ರಾಯಚೂರು | ರೈತರು, ವ್ಯಾಪಾರಸ್ಥರಿಂದ ರಸ್ತೆ ಬದಿ ತರಕಾರಿ ಮಾರಾಟ

ನಗರದಲ್ಲಿರುವ ಉಸ್ಮಾನಿಯಾ ತರಕಾರಿ ಮಾರುಕಟ್ಟೆ 1905ರಲ್ಲೇ ಆರಂಭವಾಗಿದೆ. ನಗರ ಬೃಹದಾಕಾರದಲ್ಲಿ ಬೆಳೆದ ನಂತರ ವ್ಯಾಪಾರ ವಿಸ್ತರಣೆಗೆ ಜಾಗ ಸಾಲುತ್ತಿಲ್ಲ. ಹಳೆಯ ವ್ಯಾಪಾರಿಗಳು ಅಲ್ಲಿನ ಸ್ಥಳಗಳನ್ನು ಆಕ್ರಮಿಸಿಕೊಂಡಿದ್ದಾರೆ. ಹೊರಗಿನಿಂದ ಬಂದ ರೈತರಿಗೆ ಇಲ್ಲಿ ಮುಕ್ತವಾಗಿ ಮಾರಾಟ ಮಾಡಲು ಅವಕಾಶ ದೊರಕುತ್ತಿಲ್ಲ.

ಜಾಗ ಇಲ್ಲದ್ದಕ್ಕೆ ಸಣ್ಣ ರೈತರು ಹಾಗೂ ತರಕಾರಿ ಮಾರಾಟಗಾರರು ಮೊದಲು ಎಂ. ವೀರಣ್ಣ ವೃತ್ತದಲ್ಲಿ ಬೆಳಿಗ್ಗೆ ತರಕಾರಿ ಮಾರಾಟ ಮಾಡುತ್ತಿದ್ದರು. ಶಾಲಾ, ಕಾಲೇಜುಗಳಿಗೆ ಹೋಗುವ ವಿದ್ಯಾರ್ಥಿಗಳಿಗೆ ಹಾಗೂ ಸಾರ್ವಜನಿಕರ ಸಂಚಾರಕ್ಕೆ ದಟ್ಟಣೆಯಾದ ನಂತರ ಅದನ್ನು ಆಕಾಶವಾಣಿ ಕಚೇರಿ ಕಡೆಗೆ ಹೋಗವ ಮಾರ್ಗದಲ್ಲಿ ಮಾವಿನ ಕೆರೆಯ ದಡದಲ್ಲಿರುವ ಖಾಸಗಿ ಜಾಗಕ್ಕೆ ಮಾರುಕಟ್ಟೆ ಸ್ಥಳಾಂತರಿಸಲಾಗಿದೆ.

ತರಕಾರಿ ಮಾರುವ ಸ್ಥಳದಲ್ಲಿ ಒಂದು ಕಡೆ ಸ್ಮಶಾನ ಇದ್ದರೆ, ಇನ್ನೊಂದು ಕಡೆ ಕರೆಯ ಹೊಲಸು ನೀರು ಗಬ್ಬು ನಾರುತ್ತಿದೆ. ಕಟ್ಟಡ ತ್ಯಾಜ್ಯವನ್ನು ಇಲ್ಲಿಯೇ ತಂದು ಸುರಿಯಲಾಗುತ್ತಿದೆ.

ರಾಯಚೂರು ತಾಲ್ಲೂಕು ಹಾಗೂ ನೆರೆಯ ಆಂಧ್ರಪ್ರದೇಶದ ಗಡಿ ಗ್ರಾಮಗಳ ರೈತರು ನಗರಕ್ಕೆ ತರಕಾರಿ ತಂದು ಮಾರಾಟ ಮಾಡಲು ಸರಿಯಾದ ಸ್ಥಳವೇ ಇಲ್ಲವಾಗಿದೆ. ರಸ್ತೆ ಬದಿಗೇ ಕುಳಿತು ಮಾರಾಟ ಮಾಡಿ ಹೋಗುತ್ತಿದ್ದಾರೆ. ಇಲ್ಲಿ ಯಾವುದೇ ತರಹದ ಸೌಲಭ್ಯಗಳೂ ಇಲ್ಲ.

ಹೊಸ ಆಯುಕ್ತರು ಬಂದ ಮೇಲೆ ನಗರಸಭೆಯ ಸ್ವಚ್ಛತಾ ಸಿಬ್ಬಂದಿ ನಿತ್ಯ ಸ್ವಚ್ಛ ಮಾಡುತ್ತಿದ್ದಾರೆ. ಆದರೆ, ಒಂದು ದಿನ ಬಿಟ್ಟರೆ ಸಾಕು ಇಲ್ಲಿ ಕಸದ ಗುಡ್ಡೆಯೇ ನಿರ್ಮಾಣವಾಗುತ್ತದೆ. ಜಿಲ್ಲಾಡಳಿತ ಹಾಗೂ ನಗರಸಭೆ ನಗರದಲ್ಲಿ ಅಚ್ಚುಕಟ್ಟಾದ ತರಕಾರಿ ಮಾರುಕಟ್ಟೆ ನಿರ್ಮಾಣಕ್ಕೆ ಆಸಕ್ತಿ ತೋರಿಸುತ್ತಿಲ್ಲ. ನಗರದಲ್ಲಿ ಸರ್ಕಾರಿ ಜಾಗ ಒತ್ತುವರಿಯಾಗಿವೆ. ಮಠ, ಮಂದಿರಗಳು ನಿರ್ಮಾಣವಾಗಿವೆ. ಅತಿಕ್ರಮಣ ತೆರವುಗೊಳಿಸಿ ಮಾರುಕಟ್ಟೆ ನಿರ್ಮಿಸಿದರೂ ಅನುಕೂಲವಾಗಲಿದೆ. ಆದರೆ, ಅಧಿಕಾರಿಗಳು ಹಾಗೂ ಚುನಾಯಿತ ಪ್ರತಿನಿಧಿಗಳು ಶಾಶ್ವತ ಪರಿಹಾರ ಕಂಡುಕೊಳ್ಳಲು ಸಿದ್ಧವಿಲ್ಲ.

ರಾಯಚೂರು ಜಿಲ್ಲೆಯಲ್ಲಿ ಜೂನ್‌ನಿಂದ ನವೆಂಬರ್‌ ವರೆಗೂ ತೋಟಗಾರಿಕೆ ಬೆಳೆ ಬೆಳೆಯುತ್ತದೆ. ತೋಟಗಾರಿಕೆ ಉತ್ಪನ್ನಗಳೂ ಮಾರುಕಟ್ಟೆಗೆ ಬರುತ್ತವೆ. ನವೆಂಬರ್‌ ನಂತರ ಬೆಳಗಾವಿ ಹಾಗೂ ಬಾಗಲಕೋಟೆ ಜಿಲ್ಲೆಯಿಂದ ತರಕಾರಿ ಇಲ್ಲಿಗೆ ಬರುತ್ತದೆ ಎಂದು ಇಲ್ಲಿಯ ಸಗಟು ವ್ಯಾಪಾರಸ್ಥರು ಹೇಳುತ್ತಾರೆ.

‘ತನ್ವೀರ್‌ ಸೇಠ ಅವರು ರಾಯಚೂರು ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದಾಗ ಐಡಿಎಂಪಿಎಸ್ ಲೇಔಟ್, ನಿಜಲಿಂಗಪ್ಪ ಕಾಲೊನಿ, ಜವಾಹರ ಕಾಲೊನಿಯ ಉದ್ಯಾನಗಳಲ್ಲೇ ತರಕಾರಿ ಮಾರುಕಟ್ಟೆ ನಿರ್ಮಿಸಲು ನಿರ್ಧಾರ ಮಾಡಿದ್ದರು. ಆದರೆ, ಅವರ ಯೋಜನೆ ಅನುಷ್ಟಾನಕ್ಕೆ ಬರಲಿಲ್ಲ’ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ.

ರಾಯಚೂರಲ್ಲಿ ಕನಿಷ್ಠ 38 ಹಾಗೂ ಗರಿಷ್ಠ 45 ಡಿಗ್ರಿ ಸೆಲ್ಸಿಯಸ್‌ ತಾಪಮಾನ ಇರುತ್ತದೆ ತರಕಾರಿ ಬಹುಬೇಗ ಬಾಡುತ್ತದೆ. ಕೋಲ್ಡ್‌ಸ್ಟೋರೇಜ್‌ ಇಲ್ಲದ ಕಾರಣ ರೈತರು ಹಾಗೂ ವ್ಯಾಪಾರಸ್ಥರು ಸಹ ತೊಂದರೆ ಅನುಭವಿಸುತ್ತಿದ್ದಾರೆ. ಸರ್ಕಾರ ಎಪಿಎಂಸಿಯಲ್ಲಿ ತರಕಾರಿ ಹಾಗೂ ಹಣ್ಣುಗಳ ಸಂರಕ್ಷಣೆಗೆ ಕೋಲ್ಡ್‌ ಸ್ಟೋರೇಜ್‌ ನಿರ್ಮಾಣ ಮಾಡಬೇಕು‘ ಎಂದು ಮನವಿ ಮಾಡುತ್ತಾರೆ.

‘ಇಲ್ಲಿ ಬೆಳಗಿನ ಜಾವ 3 ಗಂಟೆಗೆ ವ್ಯವಹಾರ ಆರಂಭವಾಗುತ್ತದೆ. ಎಪಿಎಂಸಿ ಆಡಳಿತ ಮಂಡಳಿ ಉಪ ಪ್ರಾಂಗಣದಲ್ಲಿ ಒಳ್ಳೆಯ ರಸ್ತೆ ವಿದ್ಯುತ್‌ ಕಂಬ ಹಾಕಿ ಬೆಳಕಿನ ವ್ಯವಸ್ಥೆ ಮಾಡಿದರೆ ಅನುಕೂಲವಾಗಲಿದೆ‘ ಎಂದು ಮನವಿ ಮಾಡಿಕೊಳ್ಳುತ್ತಾರೆ. ‘ಗಂಜ್‌ನಲ್ಲಿ ಪ್ರತಿ ತಿಂಗಳು ₹ 2ರಿಂದ 3 ಕೋಟಿ ವ್ಯವಹಾರ ನಡೆದರೆ ಉಪ ಪ್ರಾಂಗಣಗಳಲ್ಲಿ 30ರಿಂದ 40 ಲಕ್ಷ ವರೆಗೆ ವ್ಯಾಪಾರ ಆಗುತ್ತದೆ. ಮೂಲಸೌಕರ್ಯ ಒದಗಿಸಿದರೆ ಮಾರುಕಟ್ಟೆ ಇನ್ನೂ ವಿಸ್ತರಣೆಯಾಗಲಿದೆ. ಅಲ್ಲದೇ ಕರ್ನಾಟಕ ಆಂಧ್ರಪ್ರದೇಶ ಹಾಗೂ ತೆಲಂಗಾಣದ ರೈತರಿಗೂ ಅನುಕೂಲವಾಗಿದೆ‘ ಎಂದು ವಿವರಿಸುತ್ತಾರೆ. ಮಹಾರಾಷ್ಟ್ರದ ನಾಸಿಕ ಸಂಗಮನಿಂದ ಟೊಮೆಟೊ ಉತ್ತರಪ್ರದೇಶದ ಲಕ್ನೊದಿಂದ ಆಲೂಗಡ್ಡೆ ಸೋಲಾಪುರ ನಾಸಿಕ ಹಾಗೂ ಅಹಮ್ಮದ್‌ನಗರದಿಂದ ಈರುಳ್ಳಿ ಬೆಳಗಾವಿಯಿಂದ ಹಸಿ ಮೆಣಸಿನಕಾಯಿ ಬೇಸಿಗೆಯಲ್ಲಿ ಕೊತಂಬರಿ ರಾಯಚೂರು ತಾಲ್ಲೂಕು ಹಾಗೂ ನೆರೆಯ ಆಂಧ್ರದ ಗಡಿ ಗ್ರಾಮಗಳಿಂದ ಬದನೆಕಾಯಿ ಬೆಂಡೆಕಾಯಿ ಚೌಳೆಕಾಯಿ ಮೆಣಸಿನಕಾಯಿ ಬರುತ್ತದೆ. ತಿಂಗಳಿಗೆ ₹ 30ರಿಂದ ₹40 ಲಕ್ಷದ ವರೆಗೆ ವಹಿವಾಟು ನಡೆಯುತ್ತದೆ.