ಕಾರವಾರ: ನಗರಸಭೆ ವ್ಯಾಪ್ತಿಯ ಗುಡ್ಡೆಹಳ್ಳಿ ರಸ್ತೆ ಶಾಪಗ್ರಸ್ತ

‘ಗ್ರಾಮಕ್ಕೆ 1.2 ಕಿ.ಮೀ ಉದ್ದದ ರಸ್ತೆ ಸುಧಾರಣೆಗೆ ₹50 ಲಕ್ಷ ಮಂಜೂರಾಗಿತ್ತು. ಈವರೆಗೆ ಕೆಲಸ ಸರಿಯಾಗಿ ನಡೆದಿಲ್ಲ. ಕೆಲವೇ ಅಡಿಗಳಷ್ಟು ದೂರದವರೆಗೆ ಜಲ್ಲಿ ಕಲ್ಲು ಮಿಶ್ರಣ ಮಾಡಿದ್ದರು. ಉಳಿದ ಕೆಲಸವನ್ನು ಈವರೆಗೆ ಮಾಡಿಲ್ಲ’ ಎಂದು ಗುಡ್ಡೆಹಳ್ಳಿ ಗ್ರಾಮಸ್ಥರು ಆರೋಪಿಸಿದ್ದಾರೆ. ‘ಶವವನ್ನು ಕೋಲಿಗೆ ಕಟ್ಟಿಕೊಂಡು ಸಾಗಿದ ಘಟನೆ ನಡೆದ ಬಳಿಕ ಎಚ್ಚೆತ್ತುಕೊಂಡು ಜಲ್ಲಿ ಹರವಿದ್ದ ರಸ್ತೆಯ ಮೇಲೆ ಮಣ್ಣು ಹಾಸುವ ಕೆಲಸ ನಡೆದಿದೆ. ಉಳಿದ ಭಾಗ ದುರಸ್ತಿಪಡಿಸುವ ಕೆಲಸವನ್ನೂ ಕೈಗೊಳ್ಳಬೇಕು’ ಎಂದೂ ಹೇಳಿದ್ದಾರೆ. ರಸ್ತೆ ಸುಧಾರಣೆ ಕಾಮಗಾರಿ ನಡೆಯದ ಕುರಿತು ಮಾಹಿತಿಗೆ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳನ್ನು ಸಂಪರ್ಕಿಸಲು ಯತ್ನಿಸಲಾಯಿತಾದರೂ ಅವರು ಸಂಪರ್ಕಕ್ಕೆ ಸಿಕ್ಕಿಲ್ಲ.