2018ರಲ್ಲಿ ತೆರೆಕಂಡ ಶಿವರಾಜ್‌ಕುಮಾರ್‌ ನಟನೆಯ, ಸೂರಿ ನಿರ್ದೇಶನದ ‘ಟಗರು’ ಸಿನಿಮಾ ಸೂಪರ್‌ಹಿಟ್‌ ಆಗಿತ್ತು. ಸೆ.3ಕ್ಕೆ ಬೆಂಗಳೂರಿನ ತ್ರಿವೇಣಿ ಹಾಗೂ ಹಗರಿಬೊಮ್ಮನಹಳ್ಳಿಯ ಕೃಷ್ಣ ಚಿತ್ರಮಂದಿರದಲ್ಲಿ ‘ಟಗರು’ ಚಿತ್ರ ಮರುಬಿಡುಗಡೆಯಾಗಲಿದೆ. ‘ಚಿತ್ರಮಂದಿರದ ಮಾಲೀಕರೇ ಬೇಡಿಕೆ ಇಟ್ಟಿದ್ದಾರೆ. ಮತ್ತೆ ಪ್ರೇಕ್ಷಕರನ್ನು ಸೆಳೆಯುವ ಉದ್ದೇಶದಿಂದ ಈ ಚಿತ್ರವನ್ನೇ ಆಯ್ಕೆ ಮಾಡಿದ್ದಾರೆ. ಹಬ್ಬದ ಸಂದರ್ಭದಲ್ಲಿ ರಾಜ್ಯದ ಮತ್ತಷ್ಟು ಚಿತ್ರಮಂದಿರಗಳಲ್ಲಿ ಚಿತ್ರವು ರಿರಿಲೀಸ್‌ ಆಗಲಿದೆ. ಕಳೆದ ಲಾಕ್‌ಡೌನ್‌ ಆದ ಮೇಲೂ ಈ ಚಿತ್ರ ರಿರಿಲೀಸ್‌ ಆಗಿತ್ತು. ಕೆಲ ಚಿತ್ರಮಂದಿರಗಳಲ್ಲಿ ಹೌಸ್‌ಫುಲ್‌ ಪ್ರದರ್ಶನವೂ ಕಂಡಿತ್ತು. ಈ ಚಿತ್ರವನ್ನು ಈಗ ರಿರಿಲೀಸ್‌ ಮಾಡಿದರೆ ಜನರು ಮತ್ತೆ ಚಿತ್ರಮಂದಿರದತ್ತ ಬರುತ್ತಾರೆ ಎನ್ನುವ ನಂಬಿಕೆ ಚಿತ್ರಮಂದಿರದ ಮಾಲೀಕರಿಗಿದೆ. ಹೀಗಾಗಿ ಶೇ 50 ಪ್ರೇಕ್ಷಕರಿಗೆ ಅವಕಾಶವಿದ್ದರೂ ಈ ನಿರ್ಧಾರವನ್ನು ಅವರು ತೆಗೆದುಕೊಂಡಿದ್ದಾರೆ’ ಎಂದು ‘ಟಗರು’ ನಿರ್ಮಾಪಕ ಶ್ರೀಕಾಂತ್‌ ಕೆ.ಪಿ ತಿಳಿಸಿದರು.
