ಕುಮಟಾ: ನಿರಂತರ ಮಳೆಯಿಂದ ತಾಲ್ಲೂಕಿನ ದೀವಳ್ಳಿ ಗ್ರಾಮದ ಅಘನಾಶಿನಿ ದಡದ ಕಲ್ಲಾರೆಮಕ್ಕಿ ಎಂಬಲ್ಲಿ ಎರಡು ಮನೆಗಳ ಬಳಿ ಇರುವ ಗುಡ್ಡ ಕುಸಿದು ಅಪಾಯದ ಮುನ್ಸೂಚನೆ ನೀಡಿದೆ.
ಮಾಹಿತಿ ನೀಡಿದ ಪ್ರಭಾರ ತಹಶೀಲ್ದಾರ್ ಸತೀಶ ಗೌಡ, ‘ಈ ಪ್ರದೇಶದಲ್ಲಿ ಎರಡು ಮನೆಗಳಿದ್ದು ಕೆಳಭಾಗದಲ್ಲಿರುವ ಗುಡ್ಡದ ಮಣ್ಣು ಸಡಿಲವಾಗಿ ಕುಸಿತ ಉಂಟಾಗಿದೆ. ಕುಸಿದ ಜಾಗ ಇನ್ನಷ್ಟು ಕುಸಿಯುವ ಅಪಾಯವಿದೆ. ಎರಡೂ ಕುಟುಂಬಗಳಿಗೆ ಸುರಕ್ಷಿತ ಸ್ಥಳಕ್ಕೆ ತೆರಳುವಂತೆ ಕಟ್ಟುನಿಟ್ಟಾಗಿ ಸೂಚಿಸಲಾಗಿದೆ.
ಕಂದಾಯ ನಿರೀಕ್ಷಕರು ಹಾಗೂ ಗ್ರಾಮ ಲೆಕ್ಕಿಗರಿಗೆ ಎರಡೂ ಕುಟುಂಬಗಳನ್ನು ಸ್ಥಳಾಂತರಗೊಳಿಸುವಂತೆ ಸೂಚಿಸಲಾಗಿದೆ. ತಾಲ್ಲೂಕಿನ ಗೋಕರ್ಣ ಸಮೀಪದ ಬಂಗ್ಲೆಗುಡ್ಡದಲ್ಲಿ ಶಾಂತಿ ಗೌಡ ಅವರ ಮನೆ ಕುಸಿದು ಬಿದ್ದು ಸುಮಾರು ₹ 13 ಸಾವಿರ ಹಾನಿ ಸಂಭವಿಸಿದೆ ಎಂದರು.
