ಗುರುವಾರ , ಫೆಬ್ರವರಿ 20, 2020
17 °C
13 ವರ್ಷಗಳ ಹಿಂದೆ ದಾವೆ ಹೂಡಿದ್ದ ಹೋರಾಟಗಾರ ಎಸ್‌.ಕೆ. ಕಾಂತಾ

ಮೂರು ನವೇಶನ ಮಾರಾಟ ಅಸಿಂಧುಗೊಳಿಸಿದ ಹೈಕೋರ್ಟ್‌

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಲಬುರ್ಗಿ: ‘ನಗರದ ಸೂಪರ್ ಮಾರುಕಟ್ಟೆಯಲ್ಲಿ ಸರ್ಕಾರಕ್ಕೆ ಸೇರಿದ ಮೂರು ವಾಣಿಜ್ಯ ನಿವೇಶನಗಳ ಮಾರಾಟವನ್ನು ಹೈಕೋರ್ಟ್ ಅಸಿಂಧುಗೊಳಿಸಿ, ಮಹತ್ವದ ಆದೇಶ ನೀಡಿದೆ’ ಎಂದು ಹೋರಾಟಗಾರ ಎಸ್.ಕೆ.ಕಾಂತಾ ತಿಳಿಸಿದರು.

‘ಈ ನಿವೇಶನಗಳನ್ನು ಮರಳಿ ಪಡೆಯಲು ನ್ಯಾಯಾಲಯವು ಸರ್ಕಾರಕ್ಕೆ ಕಟ್ಟು ನಿಟ್ಟಿನ ಆದೇಶ ನೀಡಿದೆ. ಆರು ವಾರಗಳ ಗಡುವು ಕೊಟ್ಟಿದೆ’ ಎಂದು ಅವರು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

‘ಮಾರುಕಟ್ಟೆ ಪ್ರದೇಶಕ್ಕೆಂದು ಸರ್ಕಾರಕ್ಕೆ 40 ಗುಂಟೆ ಜಮೀನು ಇದೆ. ಇದರ ನಿವೇಶನಗಳನ್ನು ಹಾರಜು ಮಾಡಬಹುದೇ ವಿನಾ ಮಾರಾಟ ಮಾಡಲು ಬರುವುದಿಲ್ಲ. ಆದರೆ, 13 ವರ್ಷಗಳ ಹಿಂದೆ ಕಾಲವು ರಾಜಕಾರಣಿಗಳು ಪ್ರಭಾವ ಬೀರಿ ಮೂರು ನಿವೇಶನ ಮಾರಾಟ ಮಾಡಿದ್ದರು. 2007ರಲ್ಲಿ ಇದರ ವಿರುದ್ಧ ದಾವೆ ಹೂಡಿದ್ದೆ. ದೀರ್ಘ ಕಾಲದ ಬಳಿಕ ನ್ಯಾಯ ಸಿಕ್ಕಿದೆ’ ಎಂದರು.

‘ಮಾರುಕಟ್ಟೆಯಲ್ಲಿ ಸರ್ಕಾರದ ಜಾಗ 25 ವರ್ಷಗಳಿಂದ ಖಾಲಿ ಇದ್ದು, ಅನಿಧಿಕೃತ ಚಟುವಟಿಕೆಗಳು ನಡೆಯುತ್ತಿವೆ. ಇದರಿಂದ ಸರ್ಕಾರಕ್ಕೆ ಯಾವುದೇ ಆದಾಯ ಬರುವುದಿಲ್ಲ ಎಂದು ನಂ.145, 146, 147ರ ನಿವೇಶನಗಳನ್ನು ಖರೀದಿಸಲು ಅಥವಾ 99 ವರ್ಷಗಳ ಲೀಸ್‌ಗೆ ಕೊಡುವಂತೆ ವಿಶ್ವನಾಥ ನಾಡಗೌಡ ಎಂಬುವವರು, ಅಂದಿನ ಲೋಕೋಪಯೋಗಿ ಸಚಿವ ಎಚ್. ಡಿ.ರೇವಣ್ಣ ಅವರಿಗೆ ಪತ್ರ ಬರೆದಿದ್ದರು. ಇದಕ್ಕೆ ಸಚಿವರಿಂದ ಅನುಮೋದನೆ ಸಿಕ್ಕಿತ್ತು. ನಂತರ ಆಗಿನ ಸ್ಥಳೀಯ ಶಾಸಕರು ಖರೀದಿದಾರರ ಪರವಾಗಿ ಆಗಿನ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅವರಿಗೆ ಶಿಫಾರಸು ಪತ್ರ ಬರೆದು, ಅಧಿಕಾರ ದುರುಪಯೋಗ ಪಡೆಸಿಕೊಂಡು ಸರ್ಕಾರದ ನಿವೇಶನಗಳನ್ನು ಮಾರಾಟ ಮಾಡಿದ್ದರು’ ಎಂದರು.

‘ಮೂರು ನಿವೇಶನಗಳೂ 30X40 ಚದರ್‌ ಅಡಿ ಆಗಿದ್ದು, ಅಂದಿನ ಮಾರುಕಟ್ಟೆ ದರ ಪ್ರತಿ ಚದರ್‌ ಅಡಿಗೆ ₹2,500 ರಂತೆ ಮಾಡಲಾಗಿತ್ತು. ನಂ.147 ನಿವೇಶನ ಕಾರ್ನರ್‌ಗೆ ಇರುವ ಕಾರಣ ಅದರ ಪ್ರತಿ ಚದರಡಿಗೆ ಶೇ 50ರಷ್ಟು ಹೆಚ್ಚಿನ ದರಕ್ಕೆ ಮಾರಾಟ ಮಾಡಲಾಗಿತ್ತು’ ಎಂದು ವಿವರಿಸಿದರು.

‘ಸರ್ಕಾರ ಕೂಡಲೇ ಈ ನಿವೇಶನಗಳನ್ನು ಹಿಂ‍ಡೆದು, ನ್ಯಾಯ ಸಮ್ಮತವಾಗಿ ಬಹಿರಂಗ ಹರಾಜು ಹಾಕಬೇಕು’ ಎಂದೂ ಅವರು ಆಗ್ರಹಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು