ಯಾದಗಿರಿ: 4.01 ಲಕ್ಷ ಹೆಕ್ಟೇರ್ ಬಿತ್ತನೆ ಗುರಿ

ಶಹಾಪುರ: ಕೃಷ್ಣಾ ಅಚ್ಚುಕಟ್ಟು ಪ್ರದೇಶದ ವ್ಯಾಪ್ತಿಯಲ್ಲಿ ಪ್ರತಿ ವರ್ಷ ಒಂದಿಲ್ಲ ಒಂದು ನಕಲಿ ಹತ್ತಿ ಬೀಜ ಮಾರಾಟ ಪ್ರಕರಣ ಬೆಳಕಿಗೆ ಬರುತ್ತಲಿವೆ. ಬಿತ್ತನೆಯ ಸಮಯದ ವಾರದ ಸಂತೆಯಲ್ಲಿ ಹಾಗೂ ನೆರೆ ರಾಜ್ಯ ತೆಲಂಗಾಣದಿಂದ ಮತ್ತು ಗುಂಟೂರು ಆದೋನಿ ಮುಂತಾದ ಕಡೆಯಿಂದ ನಕಲಿ ಹತ್ತಿ ಬೀಜ ಬರುತ್ತವೆ. ಅದನ್ನು ನಿಯಂತ್ರಿಸಬೇಕು ಎನ್ನುತ್ತಾರೆ ರೈತರು. ‘ಬಹುತೇಕ ಹತ್ತಿಯ ವಿವಿಧ ತಳಿಯ ಬೀಜದ ಕಂಪನಿಗಳು ಶಹಾಪುರದಲ್ಲಿ ನೆಲೆಸಿವೆ. ರೈತರು ಸಿಂದಗಿ ಜೇವರ್ಗಿ ದೇವದುರ್ಗ ಸುರಪುರ ಮುಂತಾದ ಕಡೆಯಿಂದ ರೈತರು ಆಗಮಿಸಿ ಖರೀದಿಸುತ್ತಾರೆ. ಆಗ ಬೀಜಗಳ ಕೃತಕ ಅಭಾವ ಸೃಷ್ಟಿ ಮಾಡುವುದರ ಜತೆಗೆ ದುಬಾರಿ ಬೆಲೆಗೆ ಮಾರಾಟ ಮಾಡುತ್ತಾರೆ. ಅಂಥ ಸಮಯದಲ್ಲಿಯೇ ಕೆಲ ರಸಗೊಬ್ಬರ ಅಂಗಡಿಯವರು ನಕಲಿ ಹತ್ತಿ ಬೀಜ ಮಾರಾಟ ಮಾಡುತ್ತಾರೆ ರೈತರು ಜಾಗೃತರಾಗಬೇಕು. ಕಡ್ಡಾಯವಾಗಿ ಬೀಜ ಖರೀದಿಯ ರಸೀದಿ ಪಡೆಯಬೇಕು’ ಎಂದು ಪ್ರಾಂತ ರೈತ ಸಂಘದ ಜಿಲ್ಲಾ ಘಟಕದ ಅಧ್ಯಕ್ಷ ಚೆನ್ನಪ್ಪ ಆನೆಗುಂದಿ ರೈತರಲ್ಲಿ ಮನವಿ ಮಾಡಿದ್ದಾರೆ. ‘ನೆರೆ ರಾಜ್ಯದಿಂದ ಕೆಲ ವ್ಯಕ್ತಿಗಳು ನಗರದ ಶುಕ್ರವಾರ ಸಂತೆಯ ದಿನ ಆಯಕಟ್ಟಿನ ಸ್ಥಳದಲ್ಲಿ ಉಳಿದುಕೊಂಡು ಕಡಿಮೆ ಬೆಲೆಗೆ ಹತ್ತಿ ಬೀಜ ನೀಡುತ್ತೇವೆ ಎಂದು ನಂಬಿಸಿ ನಕಲಿ ಬೀಜ ನೀಡುತ್ತಾರೆ. ಇದರ ಬಗ್ಗೆ ಕೃಷಿ ಇಲಾಖೆ ಹಾಗೂ ರೈತರು ಎಚ್ಚರಿಕೆ ವಹಿಸಬೇಕು. ಕಳೆದ ವರ್ಷ ನಕಲಿ ಬೀಜ ಮಾರಾಟ ಮಾಡಿದ ಬಗ್ಗೆ ಕಂಪನಿ ಒಂದರ ಮೇಲೆ ಶಹಾಪುರ ಠಾಣೆಯಲ್ಲಿ ಎರಡು ಪ್ರತ್ಯೇಕ ಪ್ರಕರಣ ದಾಖಲಾಗುವಂತೆ ಮಾಡಿದ್ದೆವು’ ಎನ್ನುತ್ತಾರೆ ಅವರು.

ಕೃಷ್ಣಾ ಅಚ್ಚುಕಟ್ಟು ಪ್ರದೇಶದಲ್ಲಿ ನಿಷೇಧಿತ ಬೆಳೆ ಭತ್ತ ಹಾಗೂ ಹತ್ತಿ ಬೆಳೆಯನ್ನು ಬಿತ್ತನೆ ಮಾಡಿದಾಗ ಎರಡು ಬೆಳೆಗೆ ಹೆಚ್ಚಿನ ರಸಗೊಬ್ಬರದ ಬೇಡಿಕೆ ಇರುತ್ತದೆ. ಆಗ ಕೆಲ ಕಂಪನಿಗಳು ಸಾಕಷ್ಟು ದಾಸ್ತಾನು ಇಟ್ಟುಕೊಂಡರೂ ಕೃತಕ ರಸಗೊಬ್ಬರ ಸೃಷ್ಟಿ ಮಾಡಿ ರೈತರಿಂದ ಹೆಚ್ಚಿನ ಹಣ ವಸೂಲಿ ಮಾಡುತ್ತಾರೆ. ‘ಕೃಷಿ ಇಲಾಖೆ ಹಾಗೂ ಜಿಲ್ಲಾಡಳಿತ ಎಚ್ಚೆತ್ತುಕೊಂಡು ಕೃತಕ ರಸಗೊಬ್ಬರ ಅಭಾವ ಉಂಟು ಮಾಡದಂತೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕು’ ಎಂದು ರೈತ ಮುಖಂಡ ಸಿದ್ದಯ್ಯ ಹಿರೇಮಠ ಮನವಿ ಮಾಡಿದ್ದಾರೆ.

ಗುರುಮಠಕಲ್‌: ತಾಲ್ಲೂಕು ವ್ಯಾಪ್ತಿಯಲ್ಲಿ ಪ್ರಸಕ್ತ ಸಾಲಿನ ಮುಂಗಾರು ಅವಧಿಯಲ್ಲಿ 55 ಸಾವಿರ ಹೆಕ್ಟೇರ್‌ ಬಿತ್ತನೆ ಗುರಿ ಹೊಂದಿದೆ ಎಂದು ಕೃಷಿ ಇಲಾಖೆ ತಿಳಿಸಿದೆ. 21 ಸಾವಿರ ಹೆಕ್ಟೇರ್‌ ಹತ್ತಿ 12 ಸಾವಿರ ಹೆಕ್ಟೇರ್‌ ತೊಗರಿ 3.5 ಸಾವಿರ ಹೆಕ್ಟೇರ್‌ ಹೆಸರು 300 ಹೆಕ್ಟೇರ್‌ ಉದ್ದು ಹೀಗೆ ವಿವಿಧ ಬಗೆಯ ಮುಂಗಾರು ಅವಧಿಯ ಬೆಳೆಗಳ ಒಟ್ಟು 55 ಸಾವಿರ ಹೆಕ್ಟೇರ್‌ ಬಿತ್ತನೆಯ ನಿರೀಕ್ಷೆಯಿದೆ. ‘ಈಗಾಗಲೇ 500 ಕ್ವಿಂಟಲ್‌ ಭತ್ತ 200 ಕ್ವಿಂಟಲ್‌ ತೊಗರಿ 70 ಕ್ವಿಂಟಲ್‌ ಹೆಸರು 10 ಕ್ವಿಂಟಲ್‌ ಉದ್ದು ಬಿತ್ತನೆ ಬೀಜಕ್ಕಾಗಿ ಪ್ರಸ್ತಾವನೆ ಸಲ್ಲಿಸಿದ್ದು ಸದ್ಯ 9 ಕ್ವಿಂಟಲ್‌ ತೊಗರಿ 6 ಕ್ವಿಂಟಲ್‌ ಹೆಸರು ಬೀಜದ ದಾಸ್ತಾನು ಲಭ್ಯವಿದೆ. ಇನ್ನೂ ರೈತರಿಂದ ಯಾವುದೇ ಬೇಡಿಕೆ ಬಂದಿಲ್ಲ. ಆದರೆ ಮುಂಗಾರು ಕೃಷಿ ಚಟುವಟಿಕೆಗಾಗಿ ನಾವು ಸಿದ್ಧತೆ ಮಾಡಿಕೊಂಡಿದ್ದೇವೆ’ ಎಂದು ಕೃಷಿ ಅಧಿಕಾರಿ ಮಲ್ಲಿಕಾರ್ಜುನ ವಾರದ ತಿಳಿಸಿದರು. ‘ಸಮಪರ್ಕ ಪೂರ್ವ ಮುಂಗಾರು ಮಳೆಯಾಗಿದ್ದರೆ ಜಮೀನಿನ ಮಣ್ಣು ಹದಗೊಳ್ಳುತ್ತಿತ್ತು. ಸದ್ಯ ಕುಂಟೆ ಹೊಡೆದು ಜಮೀನನ್ನು ಹಸನುಗೊಳಿಸಿದ್ದಾಗಿದೆ. ಸಮಯಕ್ಕೆ ಸರಿಯಾಗಿ ಮಳೆಯಾದರೆ ಬಿತ್ತನೆ ಮಾಡಲು ಸಿದ್ಧತೆ ಮಾಡಿಕೊಳ್ಳಬಹುದು’ ಎಂದು ರೈತರಾದ ಪ್ರಸಾದ ಮಹಾದೇವ ಹೇಳಿದರು. ‘ಈ ವರ್ಷವೂ ಸರಿಯಾಗಿ ಮಳೆಯಾಗುವ ಕುರಿತು ಸಂಶಯವಿದೆ. ರೈತರ ಬದುಕು ಸದಾ ಅದೃಷ್ಟದ ಬೆನ್ನತ್ತಿದವರಿಗೆ ದುರಾದೃಷ್ಟವೇ ಬೆನ್ನತ್ತಿದಂತಿದೆ ಮತ್ತು ದಿನೇ-ದಿನೆ ಬೀಜ ಗೊಬ್ಬರ ಸಾಮಾಗ್ರಿಗಳ ಬೆಲೆ ಹೆಚ್ಚುತ್ತಿದೆ. ಆದರೆ ನಿರೀಕ್ಷಿತ ಫಸಲು ಬೆಳೆಗೆ ಸರಿಯಾದ ಬೆಲೆ ಮಾತ್ರ ಸಿಗದು’ ಎಂದು ಹಿರಿಯ ರೈತರೊಬ್ಬರು ನೋವು ತೋಡಿಕೊಂಡರು.

ಹುಣಸಗಿ: ಪಟ್ಟಣ ಸೇರಿದಂತೆ ತಾಲ್ಲೂಕಿನ ವ್ಯಾಪ್ತಿಯಲ್ಲಿ ಬರುವ ಹಳ್ಳಿಯಲ್ಲಿ ಮುಂಗಾರು ಹಂಗಾಮಿಗೆ ಬೇಕಾಗಿರುವ ಬೀಜ ಗೊಬ್ಬರದ ಅಗತ್ಯ ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ ಎಂದು ಹುಣಸಗಿ ರೈತ ಸಂಪರ್ಕ ಕೇಂದ್ರದ ಅಧಿಕಾರಿ ಸಿದ್ದಾರ್ಥ್ ಪಾಟೀಲ ತಿಳಿಸಿದರು. ಈಗಾಗಲೇ ರಸಗೊಬ್ಬರ ಮಳಿಗೆಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು ಹಾಗೂ ಸರಬರಾಜು ಮಾಡಲಾಗಿರುವ ಬೀಜ ಹಾಗೂ ಗೊಬ್ಬರ ಕುರಿತಂತೆ ಸ್ಯಾಂಪಲ್ ಪಡೆದುಕೊಳ್ಳಲಾಗಿದೆ ಎಂದು ಹೇಳಿದರು. ತಾಲ್ಲೂಕಿನಲ್ಲಿ ಕಳಪೆ ಬೀಜ ವಿತರಣೆಯಾಗದಂತೆ ಮುಂಜಾಗ್ರತೆ ವಹಿಸಲಾಗಿದ್ದು ರೈತರು ಕೂಡ ಖರೀದಿಸಿದ ಬೀಜ ಹಾಗೂ ರಸಗೊಬ್ಬರಕ್ಕೆ ರಸೀದಿ ಪಡೆಯುವಂತೆ ಹೇಳಿದರು. ಹುಣಸಗಿ ತಾಲ್ಲೂಕಿನಲ್ಲಿ ಬಹುತೇಕ ಭತ್ತ ನಾಟಿ ಮಾಡಲಿದ್ದು ಉಳಿದಂತೆ ಸುಮಾರು 2000 ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಹೆಸರು ಸಜ್ಜಿ ಸೂರ್ಯಕಾಂತಿ ಬಿತ್ತನೆ ಮಾಡಲಿದ್ದಾರೆ ಎಂದು ವಿವರಿಸಿದರು.