ಗಣಿತದ ಬಗ್ಗೆ ಭಯ ಸಲ್ಲದು

* ಸಮರೂಪ ತ್ರಿಭುಜಗಳ ಮೇಲೆ ನಾಲ್ಕು ಪ್ರಮೇಯಗಳಿವೆ. ಅವುಗಳಲ್ಲಿ ಒಂದಂತೂ ಬರುತ್ತದೆ. ಅದರಲ್ಲಿ ಮುಖ್ಯವಾಗಿ ತೇಲ್ಸನ ಪ್ರಮೇಯ, ಕೋನ ಕೋನ ನಿರ್ಧಾರಕ ಗುಣ ಪ್ರಮೇಯ, ತ್ರಿಭುಜಗಳ ವಿಸ್ತೀರ್ಣದ ಮೇಲೆ ಪ್ರಮೇಯ ಹಾಗೂ ಪೈಥಾವರ್ಸನ ಪ್ರಮೇಯ. ಈ ನಾಲ್ಕಕ್ಕೆ ಸಿದ್ಧವಾಗಿರಬೇಕು.

* ವೃತ್ತಗಳ ಮೇಲೆ 2 ಪ್ರಮೇಯಗಳಿವೆ. 2ನೇ ಪ್ರಮೇಯ (ವೃತ್ತಕ್ಕೆ ಬಾಹ್ಯ ಬಿಂದುವಿನಿಂದ ಎರಡು ಸ್ಪರ್ಶಕಗಳು ಸಮನಾಗಿರುತ್ತವೆ). ಇದು ಪರೀಕ್ಷೆಯಲ್ಲಿ ಬರುವ ಸಾಧ್ಯತೆ ಇದೆ.

* 12 ಅಂಕಗಳಿಗೆ ರಚನೆಗಳು ಬರುತ್ತವೆ. 4 ಅಂಕದ್ದು 1, 3 ಅಂಕದ್ದು 2 ಹಾಗೂ 2 ಅಂಕದ ಒಂದು ಪ್ರಶ್ನೆಗಳು ಬರುತ್ತವೆ. ಈ ರಚನೆಗಳ ಬಗ್ಗೆ ತಿಳಿದುಕೊಂಡಿರಬೇಕು.

* ಸಂಖ್ಯಾಶಾಸ್ತ್ರಕ್ಕೆ ಸಂಬಂಧಿಸಿದಂತೆ ಸರಾಸರಿ, ಮಧ್ಯಾಂಕ, ಬೌಲಕ ಅಥವಾ ರೂಢಿಬೆಲೆ – ಇವುಗಳಿಗೆ ಸೂತ್ರಗಳಿವೆ. ಅವುಗಳನ್ನು ಚೆನ್ನಾಗಿ ನೆನಪಿನಲ್ಲಿಟ್ಟುಕೊಂಡರೆ ಸಮಸ್ಯೆ ಬಿಡಿಸಬಹುದು.

* ವರ್ಗ ಸಮೀಕರಣ ವಿಭಾಗದಲ್ಲಿ ‘ಸೂತ್ರದ ಸಹಾಯದಿಂದ ಸಮೀಕರಣವನ್ನು ಬಿಡಿಸಿ’ ಎನ್ನುವ ಪ್ರಶ್ನೆ ಸಾಮಾನ್ಯವಾಗಿ ಬರುತ್ತದೆ. ಅದಕ್ಕೆ ಸಿದ್ಧವಾಗಬೇಕು.

* ವಾಸ್ತವ ಸಂಖ್ಯೆ (ರಿಯಲ್‌ ನಂಬರ್ಸ್‌)ಯಲ್ಲಿ ರೂಟ್ 2, 3, 5 ಅಥವಾ 7 ಇದರಲ್ಲಿ ಯಾವುದಾದರೂ ಒಂದು ಬರುತ್ತದೆ. ಇತ್ತ ಗಮನಹರಿಸಬೇಕು.

* ನಿರ್ದೇಶಾಂಕ ರೇಖಾಗಣಿತ ಪಾಠದಲ್ಲಿ 4 ಸೂತ್ರಗಳು ಬರುತ್ತವೆ. ದೂರದ ಸೂತ್ರ, ಭಾಗಪ್ರಮಾಣದ ಸೂತ್ರ, ಮಧ್ಯ ಬಿಂದುವಿನ ಸೂತ್ರ ಹಾಗೂ ತ್ರಿಭುಜದ ವಿಸ್ತೀರ್ಣದ ಸೂತ್ರಗಳು ಇವಾಗಿವೆ. ಇವುಗಳನ್ನು ಚೆನ್ನಾಗಿ ನೆನಪಿಟ್ಟುಕೊಂಡರೆ ಸಮಸ್ಯೆಗಳನ್ನು ಸುಲಭವಾಗಿ ಬಿಡಿಸಬಹುದು. ಅದರಿಂದ 5 ಅಂಕಗಳನ್ನು ಪಡೆಯಬಹುದು.

* ಈ ಮೇಲಿನ ಪಾಠಗಳು ಗೊತ್ತಿದ್ದರೆ ಸರಾಸರಿ 32 ಅಂಕಗಳು ಬರುತ್ತವೆ. ಮಲ್ಟಿಪಲ್‌ ಚಾಯ್ಸ್ ಹಾಗೂ ಡೈರಕ್ಟ್‌ ಪ್ರಶ್ನೆಗಳ ವಿಭಾಗದಲ್ಲಿ 8ರಿಂದ 10 ಅಂಕ ಪಡೆದರೆ 40 ಅಂಕಗಳನ್ನು ಗಳಿಸಬಹುದಾಗಿದೆ.

* ಪ್ರಶ್ನೆಪತ್ರಿಕೆ ದೊರೆತಾಗ ಮೊದಲಿಗೆ ರಚನೆಗಳಿಗೆ ಆದ್ಯತೆ ನೀಡಬೇಕು. ನಂತರ ಪ್ರಮೇಯಗಳನ್ನು ಸಾಧಿಸಬೇಕು. ಬಳಿಕ ಉಳಿದವುಗಳನ್ನು ಬಿಡಿಸಬೇಕು.

* ಗಣಿತ ಪರೀಕ್ಷೆಗೆ ಈ ಬಾರಿ ಮೂರು ದಿನಗಳು ಗ್ಯಾಪ್‌ ಇರುತ್ತದೆ. ಆಗ ಹೆಚ್ಚಿನ ಗಮನಹರಿಸಿದರೆ, ಹೆಚ್ಚಿನ ಸ್ಕೋರ್ ಮಾಡಬಹುದಾಗಿದೆ.

– ಎಸ್.ಎಂ. ಬಡ್ಡೂರ, ಗಣಿತ ವಿಷಯ ಸಂಪನ್ಮೂಲ ವ್ಯಕ್ತಿ ಹಾಗೂ ಮುಖ್ಯಶಿಕ್ಷಕರು, ಕನ್ನಡ ಮಾಧ್ಯಮ ಪ್ರೌಢಶಾಲೆ, ಮಹಾಂತೇಶ ನಗರ, ಬೆಳಗಾವಿ