ನಗರದ ರೈಲು ನಿಲ್ದಾಣ ಸುತ್ತಮುತ್ತ ಹಾಗೂ ಸ್ಟೇಷನ್ ರಸ್ತೆಯಲ್ಲಿ ಸಮೋಸ ಸೇರಿದಂತೆ ನಾನಾ ಬಗೆಯ ಖಾದ್ಯ ಗಳನ್ನು ರಂಜಾನ್ಗೆಂದೇ ಸಿದ್ಧಪಡಿಸಲಾಗುತ್ತಿದೆ. ದಿನವಿಡೀ ಉಪವಾಸ ಇರುವ ಮುಸ್ಲಿಮರು ಸಂಜೆ ಉಪವಾಸ ವ್ರತ ಮುಕ್ತಾಯದ ಬಳಿಕ ಇಲ್ಲಿ ಸಮೋಸ, ಕಲ್ಲಂಗಡಿ–ಖರ್ಬೂಜ, ಖರ್ಜೂರ ಮೊದಲಾದವುಗಳನ್ನು ಖರೀದಿಸಿ ಹೋಗುತ್ತಿದ್ದಾರೆ. ಇದಲ್ಲದೇ ಅಂಗಡಿಗಳಲ್ಲಿ ಹೊಸ ಬಟ್ಟೆ, ಮಹಿಳೆಯರಿಂದ ಬಳೆ ಮೊದಲಾದ ಅಲಂಕಾರಿಕ ಸಾಮಗ್ರಿಗಳ ಖರೀದಿಗೂ ಜೋರಾಗಿದೆ. ‘ರಂಜಾನ್ ಅವಧಿಯಲ್ಲಿ ಸಮೋಸಕ್ಕೆ ವಿಶಿಷ್ಟ ಸ್ಥಾನ ಇದೆ. ಎಲ್ಲೆಡೆ ಸಾಮಾನ್ಯವಾಗಿ ಈ ತಿನಿಸು ಇದ್ದೇ ಇರುತ್ತದೆ. ಇದರೊಟ್ಟಿಗೆ ಕೆಲವು ವಿಶೇಷವಾದ ಪಾನೀಯಗಳನ್ನೂ ತಯಾರಿಸುತ್ತೇವೆ. ಸಂಜೆ ಉಪವಾಸ ಕೈಬಿಟ್ಟ ಬಳಿಕ ವ್ಯಾಪಾರ ಆರಂಭ ಗೊಂಡು ರಾತ್ರಿವರೆಗೂ ನಡೆಯುತ್ತದೆ’ ಎನ್ನುತ್ತಾರೆ ಸ್ಟೇಷನ್ ರಸ್ತೆಯ ವ್ಯಾಪಾರಿ ಮೊಹಮ್ಮದ್.