ಮೈಸೂರು: ಬಿಕೋ ಎನ್ನುತ್ತಿದೆ ಭತ್ತ ಖರೀದಿ ಕೇಂದ್ರ

ಬರದ ಸಮಸ್ಯೆಯಿಂದ ಜಿಲ್ಲೆಯಲ್ಲಿ ಭತ್ತ ಉತ್ಪಾದನೆಯು ಈ ವರ್ಷ ಕುಸಿದಿದ್ದು, ನೀರಾವರಿ ಇದ್ದವರು ಮಾತ್ರ ಭತ್ತ ನಾಟಿ ಮಾಡಿದ್ದಾರೆ. ಈ ಬಾರಿ ಕೇವಲ 76,950 ಹೆಕ್ಟೇರ್‌ನಲ್ಲಿ ಭತ್ತ ಬೆಳೆಯಲಾಗಿದೆ. ಬೇಡಿಕೆ ಹೆಚ್ಚಿದ್ದು, ಮುಕ್ತ ಮಾರುಕಟ್ಟೆಯಲ್ಲಿಯೇ ರೈತರು ಮಾರಾಟಕ್ಕೆ ಮುಂದಾಗಿದ್ದಾರೆ.

‘ಕೇಂದ್ರ ಸರ್ಕಾರದ ಕನಿಷ್ಠ ಬೆಂಬಲ ಬೆಲೆ ಯೋಜನೆಯಡಿ ಈ ಬಾರಿ ಸಾಮಾನ್ಯ ಭತ್ತಕ್ಕೆ ಪ್ರತಿ ಕ್ವಿಂಟಲ್‍ಗೆ ₹2,183 ಹಾಗೂ ಗ್ರೇಡ್ ಎ ಭತ್ತಕ್ಕೆ ₹2,203 ದರ ನಿಗದಿಪಡಿಸಲಾಗಿದೆ. ಪ್ರತಿ ಎಕರೆಗೆ 20 ಕ್ವಿಂಟಲ್‍ನಂತೆ ಒಬ್ಬ ರೈತರಿಂದ ಗರಿಷ್ಠ 40 ಕ್ವಿಂಟಲ್ ಭತ್ತವನ್ನು ಸರ್ಕಾರ ಖರೀದಿಸಲಿದೆ’ ಎಂದು ರಾಜ್ಯ ಕೃಷಿ ಮಾರಾಟ ಮಂಡಳಿ ಜಿಲ್ಲಾ ವ್ಯವಸ್ಥಾಪಕಿ ಡಿ.ಎನ್‌.ಮಮತಾ ತಿಳಿಸಿದರು.

‘ಪ್ರಜಾವಾಣಿ’ ಜೊತೆ ಮಾತನಾಡಿದ ಅವರು, ‘ಹೊರಗಡೆ ಮಾರುಕಟ್ಟೆಯಲ್ಲಿ ಕ್ವಿಂಟಲ್‌ ಭತ್ತಕ್ಕೆ ₹2,800ಕ್ಕೂ ಹೆಚ್ಚು ಬೆಲೆ ಇದೆ. ಕನಿಷ್ಠ ಬೆಂಬಲ ಬೆಲೆಗಿಂತ ಹೆಚ್ಚೇ ಸಿಗುತ್ತಿದೆ. ಹೀಗಾಗಿ, ರೈತರು ನೇರವಾಗಿ ಅಲ್ಲಿಯೇ ಮಾರಾಟ ಮಾಡುತ್ತಿದ್ದಾರೆ’ ಎಂದರು.

‘ಎಲ್ಲ ತಾಲ್ಲೂಕುಗಳ ಎಪಿಎಂಸಿ ಕೇಂದ್ರಗಳ ಆವರಣಗಳಲ್ಲಿ ಹಾಗೂ ಅಗತ್ಯ ಪ್ರದೇಶಗಳಲ್ಲಿ ಖರೀದಿ ಕೇಂದ್ರಗಳನ್ನು ತೆರೆಯಲಾಗಿದೆ. ಕಳೆದ ಸಾಲಿಗಿಂತ ಈ ಬಾರಿ ಕಡಿಮೆ ಸಂಖ್ಯೆಯಲ್ಲಿ ರೈತರು ನೋಂದಣಿ ಮಾಡಿಸಿದ್ದಾರೆ. ಇನ್ನೂ ಜ.15ರವರೆಗೂ ನೋಂದಣಿ ನಡೆಯತ್ತದೆ. ಉತ್ಪಾದನೆ ಕಡಿಮೆ ಇರುವುದರಿಂದ ಈ ಬಾರಿ ನೋಂದಣಿಯಲ್ಲಿ ಯಾವುದೇ ಮಿತಿಯನ್ನು ನಮಗೆ ನೀಡಿಲ್ಲ’ ಎಂದರು.

ನಿಯಮ, ಅವೈಜ್ಞಾನಿಕ ದರ: ‘ಖರೀದಿ ಕೇಂದ್ರಗಳಲ್ಲಿ ವೈಜ್ಞಾನಿಕವಾಗಿ ದರ ನಿಗದಿ ಮಾಡುವುದಿಲ್ಲ. ನಮ್ಮ ಕೊನೆಯ ಆಯ್ಕೆಯಾಗಿ ಅದನ್ನು ನೋಡುವ ಸ್ಥಿತಿಯಿದೆ. ಖರೀದಿಗೆ ಮಿತಿ ಹಾಕುವುದು, ನಿಧಾನಗತಿಯ ಹಣ ಸಂದಾಯ, ಗುಣಮಟ್ಟದ ಹೆಸರಲ್ಲಿ ಅನಗತ್ಯ ಒತ್ತಡಗಳು ಅದನ್ನು ಆಕರ್ಷಣೀಯವಾಗಿಸಿಲ್ಲ. ಮಾರುಕಟ್ಟೆಯಲ್ಲಿ ಅಲ್ಲಿಗಿಂತ ಕನಿಷ್ಟ ₹700ಕ್ಕೂ ಹೆಚ್ಚು ಹಣ ದೊರೆಯುವಾಗ ಕೇಂದ್ರಗಳತ್ತ ಯಾರು ಹೋಗುತ್ತಾರೆ’ ಎಂದು ರೈತ ಸಂಘದ ಜಿಲ್ಲಾಧ್ಯಕ್ಷ ಹೊಸೂರು ಕುಮಾರ್‌ ತಿಳಿಸಿದರು.