ಹೊನ್ನಾವರ: ಮಳೆಗಾಲ ಪೂರ್ವದ ಕೆಲಸಕ್ಕೆ ವೇಗ

ಮನೆ, ಅಂಗಡಿ, ದನದ ಕೊಟ್ಟಿಗೆ ಹೀಗೆ ವಿವಿಧ ರೀತಿಯ ಕಟ್ಟಡಗಳನ್ನು ರಿಪೇರಿ ಮಾಡುವ ಕೆಲಸ ಹಲವರದ್ದಾಗಿದೆ. ಹೊಸ ಮನೆ ಹಾಗೂ ಉಳಿದ ಕಟ್ಟಡಗಳನ್ನು ಪೂರ್ಣಗೊಳಿಸಲು ಕೆಲವರು ಹೆಣಗಾಡುತ್ತಿದ್ದಾರೆ. ಕೊಬ್ಬರಿ ತಯಾರಿಸುವುದು, ಹೊಲ-ಗದ್ದೆಗಳಿಗೆ ತರಗೆಲೆಗಳ ಗೊಬ್ಬರ ಹಾಕುವುದು, ಅಡಿಕೆ ಮಿಳ್ಳೆ ಉದುರದಂತೆ ಮದ್ದು ಸಿಂಪಡಣೆ ಮೊದಲಾದ ಕೆಲಸಗಳನ್ನು ತುರ್ತಾಗಿ ಪೂರ್ಣಗೊಳಿಸುವ ಧಾವಂತದಲ್ಲಿದ್ದಾರೆ.

ಲಾಕ್‌ಡೌನ್ ಕಾರಣದಿಂದ ವಾಹನಗಳ ಸಂಚಾರಕ್ಕೆ ನಿಯಂತ್ರಣ ಹೇರಲಾಗಿದೆ. ಇದರಿಂದ ಕೆಲವೆಡೆ ಕೂಲಿಕಾರರು ಕೆಲಸ ಕಳೆದುಕೊಂಡಿದ್ದರೆ, ಇನ್ನು ಕೆಲವೆಡೆ ಕೂಲಿಕಾರರ ಕೃತಕ ಅಭಾವ ಸೃಷ್ಟಿಯಾಗಿದೆ.

ಬೆಂಗಳೂರು, ಗೋವಾ ಮತ್ತಿತರ ಸ್ಥಳಗಳಲ್ಲಿ ಕೆಲಸದಲ್ಲಿದ್ದ ಅನೇಕರು ಮನೆಗೆ ವಾಪಸಾಗಿದ್ದಾರೆ. ಮದುವೆ ಮತ್ತಿತರ ಸಮಾರಂಭಗಳಿಗೆ ಆಮಂತ್ರಣವಿದ್ದರೂ ಹಾಜರಾಗಲು ಸಾಧ್ಯವಾಗುತ್ತಿಲ್ಲ. ಹಾಗಾಗಿ ಕೆಲವು ಮನೆಗಳಲ್ಲಿ ಅಣ್ಣ– ತಮ್ಮಂದಿರು ಹಾಗೂ ಇತರ ಸದಸ್ಯರು ಸೇರಿಕೊಂಡು ಮನೆ, ತೋಟದ ಕೆಲಸ ಮಾಡಿಕೊಳ್ಳುತ್ತಿರುವುದು ಕಂಡುಬರುತ್ತಿದೆ.

‘ಮಳೆಗಾಲದ ಪೂರ್ವದಲ್ಲಿ ಹಿಂದೆಲ್ಲ ನಮಗೆ ಪುರುಸೊತ್ತೇ ಇರುತ್ತಿರಲಿಲ್ಲ. ಈ ಬಾರಿ ಕೆಲಸದ ಒತ್ತಡ ಅಷ್ಟೊಂದಿಲ್ಲ. ಕೂಲಿ ಹಣ ಇಂತಿಷ್ಟೇ ಬೇಕು ಎಂದು ಪಟ್ಟುಹಿಡಿಯುವಂತಿಲ್ಲ. ಕೋವಿಡ್ ಭಯದ ನಡುವೆ ಅನಿವಾರ್ಯವಾಗಿ ಕೆಲಸ ಮಾಡುತ್ತಿದ್ದೇವೆ’ ಎಂದು ಹೆರಾವಲಿ ಗ್ರಾಮದ ದನದ ಕೊಟ್ಟಿಗೆಯೊಂದಕ್ಕೆ ಸೋಗೆ ಹೊದಿಕೆ ಮಾಡುತ್ತಿದ್ದ ಸುಬ್ರಹ್ಮಣ್ಯ ನಾಯ್ಕ ಹೇಳಿದರು.

ಮಹಿಳೆಯರು ಅಡುಗೆ ಕೆಲಸದ ಜೊತೆಗೆ ಹಪ್ಪಳ– ಸಂಡಿಗೆ ಮಾಡುವುದರಲ್ಲಿ ತಲ್ಲೀನರಾಗಿದ್ದಾರೆ. ಶಾಲಾ– ಕಾಲೇಜುಗಳು ಮುಚ್ಚಿರುವುದರಿಂದ ಮನೆಯಲ್ಲೇ ಇರುವ ಮಕ್ಕಳು ಇವರ ಸಹಾಯಕ್ಕೆ ನಿಂತಿರುವುದನ್ನು ಕೆಲವು ಮನೆಗಳಲ್ಲಿ ಕಾಣಬಹುದಾಗಿದೆ.

ಹಲಸು, ಮಾವು ಮೊದಲಾದ ಹಣ್ಣಿನ ಬೆಳೆಗಳು ಈ ಬಾರಿ ಬೆಳೆಯಲು ತಡವಾಗಿದೆ. ಈಗಷ್ಟೇ ಈ ಹಣ್ಣುಗಳು ಕೊಯ್ಲಿಗೆ ಸಿಗುತ್ತಿವೆ. ಆಗಾಗ ಮೋಡ ಕವಿಯುತ್ತಿರುವುದರಿಂದ ಮಳೆಗಾಲಕ್ಕಾಗಿ ಈ ಹಣ್ಣುಗಳ ಉತ್ಪನ್ನಗಳನ್ನು ತಯಾರಿಸುವ ಕೆಲಸಕ್ಕೆ ವೇಗ ಸಿಕ್ಕಿದೆ. ಹಳ್ಳಿಗಳಲ್ಲಿ ಅಕ್ಕಪಕ್ಕದ ಮನೆಯವರು ಹಾಗೂ ನೆಂಟರಿಷ್ಟರ ಸಹಕಾರದೊಂದಿಗೆ ನಡೆಯುತ್ತಿದ್ದ ಇಂಥ ಹಲವು ಮುಂಗಾರು ಪೂರ್ವ ಹಂಗಾಮಿನ ಕೆಲಸಗಳಿಗೆ ಕೋವಿಡ್ ಪೆಟ್ಟು ನೀಡಿದೆ.