ರಣವೀರ್ ತಂಗಿ ರಿತಿಕಾ ಭವ್ನಾನಿ ಅಣ್ಣ ಮತ್ತು ಅತ್ತಿಗೆಗೋಸ್ಕರ ವಿಶೇಷ ಕಾಳಜಿಯಿಂದ ಆಯೋಜಿಸಿದ್ದ ಪಾರ್ಟಿ ಇದಾಗಿತ್ತು. ಬಣ್ಣಬಣ್ಣದ ಅಂಗಿ ತೊಟ್ಟು ಬಣ್ಣದ ದೀಪಗಳ ಮಧ್ಯೆ ಪಾರ್ಟಿಗೆ ಕಳೆ ತಂದಿದ್ದ ಈ ಜೋಡಿ ವೇದಿಕೆ ಮೇಲೆ ಮಾತನಾಡಿದ ವಿಡಿಯೊ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ. ‘ಸ್ನೇಹಿತರೇ, ನಾನೀಗ ಜಗತ್ತಿನ ಅತ್ಯಂತ ಸುಂದರ ಹುಡುಗಿಯನ್ನು ಮದುವೆಯಾಗಿದ್ದೇನೆ... ’ಎಂದು ಅತ್ತ ರಣವೀರ್ ಮೈಕ್ ಹಿಡಿದು ದೊಡ್ಡ ದನಿಯಲ್ಲಿ ಹೇಳುತ್ತಿದ್ದರೆ, ಇತ್ತ ದೀಪಿಕಾಳ ಗುಳಿ ಕೆನ್ನೆಗಳಲ್ಲಿ ಗುಲಾಬಿ ಬಣ್ಣದ ಓಕುಳಿ. ನಾಚುತ್ತಲೇ ವೇದಿಕೆ ಏರಿ, ರಣವೀರ್ ಕೈಹಿಡಿದು ಮಾತನಾಡಿದ ದೀಪಿಕಾ, ತಮ್ಮ ಸಂತಸದ ಕ್ಷಣಗಳಿಗೆ ಸಾಕ್ಷಿಯಾದ ಸ್ನೇಹಿತರಿಗೆ ಧನ್ಯವಾದ ಸಲ್ಲಿಸಿದರು.