇರ್ ವಿಶಾಲವಾದ, ದಕ್ಷಿಣ ಭಾರತದ ಶುಷ್ಕ ವಲಯದ ಏಕೈಕ ವನ್ಯಜೀವಿ ಧಾಮ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಇಲ್ಲಿನ ವನಸಿರಿಯನ್ನು ಕಣ್ತುಂಬಿಕೊಳ್ಳಲು ಅರಣ್ಯ ಇಲಾಖೆಯು ಹಾಥಿಪಕಡಿ, ಗೊಟ್ಟಮಗೊಟ್ಟ, ನವಿಲುಗುಡ್ಡ, ಮಹಿಶಮ್ಮನ ಬೆಟ್ಟಗಳಲ್ಲಿ ವೀಕ್ಷಣಾ ಗೋಪುರಗಳನ್ನು ನಿರ್ಮಿಸಿದೆ.

ಚಂದ್ರಂಪಳ್ಳಿ ಜಲಾಶಯದ ದಂಡೆಯಲ್ಲಿ ಕಾಟೇಜ್ ನಿರ್ಮಿಸಲಾಗಿದೆ. ಇಲ್ಲಿನ ರೈತ ತರಬೇತಿ ಭವನವು ತುಂಗಭದ್ರಾ ಜಲಾಶಯದ ವೈಕುಂಠ ಅತಿಥಿಗೃಹವನ್ನು ನೆನಪಿಸುಂತಿದೆ. ಚಂದ್ರಂಪಳ್ಳಿ ಜಲಾಶಯ ಈಗ ಶೇ 40ರಷ್ಟು ಭರ್ತಿಯಾಗಿದೆ. ಇನ್ನೊಂದೆರಡು ದೊಡ್ಡ ಮಳೆಗಳು ಸುರಿದರೆ ಜಲಾಶಯ ತುಂಬಲಿದೆ.

ಅಪರೂಪದ ಗಿಡ ಮರಗಳು, ಔಷಧೀಯ ಸಸ್ಯಗಳು ಮತ್ತು ಅಳಿವಿನ ಅಂಚಿನಲ್ಲಿರುವ ಪ್ರಾಣಿ, ಪಕ್ಷಿಗಳು ಇರುವ ಈ ವನ್ಯಜೀವಿ ಧಾಮವನ್ನು ನೋಡಲು ಈಗ ಸಕಾಲ. ಎಲೆ ಉದುರುವ ಕಾಡಾಗಿರುವ ಇದು ಡಿಸೆಂಬರ್‌ವರೆಗೆ ಹಸಿರು ಸೂಸುತ್ತಿರುತ್ತದೆ.

ಜಲಪಾತಗಳು ಬೇಸಿಗೆಯಲ್ಲಿ ನಿಂತು ಹೋಗುತ್ತವೆ. ಪರಿಸರ ಪ್ರಿಯರು, ಚಾರಣಿಗರು ಮಲೆನಾಡ ಸಿರಿಯಲ್ಲಿ ಮಿಂದೇಳಲು ಈಗ ಬಂದು ಹೋಗಬೇಕು. ಕಾಡಿನ ಒಳಗಡೆ ಹೋಗಬೇಕಾದರೆ ಕಾಡಿನ ಪರಿಚಯ ಉಳ್ಳವರು ಜತೆಗಿರಬೇಕು. ಜತೆಗೆ ಅರಣ್ಯ ಇಲಾಖೆ ಅನುಮತಿ ಪಡೆದುಕೊಳ್ಳಬೇಕು ಎನ್ನುತ್ತಾರೆ ವಲಯ ಅರಣ್ಯಾಧಿಕಾರಿ ಸಂಜೀವಕುಮಾರ ಚವ್ಹಾಣ.

ಕಾಟೇಜ್ ಬೇಕಾದರೆ ಚಿಂಚೋಳಿಯ ವನ್ಯಜೀವಿಧಾಮ ಅಥವಾ ಕಲಬುರ್ಗಿ ಜಿಲ್ಲಾ ಅರಣ್ಯ ಸಂರಕ್ಷಣಾಧಿಕಾರಿಗಳ ಕಚೇರಿಯನ್ನು ಸಂಪರ್ಕಿಸಬೇಕು. ಮಾಹಿತಿಗಾಗಿ ಸಂಜೀವಕುಮಾರ ಚವ್ಹಾಣ (9008570173) ಅವರನ್ನು ಸಂಪರ್ಕಿಸಬಹುದಾಗಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು