ಕೊರೊನಾ ಲಾಕ್‌ಡೌನ್‌ ತೆರವಾಗಿರುವ ಕಾರಣ ಪ್ರವಾಸಿಗರು ಲಗ್ಗೆ ಇಡುತ್ತಿದ್ದು, 4 ತಿಂಗಳಿನಿಂದ ಬದುಕಿನ ಬಂಡಿ ಸಾಗಿಸಲು ಆಗದೆ ಸಂಕಷ್ಟದಲ್ಲಿದ್ದ ಛಾಯಾಗ್ರಾಹಕರ ಮೊಗದಲ್ಲಿ ಸಂತಸ ಮೂಡಿದೆ.

ಮೂಲೆಗಿರಿಸಿದ್ದ ಕ್ಯಾಮೆರಾವನ್ನು ಹೆಗಲಿಗೇರಿಸಿಕೊಂಡು ಜಲಪಾತದ ವಿವಿಧ ಕೋನಗಳಲ್ಲಿ ಕಂಡು ಬರುವ ಸೊಬಗನ್ನು ಸೆರೆ ಹಿಡಿದು ಪ್ರವಾಸಿಗರನ್ನು ಸೆಳೆಯುತ್ತಿದ್ದಾರೆ.

‘ಜೋಗ ಜಲಪಾತ ಸಾರ್ವಜನಿಕರ ವೀಕ್ಷಣೆಗೆ ಅವಕಾಶ ದೊರೆಯುವುದನ್ನೇ ಚಾತಕ ಪಕ್ಷಿಗಳಂತೆ ಕಾದು ಕುಳಿತಿದ್ದೆವು. ಅಂತೂ ಇಂತೂ ಜಲಪಾತ ವೀಕ್ಷಣೆಗೆ ಪ್ರವಾಸಿಗರಿಗೆ ಅವಕಾಶ ಕಲ್ಪಿಸಿರುವುದು ಸಂತಸ ತಂದಿದೆ. ಪ್ರವಾಸಿಗರೂ ಬರುತ್ತಿದ್ದಾರೆ’ ಎಂದು ಛಾಯಾಗ್ರಾಹಕ ವೆಂಕಟೇಶ ಹೇಳಿದರು.