ಚಿಂಚೋಳಿ: ನಿರಂತರ ಮಳೆಗೆ ಹಾಳಾದ ಬೆಳೆಗಳು

ಶೇ 60ರಷ್ಟು ಹೆಸರು ಬೆಳೆ ರೈತರ ಕೈಗೆಟುಕಿದರೆ, ಉದ್ದು ಮಳೆಯಿಂದ ರಾಶಿಗೂ ಮೊದಲೇ ಕಾಯಿಯಲ್ಲಿಯೇ ಕಾಳುಗಳು ನೆನೆದು ಮೊಳಕೆಯೊಡೆದಿವೆ. ಇದರಿಂದ ರೈತರು ನಷ್ಟಕ್ಕೆ ಗುರಿಯಾಗಿದ್ದಾರೆ. ಕಳೆದ ವರ್ಷ ಅನಾವೃಷ್ಟಿಯಿಂದ ರೈತರು ತೊಂದರೆ ಎದುರಿಸಿದರೆ ಪ್ರಸಕ್ತ ವರ್ಷ ಅತಿವೃಷ್ಟಿಯಿಂದ ನಷ್ಟ ಅನುಭವಿಸುವಂತಾಗಿದೆ.

ರೈತನಿಗೆ ಉದ್ದಿನ ಬೆಳೆ ಹೊಲದಲ್ಲಿಯೇ ಬಿಡಲು ಆಗದೇ ರಾಶಿಯೂ ಮಾಡಲಾಗದೇ ತ್ರಿಶಂಕು ಸ್ಥಿತಿ ಎದುರಿಸುವಂತಾಗಿದೆ. ಅಳಿದುಳಿದ ಬೆಳೆ ರಾಶಿ ಮಾಡಿಕೊಂಡು ಬರಬೇಕೆಂದರೆ ಮಳೆ ಬಿಡುವು ನೀಡುತ್ತಿಲ್ಲ. ಉದ್ದಿನ ರಾಶಿಗೆ ನಿತ್ಯ ಸುರಿಯುತ್ತಿರುವ ಮಳೆ ಹಾಗೂ ಕಾರ್ಮಿಕರ ಕೊರತೆ ಕಾಡಿದರೆ, ಕಾರ್ಮಿಕರು ದುಬಾರಿ ಹಣಕ್ಕೆ ಬೇಡಿಕೆ ಇಡುತ್ತಿರುವುದು ರೈತರನ್ನು ಮತ್ತಷ್ಟು ಚಿಂತೆಗೀಡು ಮಾಡಿದೆ.

ತಾಲ್ಲೂಕಿನಲ್ಲಿ 13 ಸಾವಿರ ಹೆಕ್ಟೇರ್ ಹೆಸರು, 7 ಸಾವಿರ ಹೆಕ್ಟೇರ್ ಉದ್ದು, 7ಸಾವಿರ ಹೆಕ್ಟೇರ್ ಸೋಯಾ ಬಿತ್ತನೆ ಮಾಡಲಾಗಿದೆ. ಜಿಲ್ಲೆಯಲ್ಲಿಯೇ ಅತ್ಯಧಿಕ ತೊಗಡಿ ಬೆಳೆಯುವ ತಾಲ್ಲೂಕುಗಳಲ್ಲಿ ಒಂದಾಗಿರುವ ಚಿಂಚೋಳಿ ತಾಲ್ಲೂಕಿನಲ್ಲಿ 60 ಸಾವಿರಕ್ಕೂ ಅಧಿಕ ಪ್ರದೇಶದಲ್ಲಿ ಬೆಳೆಯುತ್ತಿರುವ ತೊಗರಿ ಬೆಳೆಗೂ ಮಳೆರಾಯನ ಕಾಟ ಕಾಡುತ್ತಿದೆ. ಇದರಿಂದ ಸೋಯಾ ಮತ್ತು ತೊಗರಿ ಬೆಳೆಯೂ ರೈತನ ಪಾಲಿಗೆ ಗಗನ ಕುಸುಮವಾಗತೊಡಗಿವೆ.

ಇಲ್ಲಿವರೆಗೆ ಸುರಿದ ಮಳೆಯಿಂದ ಉದ್ದು, ಹೆಸರು ಹಾಳಾದರೆ ಈಗ ತಗ್ಗು ಪ್ರದೇಶದಲ್ಲಿರುವ ಸೋಯಾ ಮತ್ತು ತೊಗರಿ ಬೆಳೆಗೂ ಕಂಟಕ ಎದುರಾಗಿದೆ. ಈಗಾಗಲೇ ಅಲ್ಲಲ್ಲಿ ತಗ್ಗು ಪ್ರದೇಶದಲ್ಲಿ ತೊಗರಿ ಬೆಳೆ ಒಣಗುತ್ತಿರುವುದು ಗೋಚರಿಸಿದೆ.