ಲಿಂಗಸುಗೂರು: ಗಣೇಶ ಮೂರ್ತಿಗಳ ವಿಸರ್ಜನೆ ಸಂದರ್ಭದಲ್ಲಿ ರಾಜ್ಯದ ಮಂಡ್ಯ ಜಿಲ್ಲೆಯ ನಾಗಮಂಗಲದಲ್ಲಿ ನಡೆದ ಅಹಿತಕರ ಘಟನೆಗೆ ಹಿನ್ನೆಲೆಯಲ್ಲಿ ಪೊಲೀಸ್ ಇಲಾಖೆ ಹಿರಿಯ ಅಧಿಕಾರಿಗಳ ಮುನ್ಸೂಚನೆ ಆಧರಿಸಿ ಪಟ್ಟಣದಲ್ಲಿ ಹೈ ಅಲರ್ಟ್ ಘೋಷಿಸಿ ಪೊಲೀಸ್ ಅಧಿಕಾರಿಗಳ ನೇತೃತ್ವದಲ್ಲಿ ಜಾಗೃತಿ ನಡೆಸಲಾಯಿತು.
ಗುರುವಾರ ರಾತ್ರಿ ಪೊಲೀಸ್ ಮತ್ತು ಗೃಹ ರಕ್ಷಕ ದಳ ಸಿಬ್ಬಂದಿ ತುರ್ತು ಸಭೆ ಕರೆದು ಪಟ್ಟಣದ ಪ್ರಮುಖ ರಸ್ತೆಗಳಲ್ಲಿ ವಾಹನಗಳ ಸಮೇತ ಹೈ ಅಲರ್ಟ್ ಜಾಗೃತಿ ಮೂಡಿಸಿದರು. ಏಕಾಏಕಿ ಹತ್ತಾರು ಪೊಲೀಸ್ ವಾಹನಗಳು ಸೈರನ್‍ ಹಾಕಿ ಸಂಚರಿಸಿದ್ದು ನಾಗರಿಕರನ್ನು ಕೆಲ ಸಮಯ ಬೆಚ್ಚಿ ಬೀಳಿಸಿತ್ತು.
ಪೊಲೀಸ್ ಇನ್‍ಸ್ಪೆಕ್ಟರ್ ಪುಂಡಲಿಕ್‍ ಪಟತ್ತರ್ ಅವರನ್ನು ಸಂಪರ್ಕಿಸಿದಾಗ, ‘ಯಾವುದೇ ಅಹಿತಕರ ಘಟನೆ ಜರುಗಿಲ್ಲ. ಹಿರಿಯ ಅಧಿಕಾರಿಗಳ ಮಾರ್ಗದರ್ಶನ ಆಧರಿಸಿ ಪಟ್ಟಣದ ಪ್ರಮುಖ ರಸ್ತೆಗಳಲ್ಲಿ ವಾಹನಗಳ ಸಮೇತ ಹೈ ಅಲರ್ಟ್ ಮೂಲಕ ಜಾಗೃತಿ ಮೂಡಿಸಲಾಗಿದೆ. ತಾಲ್ಲೂಕಿನ ಜನತೆ ಶಾಂತಿಪ್ರಿಯರಿದ್ದಾರೆ’ ಎಂದು ಹೇಳಿದರು.
ಪಿಎಸ್‍ಐ, ಎಎಸ್‍ಐ ಸೇರಿದಂತೆ ಪೊಲೀಸ್ ಕಾನ್‌ಸ್ಟಬಲ್‌ಗಳು ಭಾಗವಹಿಸಿದ್ದರು.
