ಕೊಪ್ಪಳ | ಗವಿಸಿದ್ಧೇಶ್ವರ ಮಠದ ಜಾತ್ರೆ: ಮಹಾರಥೋತ್ಸವ, ಮಹಾಸಂಗಮ

ರಥೋತ್ಸವ ಸಂದರ್ಭದಲ್ಲಿ ಲಕ್ಷಾಂತರ ಭಕ್ತರು ಪಾಲ್ಗೊಂಡಿದ್ದರೂ ಅಭಿನವ ಗವಿಸಿದ್ಧೇಶ್ವರ ಸ್ವಾಮೀಜಿ ‘ನಾನು ಒಂದೆರೆಡು ಮಾತುಗಳನ್ನಾಡಲೇ’ ಎಂದಾಗ ಜನ ಗಾಢ ಮೌನಕ್ಕೆ ಜಾರಿದರು. ‘ಬದುಕು ದೇವರು ನಮಗೆ ಕೊಟ್ಟ ಉಡುಗೊರೆಯಾಗಿದ್ದು ಈಗಿನ ಉಡುಗೊರೆಯನ್ನು ಚೆನ್ನಾಗಿ ಬಳಸಿಕೊಂಡರೆ ಮಾತ್ರ ಮತ್ತೊಂದು ಬದುಕಿನ ಉಡುಗೊರೆ ನೀಡುತ್ತಾನೆ. ಮನುಷ್ಯನಿಗೆ ಜೀವನ ಕೊಟ್ಟಿದ್ದಕ್ಕೆ ನಾವು ಬದುಕುವ ರೀತಿ ಕಂಡು ದೇವರೇ ಸಂತೋಷಪಡುವ ರೀತಿಯಲ್ಲಿ ಇರಬೇಕು’ ಎಂದರು. ’ಮನೆ ಕಟ್ಟುವಾಗ ಎಲ್ಲ ದಾಖಲೆಗಳನ್ನು ಇಟ್ಟುಕೊಂಡು ಬ್ಯಾಂಕ್‌ನವರು ಸಾಲ ಕೊಡುತ್ತಾರೆ. ಆದರೆ ನಿಮ್ಮಿಂದ ಯಾವ ಗ್ಯಾರಂಟಿಯನ್ನೂ ಪಡೆದುಕೊಳ್ಳದೇ ದೇವರು ಬದುಕು ಕೊಟ್ಟಿದ್ದಾರೆ. ಸೂರ್ಯ ಚಂದ್ರ ಎಂದೂ ವಿದ್ಯುತ್‌ ಬಿಲ್‌ ಕೇಳಿಲ್ಲ. ಸೈಕಲ್‌ ಗಾಲಿ ಪಂಚರ್‌ ಆದರೆ ಗಾಳಿ ತುಂಬಿಸುತ್ತೀರಿ. ದೇಹಕ್ಕೆ ನವರಂಧ್ರಗಳು ಇದ್ದರೂ ನೀವು ಪಂಚರ್‌ ಆಗುತ್ತೀರಿ. ನಿಸರ್ಗ ಸಂತೋಷವಾಗಿದ್ದರೂ ಮನುಷ್ಯ ಮಾತ್ರ ಅಳುವುದು ಬಿಟ್ಟಿಲ್ಲ. ಎಷ್ಟೇ ಸಂಕಷ್ಟ ಎದುರಾದರೂ ಕೊರಗಬಾರದು. ಭರವಸೆಯೇ ಬದುಕು ಆಗಬೇಕು’ ಎಂದು ಹೇಳಿದರು.

ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಲಕ್ಷಾಂತರ ಜನರ ನಡುವೆ ಮಹಾರಥೋತ್ಸವದ ವೇಳೆ ಪಲ್ಲಕ್ಕಿ ಹೊತ್ತು ಭಕ್ತಿ ಸಮರ್ಪಿಸಿದರು. ಈ ವೇಳೆ ಮಾತನಾಡಿ ‘ಗವಿಸಿದ್ದೇಶ್ವರ ಜಾತ್ರೆಗೆ ಬರಬೇಕು ಎನ್ನುವ ಅಪೇಕ್ಷೆಯಿತ್ತು. ಅದು ಈಗ ಈಡೇರಿದೆ. ಜಗತ್ತಿನ ಯಾವುದೇ ಪವಿತ್ರ ಸ್ಥಳದಲ್ಲಿ ಇಂತಹ ದೃಶ್ಯ ನೋಡಲು ಸಾಧ್ಯವಿಲ್ಲ. ಜಾತ್ರೆಯಲ್ಲಿ ಪಾಲ್ಗೊಳ್ಳುತ್ತಿರುವುದು ಸೌಭಾಗ್ಯ’ ಎಂದರು.