ಕೋಲಾರ: ಲೋಕಸಭಾ ಚುನಾವಣೆಯಲ್ಲಿ ಕೋಲಾರ ಜಿಲ್ಲೆಯಲ್ಲಿ ಮನೆಯಿಂದಲೇ ಮತದಾನಕ್ಕೆ ನೋಂದಾಯಿಸಿಕೊಂಡಿದ್ದ 85 ವರ್ಷ ದಾಟಿದ ಮತದಾರರಲ್ಲಿ ಶೇ 91.84 ಮಂದಿ ಹಾಗೂ ಅಂಗವಿಕಲ ಮತದಾರರಲ್ಲಿ ಶೇ 92.75 ಮಂದಿ ಮತದಾನ ಮಾಡಿದ್ದಾರೆ.
ಚುನಾವಣಾ ಆಯೋಗದ ನಿರ್ದೇಶನದಂತೆ ನೋಂದಾಯಿಸಿಕೊಂಡಿದ್ದ 85 ವರ್ಷ ಮೇಲಿನ ವೃದ್ಧರು ಹಾಗೂ ಅಂಗವಿಕಲರಿಗೆ ಶನಿವಾರ ಹಾಗೂ ಭಾನುವಾರ ಮನೆಯಿಂದಲೇ ಮತದಾನಕ್ಕೆ ಅವಕಾಶ ಕೊಡಲಾಗಿತ್ತು.
ಜಿಲ್ಲೆಯಲ್ಲಿ 13,815 ಮಂದಿ 85 ವರ್ಷ ದಾಟಿದ ಮತದಾರರಿದ್ದು, ಅವರಲ್ಲಿ 1,433 ಮಂದಿ ಮನೆಯಲ್ಲೇ ಮತದಾನ ಮಾಡುವ ಅವಕಾಶ ಆಯ್ಕೆ ಮಾಡಿಕೊಂಡಿದ್ದರು. 1,316 ಮಂದಿ ಮತ ಚಲಾಯಿಸಿದ್ದಾರೆ.
ಜಿಲ್ಲೆಯಲ್ಲಿ ಒಟ್ಟು 20,413 ಅಂಗವಿಕಲ ಮತದಾರರಿದ್ದು, 759 ಮಂದಿ ಮನೆಯಲ್ಲೇ ಮತದಾನ ಮಾಡುವ ಆಯ್ಕೆ ಮಾಡಿಕೊಂಡಿದ್ದರು. ಅವರಲ್ಲಿ 704 ಮಂದಿ ಮತದಾನ ಮಾಡಿದ್ದಾರೆ. ಅಂದರೆ ಶೇ 92.75 ರಷ್ಟು ಮತದಾನವಾಗಿದೆ ಎಂದು ಜಿಲ್ಲಾ ಚುನಾವಣಾಧಿಕಾರಿಯೂ ಆಗಿರುವ ಜಿಲ್ಲಾಧಿಕಾರಿ ಅಕ್ರಂ ಪಾಷಾ ತಿಳಿಸಿದ್ದಾರೆ.