ಈ ಎರಡೂ ಸಿನಿಮಾಗಳು 2024ರ ಜನವರಿ 26ರಂದು ರಾಜ್ಯದಾದ್ಯಂತ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಬಿಡುಗಡೆಯಾಗಲಿದೆ. ಬಿಡುಗಡೆಗೆ ಲಕ್ಷಾಂತರ ರೂಪಾಯಿ ಖರ್ಚು ಬೀಳುವ ಕಾರಣ, ಹೊಸ ಮಾದರಿಯ ಪ್ರಯೋಗವೊಂದಕ್ಕೆ ಈ ತಂಡಗಳು ಸಜ್ಜಾಗಿವೆ. ₹400ಕ್ಕೆ ಈ ಎರಡೂ ಸಿನಿಮಾದ ಟಿಕೆಟ್‌ಗಳನ್ನು ಆಸಕ್ತರು ಖರೀದಿಸಬಹುದು. ಅಥವಾ ಇಂತಹ ಸದಭಿರುಚಿಯ ಚಿತ್ರಗಳಿಗೆ ಹಣದ ರೂಪದಲ್ಲಿ ಪ್ರೋತ್ಸಾಹ ನೀಡಲು ಇಚ್ಛಿಸುವವರು ಆ ಮಾರ್ಗವನ್ನು ಅನುಸರಿಸಬಹುದು. ಈ ಎರಡೂ ಪ್ರಕ್ರಿಯೆಗಳಿಗಾಗಿ ತಂಡವು ಪ್ರತ್ಯೇಕ ವೆಬ್‌ಸೈಟ್‌ ರೂಪಿಸಿದೆ. ಒಂದೂವರೆ ತಿಂಗಳ ಮೊದಲೇ ಈ ಪ್ರಕ್ರಿಯೆ ಆರಂಭಿಸಿರುವ ತಂಡವು ಟಿಕೆಟ್‌ ಹಂಚಿಕೆ ಮೂಲಕ ಕ್ರೌಡ್‌ ಫಂಡಿಂಗ್‌ ಮಾಡಲಿದೆ. ಈ ಹಣವನ್ನು ಸಿನಿಮಾ ಪ್ರಚಾರ, ವಿತರಣೆಗೆ ಬಳಸಿಕೊಳ್ಳಲಿದೆ. ಕನ್ನಡ ಚಿತ್ರರಂಗದಲ್ಲಿ ಈ ಪ್ರಯೋಗ ಹೊಸದು. ‘ಹೀಗೆ ಒಟ್ಟಿಗೇ ಎರಡೂ ಸಿನಿಮಾಗಳ ಬಿಡುಗಡೆ ಮಾಡುವುದರಿಂದ ಖರ್ಚು ಕೂಡಾ ಕಡಿಮೆ. ನಮ್ಮ ಈ ಮಾದರಿಯನ್ನು ಹೊಸಬರು ಅನುಸರಿಸಬಹುದು’ ಎನ್ನುತ್ತಾರೆ ಹದಿನೇಳೆಂಟು ಸಿನಿಮಾದ ನಿರ್ದೇಶಕ ಪೃಥ್ವಿ ಕೊಣನೂರ್‌.
