ಬಹುದಿನಗಳ ಹೋರಾಟಕ್ಕೆ ಸಂದ ಜಯ: ‘ನಿರಾಶ್ರಿತ ಬಂಗಾಲಿ’ಗರಿಗೆ ಪೌರತ್ವ ಭಾಗ್ಯ

ಸಿಂಧನೂರು ತಾಲ್ಲೂಕಿನಲ್ಲಿ ನಾಲ್ಕು ಪುನರ್ವಸತಿ ಕ್ಯಾಂಪ್‍ಗಳಿದ್ದು, ಆರ್.ಎಚ್.ನಂ.2ರಲ್ಲಿ 7 ಸಾವಿರ, 3ರಲ್ಲಿ 7 ಸಾವಿರ, 4ರಲ್ಲಿ 4,500 ಮತ್ತು 5ರಲ್ಲಿ 4 ಸಾವಿರ ನಿರಾಶ್ರಿತರು ಇದ್ದಾರೆ. ಇವರಲ್ಲಿ ಸುಮಾರು 7 ಸಾವಿರಕ್ಕೂ ಹೆಚ್ಚು ಜನರಿಗೆ ಭಾರತೀಯ ಪೌರತ್ವ ಇನ್ನೂ ಲಭಿಸಿಲ್ಲ. ಭಾರತ ಸರ್ಕಾರ 2019ರಲ್ಲಿ ಪೌರತ್ವ ತಿದ್ದುಪಡಿ ಕಾಯ್ದೆ ಜಾರಿಗೆ ತಂದಿದ್ದರೂ ಅದಕ್ಕೆ ನಿಯಮಾವಳಿ ರೂಪಿಸಿರಲಿಲ್ಲ. ಇದೇ ಫೆಬ್ರುವರಿ ತಿಂಗಳಲ್ಲಿ ಕೇಂದ್ರ ಸರ್ಕಾರ ನಿಯಮಾವಳಿ ರೂಪಿಸಿ ರಾಜ್ಯಪತ್ರ ಹೊರಡಿಸಿ ಪೌರತ್ವಕ್ಕೆ ಆನ್‍ಲೈನ್ ಮೂಲಕ ಅರ್ಜಿ ಸಲ್ಲಿಸಲು ಅನುವು ಮಾಡಿಕೊಟ್ಟಿದೆ.

ತಾಲ್ಲೂಕಿನ 146 ಜನ ಪೌರತ್ವಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ಇವರ ಪೈಕಿ ಇದೀಗ ಐವರಿಗೆ ಪೌರತ್ವ ಪ್ರಮಾಣ ಪತ್ರ ಲಭಿಸಿರುವುದು ಬಂಗಾಲಿ ಕ್ಯಾಂಪ್‌ನ ನಿವಾಸಿಗಳಿಗೆ ಸಂತಸ ತಂದಿದೆ. ಈಚೆಗೆ ಆನ್‌ಲೈನ್‌ ಮೂಲಕ ಪೌರತ್ವ ಪ್ರಮಾಣಪತ್ರ ಸಿಕ್ಕಾಗ ಬಂಗಾಲಿಗರು ಪರಸ್ಪರ ಸಿಹಿ ಹಂಚಿ ಗುಲಾಲು ಹಾಕಿಕೊಂಡು ಕುಣಿದು ಸಂಭ್ರಮಿಸಿದ್ದರು.

ಈ ಮೊದಲು ಸಿಂಧನೂರಿಗೆ ಬಂದಿದ್ದ ವಲಸಿಗರಿಗೆ ಅಂದಿನ ಜಿಲ್ಲಾಧಿಕಾರಿ ಪೌರತ್ವದ ಪ್ರಮಾಣ ಪತ್ರ ನೀಡಿದ್ದರು. ಆದರೆ, ಅನಕ್ಷರತೆ ಮತ್ತು ಬಡತನದ ಕಾರಣಕ್ಕೆ ಭಾವಚಿತ್ರ ತೆಗೆಸಿ ಅಧಿಕಾರಿಗಳಿಗೆ ಕೊಡದ ಕಾರಣ ಹಲವು ಜನರು ಪೌರತ್ವದಿಂದ ವಂಚಿತರಾಗಿದ್ದರು. ಹಲವು ವರ್ಷಗಳಿಂದ ಪೌರತ್ವಕ್ಕಾಗಿ ಪರಿತಪಿಸುತ್ತಿದ್ದರು.

2003ರಲ್ಲಿ ಕಾನೂನು ತಿದ್ದುಪಡಿ: ‘ಪ್ರಧಾನಿ ಮನಮೋಹನ್ ಸಿಂಗ್ ನೇತೃತ್ವದ ಕೇಂದ್ರ ಸರ್ಕಾರವು 2003ರಲ್ಲಿ ಪೌರತ್ವ ಕಾಯ್ದೆಗೆ ತಿದ್ದುಪಡಿ ಮಾಡಿ, ತಂದೆ ಮತ್ತು ತಾಯಿ ಇಬ್ಬರಿಗೂ ಪೌರತ್ವ ಇದ್ದರೆ ಮಾತ್ರ ಮಕ್ಕಳಿಗೆ ಪೌರತ್ವ ಕೊಡಬೇಕು. ಇಬ್ಬರಲ್ಲಿ ಒಬ್ಬರಿಗೆ ಇದ್ದರೆ ಪೌರತ್ವ ನಿಷೇಧಿಸುವ ನಿಯಮ ರೂಪಿಸಿತು. ಆಗ ನಮಗೆ ಪೌರತ್ವದ ಸಮಸ್ಯೆ ಉಂಟಾಯಿತು. ಆದ್ದರಿಂದ 2005ರಲ್ಲಿ ನಿಖಿಲ್ ಭಾರತ್ ಬಂಗಾಲಿ ಉದ್ಬಾಸ್ತು ಸಮನ್ವಯ ಸಮಿತಿ ರಚಿಸಿಕೊಂಡು ದೇಶವ್ಯಾಪಿ ಹೋರಾಟ ಮಾಡಿದ ಪರಿಣಾಮ 2019ರಲ್ಲಿ ಪೌರತ್ವ ತಿದ್ದುಪಡಿ ಕಾಯ್ದೆ ಅಂಗೀಕಾರವಾಗಿದೆ. ಈಗ ಪೌರತ್ವ ಭಾಗ್ಯ ಲಭಿಸಿದೆ’ ಎಂದು ಸಮನ್ವಯ ಸಮಿತಿ ಮುಖಂಡರಾದ ಪ್ರೆಸೆನ್ ರಫ್ತಾನ್, ಜಗದೀಶ ಬಾವಾಲಿ, ಕೃಷ್ಣಧನ ಬಿಶ್ವಾಸ್, ಅನಿಲ್ ರಾಯ್ ಹರ್ಷ ವ್ಯಕ್ತಪಡಿಸಿದ್ದಾರೆ.

‘ಕರ್ನಾಟಕದ ಏಳೆಂಟು ಸಾವಿರ ಬಂಗಾಲಿಗರಿಗೆ ಸಿಎಎ ಕಾನೂನಿನ ಮೂಲಕ ಪೌರತ್ವ ಪಡೆಯಲು ಸಹಕರಿಸಿದ ಸಿಂಧನೂರು ತಾಲ್ಲೂಕಿನ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರು, ಮಾಜಿ ಸಂಸದರಿಗೆ ಕೃತಜ್ಞತೆ ಸಲ್ಲಿಸುತ್ತೇವೆ’ ಎಂದು ನಿಖಿಲ್ ಭಾರತ್ ಬಂಗಾಲಿ ಉದ್ಬಾಸ್ತು ಸಮನ್ವಯ ಸಮಿತಿ ರಾಜ್ಯ ಘಟಕದ ಅಧ್ಯಕ್ಷ ಸುನೀಲ್ ಮೇಸ್ತ್ರಿ ತಿಳಿಸಿದ್ದಾರೆ.