ಮಂಗಳವಾರ, ಆಗಸ್ಟ್ 4, 2020
24 °C
ಕೇಂದ್ರ ಸರ್ಕಾರಕ್ಕೆ 6 ಪ್ರಶ್ನೆಗಳನ್ನು ಹಾಕಿದ ಮಂಜುಳಾ ಮಾನಸ

ಕೊರೊನಾ ನಿಯಂತ್ರಣ ಭ್ರಷ್ಟಾಚಾರ ಆರೋಪ: ಬಹಿರಂಗ ಚರ್ಚೆಗೆ ಸವಾಲೆಸೆದ ಲಕ್ಷ್ಮಣ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಮೈಸೂರು: ಕೋವಿಡ್ ನಿಯಂತ್ರಣದಲ್ಲಿ ನಡೆದಿದೆ ಎನ್ನಲಾದ ಅಕ್ರಮದ ಕುರಿತು ಬಹಿರಂಗ ಚರ್ಚೆಗೆ ಸಿದ್ಧ ಎಂದು ಕೆಪಿಸಿಸಿ ವಕ್ತಾರ ಎಂ.ಲಕ್ಷ್ಮಣ ಹೇಳಿದರು.

ಕೋವಿಡ್ ನಿಯಂತ್ರಣಕ್ಕೆ ₹ 550 ಕೋಟಿ ಮಾತ್ರವೇ ಖರ್ಚಾಗಿದೆ ಎಂದು ಸಚಿವ ಎಸ್.ಟಿ.ಸೋಮಶೇಖರ್ ಸುಳ್ಳು ಹೇಳುತ್ತಿದ್ದಾರೆ. ಅವರು ಬಹಿರಂಗ ಸಭೆ ಕರೆದು ಚರ್ಚಿಸಲಿ ಎಂದು ಇಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಸವಾಲೆಸೆದರು.

‌₹ 10 ಲಕ್ಷ ‘ಎನ್-95’ ಮಾಸ್ಕ್ ಖರೀದಿಸಲು ₹ 29.5 ಕೋಟಿ ಹಣ ನೀಡಲು ತೀರ್ಮಾನಿಸಿದ್ದರೂ, ದಿಢೀರನೆ ₹ 46 ಕೋಟಿಗೆ ಹೆಚ್ಚಿಸಲಾಗಿದೆ. ಇದರಲ್ಲಿ ಸುಮಾರು ₹ 16 ಕೋಟಿಯಷ್ಟು ಅವ್ಯವಹಾರ ನಡೆದಿರುವ ಸಾಧ್ಯತೆ ಇದೆ. ಒಂದು ‘ಎನ್-95’ ಮಾಸ್ಕ್ ಮಾರುಕಟ್ಟೆ ಬೆಲೆ ₹ 65. ಆದರೆ, ಒಂದು ಮಾಸ್ಕ್‌ಗೆ ₹ 460 ನೀಡಿರುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದರು.

‘ಮಾರುಕಟ್ಟೆ ದರಕ್ಕಿಂತ 8 ಪಟ್ಟು ಹೆಚ್ಚಿನ ಬೆಲೆ ನೀಡಿ ಖರೀದಿಸಿರುವುದೇ ಭ್ರಷ್ಟಾಚಾರ ಆಗಿರುವುದಕ್ಕೆ ಸಾಕ್ಷಿ’ ಎಂದು ಅವರು ಆರೋಪಿಸಿದರು.

ಮೊದಲು ₹ 464.81 ಕೋಟಿ ಮೊತ್ತದ ಸಾಮಗ್ರಿ, ಉಪಕರಣಗಳನ್ನು ಖರೀದಿಸಲು ಪ್ರಸ್ತಾಪಿಸಿದ್ದ ವೈದ್ಯಕೀಯ ಶಿಕ್ಷಣ ನಿರ್ದೇಶನಾಲಯ ಅನಂತರ ₹ 815.85 ಕೋಟಿ ಮೊತ್ತ ನೀಡಿ ಉಪಕರಣಗಳನ್ನು ಖರೀದಿಸಲು ಮುಂದಾಯಿತು ಎಂದರು.

ಇದೇ ರೀತಿ ₹ 78 ಬೆಲೆಯ 500 ಎಂ‌.ಎಲ್ ಸ್ಯಾನಿಟೈಸರ್‌ನ್ನು ₹ 600ಕ್ಕೆ, ₹ 3,500 ಬೆಲೆಯ ಒಂದು ಥರ್ಮಲ್ ಸ್ಕ್ಯಾನರ್‌ನ್ನು ₹ 9 ಸಾವಿರಕ್ಕೆ ಖರೀದಿಸಲಾಗಿದೆ ಎಂದು ಆರೋಪಿಸಿದರು.

ಮುರುಗೇಶ್ ನಿರಾಣಿ ಮೇ 28ರಂದು ನಡೆದ ಸಭೆಯೊಂದರಲ್ಲಿ ‘ಕೊರೊನಾ ಸಂಬಂಧಿ ಭ್ರಷ್ಟಾಚಾರದ ಬಗ್ಗೆ ದಾಖಲೆಗಳಿರುವ 125 ಪುಟಗಳ ಫೈಲ್ ಇರುವ ಪೆನ್‌ಡ್ರೈವ್ ಇದೆ’ ಎಂದಿದ್ದರು. ಇದು ಸಭೆಯ ನಡುವಳಿಯಲ್ಲಿಯೂ ದಾಖಲಾಗಿದೆ ಎಂದು ಹೇಳಿದರು.

ಈ ವೇಳೆ ಮಾತನಾಡಿದ ಕೆಪಿಸಿಸಿ ವಕ್ತಾರರಾದ ಮಂಜುಳಾ ಮಾನಸ, ‘ಸಾರ್ವಜನಿಕರು ಮತ್ತು ಚೀನಾ ಕಂಪನಿಗಳಿಂದ ಪಡೆದಿರುವ ಒಂದು ಲಕ್ಷ ಕೋಟಿ ರೂಪಾಯಿಯಷ್ಟು ದೇಣಿಗೆಯ ವಿವರಗಳನ್ನು ಕೇಂದ್ರ ಸರ್ಕಾರ ಬಹಿರಂಗಪಡಿಸಬೇಕು’ ಎಂದು ಒತ್ತಾಯಿಸಿದರು.

ವಿವೇಕಾನಂದ ಫೌಂಡೇಷನ್, ಇಂಡಿಯಾ ಫೌಂಡೇಷನ್ ಬಗ್ಗೆಯೂ ತನಿಖೆಗೆ ಆದೇಶಿಸುವಿರಾ, ಓವರ್ ಸೀಸ್ ಫ್ರೆಂಡ್ಸ್ ಆಫ್ ಬಿಜೆಪಿ ಎಂಬ ಸಂಸ್ಥೆಗೆ ಯಾರು ಎಷ್ಟು ಹಣ ನೀಡಿದ್ದಾರೆ, ಚೀನಾ ದೇಶದಿಂದ ಎಷ್ಟು ದೇಣಿಗೆ ಬಂದಿದೆ ಮತ್ತು ಏತಕ್ಕಾಗಿ ಉಪಯೋಗಿಸಲಾಗಿದೆ ಎಂಬುದನ್ನು ಬಹಿರಂಗ ಮಾಡುತ್ತೀರಾ ಎಂದು ಪ್ರಶ್ನಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು